1 Yayi ni mambu ya Yave yina yandi

zabisaka na Yowele, mwana ya Petwele.

2 Beno Bakuluntu,

beno kuwa dyambu yayi,

beno nyonso bantu ya yinsi,

beno fungula makutu.

Dyambu ya mutindu yayi

me salamaka na ntangu ya beno

to na ntangu ya bankooko ya beno?

3 Beno zabisa yawu na bana ya beno,

bawu mpe ke zabisa yawu

na bana ya bawu,

samu ti, bana ya bawu kuzabisa yawu

na mbandu yina ke landa.

4 Madya yina bidongolo me bika,

ni makonko me kudya yawu.

Madya yina makonko me bika,

ni banzenze me kudya yawu.

Mpe madya yina banzenze me bika,

ni bambele-mbele me kudya yawu.

5 Beno, bayina ke kolaka malafu,

beno vumbuka mpe beno dila.

Beno, bayina nyonso ke kunwaka vinu,

beno yawula na ngolo samu ti,

beno ke kunwa dyaka ve

vinu ya mbote.

6 Samu ti, yinsi mosi me kwiza nwanisa

yinsi ya munu.

Yawu kele na ngolo mingi,

mpe ba lenda tanga ve lutangu ya bawu.

Meno ya yawu kele mutindu

meno ya nkosi ya mbakala,

mpe bayinwa ya yawu kele mutindu

yinwa ya nkosi ya nkento.

7 Yawu me mwangisa bilanga ya munu ya vinu,

mpe yawu me zenga bayinti

ya munu nyonso ya fike.

Yawu me katula bampusu ya yawu,

mpe me losa yawu na ntoto.

Bintala ya yawu me kuma mpembe.

8 Yawula mutindu ndumba

yina me zaba ntete ve babakala,

yina me vwata ngoto

samu na bufwidi,

mpe ke na kudila

bakala ya yandi ya buntwenya.

9 Ba ke na kunata dyaka ve minkayulu ya faline

mpe minkayulu ya vinu na Yinzo ya Yave.

Ni yawu yina, banganga-Nzambi me kuma na kyadi,

bawu, bayina ke sadilaka Yave.

10 Bilanga nyonso me mwangana,

ntoto me kuma na kyadi.

Bambuma ya faline ke dyaka ve,

vinu ya malu-malu me manisa.

Mafuta ya malu-malu me sika.

11 Bayina ke salaka bilanga, me lemba.

Bayina ke salaka bilanga ya vinu

ke na kuyawula na ngolo nyonso,

samu na bambuma ya faline mpe ya oloze,

samu ti, bambuma nyonso yina ba yonzikaka ke dyaka ve.

12 Bayinti nyonso ya bilanga ya vinu me yuma,

bayinti ya fike me beba.

Bayinti ya ba-ngelenade,

bayinti ya pome, na maba,

bayinti nyonso ya bambuma

ya bilanga me yuma.

Bantu ke dyaka ve na kilengi.

13 Beno banganga-Nzambi,

beno lwata binkuti ya beno ya kyadi,

beno vwanda na manyongo,

beno yawula na ngolo nyonso.

Beno, bayina ke sadilaka Nzambi

kuna na kiyokolo ya minkayulu,

beno vwata bangoto,

mpe beno kwiza lutisa mpimpa ya muvimba,

samu ti na Yinzo ya Nzambi ya beno,

minkayulu ya faline mpe ya vinu ke dyaka ve.

14 Beno sala kilumbu ya kumina nsoki.

Beno bokila bantu

samu na kusala lukutakanu ya nene samu na Yave.

Beno kutikisa Bakuluntu na bantu nyonso ya yinsi

na Yinzo ya Yave, Nzambi ya beno.

Mpe beno looka na Yave.

15 Kyadi mingi na kilumbu yina!

Samu ti, Kilumbu ya Yave✝

me kuma pene-pene.

Yawu ke na kukwiza

mutindu mwangusulu yina

me katuka na Nzambi-Mpungu.

Kilumbu yango ke na kukwiza.

16 Ni na meso ya beno

madya ke na kutalana dyaka ve.

Mpe kyese na kilengi me zimbana

na kati ya Yinzo ya Nzambi ya beto.

17 Bambuma yina ba kundaka

me yuma na yisi ya ntoto.

Bikebolo ya madya

ke dyaka na kima ve.

Bibumbulu ya bambuma

me mwangana, samu ti,

bambuma ya faline ke dyaka ve.

18 Beno kuwa mutindu

bibulu ke na kudila!

Bankonga ya bangombe

ke na kwendaka tambula kidi-kidi,

samu ti, matiti ya bawu ke dyaka ve.

Ya vwanda bankonga ya bankombo na ya mameme,

bawu mpe ke na kutala mpasi.

19 Yave, mu ke na kuyawula

na sika ya nge, samu ti,

tiya me manisa na kuyoka

matiti nyonso ya bisika yina

bibulu ke kwendaka kudya.

Mpe milaka ya tiya me manisa

na kunyengisa bayinti nyonso ya bilanga.

20 Bibulu ya mfinda mpe

ke na kuyawula na sika ya nge,

samu ti, miila nyonso me sika.

Tiya mpe me manisa na kunyengisa

matiti nyonso ya bisika yina bibulu

ke kwendaka kudya.