1 Yave me tuba: «Ya tsyelika, na bilumbu yina,

ntangu mu ke bongisa dyaka Yuda na Yelusalemi*,

2 mu ke vukisa bayinsi

nyonso ya nzenza,

mpe mu ke kulumuna bawu

na mudimba, yina ba ke bokilaka

Yewosafate, yina zola kutuba

"Yave ke na kufundisa".

Mpe ni kuna mu ke fundisa bawu,

samu na mambu yina

ba salaka na Isayeli,

bantu ya munu,

mpe mvwilu ya munu,

samu ti, ba me mwangisa

bantu ya munu

na bayinsi ya nzenza,

mpe ba me kabula yinsi ya munu.

3 Ba me budila bantu ya munu dzeke.

Ba me pesa bana ya fyoti ya babakala

samu na kuzwa bakento ya kindumba.

Ba me tekisa bana ya fyoti ya bakento

samu na vinu yina ba me kunwa.

4 Beno mpe,

beno bantu ya Tile na bantu ya Sidone,

mpe bizunga nyonso ya ba-Filiseti✝,

yinki beno ke na kusosila munu?

Beno zola kuvutula munu yimbi?

Kana beno vutula munu yimbi,

na nswalu nyonso,

mu ke vutudila beno

yimbi yina beno salaka.

5 Beno bakaka wolo na palata ya munu,

bima ya munu ya ntalu mpe ya kitoko,

beno kwendaka tula yawu

na kati ya bayinzo ya banzambi ya beno.

6 Ni beno tekisaka bantu ya Yuda

mpe ya Yelusalemi

na sika ya ba-Ngeleke,

samu ti, bawu vwanda ntama

na yinsi ya bawu.

7 Kasi munu, mu ke syamisa bawu

samu ti ba basika na kisika yina

beno tekisaka bawu.

Mpe mu ke vutudila beno

yimbi yina beno salaka.

8 Mu ke tekisa bana ya beno ya babakala

mpe ya bakento na sika ya bantu ya Yuda.

Mpe bantu ya Yuda ke tekisa

bawu na ba-Sabeye✝,

bayina ke zingaka na yinsi yina kele ntama.

Ni Yave me tuba yawu.»

9 Beno zabisa na bantu ya

bayinsi ya nzenza mutindu yayi:

«Beno kubama samu na mvita,

beno kubika bayina ke na kibakala.

Bawu telema samu na kukwenda na mvita.

10 Beno kitula bisengo ya

kubalula ntoto na

bambele ya mvita,

mpe minkwati ya beno

na madyonga.

Muntu yina kele ve na ngolo,

yandi tuba ti,

mu ke kinwani yina ke na kibakala.

11 Beno bantu ya bayinsi

yina kele pene-pene,

beno kwiza pesa maboko.

Beno vukana kisika mosi.»

Yave, fidisa bantu ya nge

yina ke na kibakala kuna.

12 «Bika ti bantu ya bayinsi ya nzenza kutelama.

Bawu kwenda na mudimba,

yina ba ke bokilaka Yewosafate*.

Ni kuna, mu ke vwanda

samu na kufundisa bayinsi nyonso

yina kele pene-pene.

13 Beno baka minkwati ya beno

samu ti ntangu ya kuyonzika bambuma me lunga.

Beno dyata bambuma ya vinu

yina me fuluka na kikamununu.

Vinu ke na kufuluka ya kulutila

na banzungu ya nene.

Ya tsyelika, yimbi ya bawu kele nene.»

14 Bankonga na bankonga me fuluka

na mudimba ya mfundusu.

Kilumbu ya Yave me kuma

pene-pene na mudimba ya mfundusu.

15 Ntangu na ngonda me kuma ndombe.

Bambwetete ke na kulezima dyaka ve.

16 Yave ke duma na Siyone.

Katuka Yelusalemi,

yandi ke wakisa ndinga ya yandi.

Na yina, zulu na ntoto ke ningana.

Kasi Yave kele kiswamunu

samu na bantu ya yandi.

Yandi kele kibumbamanu ya ngolo

ya bantu ya Isayeli.

17 «Na yina, beno ke zaba ti,

mu kele Yave, Nzambi ya beno,

yina ke zingaka na Siyone,

mongo ya munu ya longo✝.

Yelusalemi ke kuma kisika ya longo.

Mpe banzenza ke banda

na kukotaka dyaka ve kuna.»

18 «Na kilumbu yina,

vinu ya mbote ke kulumuka na myongo.

Miliki ke kulumuka na myongo ya fyoti.

Maza ke banda na kuluta

na miila nyonso ya Yuda.

Yinto ke basisa maza na Yinzo ya Yave,

mpe yawu ke kulumuka

na muzumba yina ba ke bokilaka Akasya.

19 Yinsi ya Ngipiti ke kuma

kisika ya kumwangana.

Yinsi ya Edome ke kuma ntoto ya kuyuma

mpe ya kumwangana,

samu na yimbi

yina ba salaka bana ya Yuda,

na ntangu ba tangisaka,

na yinsi ya bawu,

menga ya bantu yina salaka kima ve.

20 Kasi bambandu na bambandu,

bantu ke bika ve na kuzinga

na Yuda mpe na Yelusalemi.

21 Mu vwandaka me vutudila ntete ve bawu yimbi

yina bawu salaka.

Kasi, mu ke vutudila bawu yimbi

samu na menga ya bantu

yina ba tangisaka.

Mpe munu Yave, ke zinga na Siyone.»