1 Den no, natmayge liwo lēm̄ yon̄.

Hiy bulsal Ḡayus, a no natam hēywē kē.

2 Bulsal, nok tatay so nahaphap del itōk mi nēk, wa nataqn̄i nēwē, qele a so natale nēwē. 3 No memlaklak a nēkēkēn veg yatkel yathēthēngēn mēdēn̄ me tō mavasemlō noyoy veg nēk, so nēk vanvan lapgetō tiwag mi nēhēyhēywē. 4 Tateh malaklak se qele a nok malaklak tō agōh, a so nok yon̄teg so ige yantintik vanvan tiwag mi nēhēyhēywē non Ḡod.

5 Bulsal, mahē nēk biyimyin̄ ige yathēthēngēn en, nēk tog tenenen, wa tō yakhagyeh ige yathēthēngēn a kēy nahalvan. 6 Kēy mal vasemlō natamtam nōnōm lengon ige tēlēm̄ yon̄ geh me agōh. Itōk so nēk vētleg kēy mi natkel hap bemtehal nonoy qele a haytēyēh hiy ige yowyowveg non Ḡod. 7 Veg kēy melep namtehal nonoy lahan Kraēs, tō kēy et vēhge te hapte den ige lolqōn̄. 8 Bastō gēn so biyin̄ ige gōh mi namlangēn. Heylō namlangēn en, gēn mugumgu tiwag mi kēy lēhēyhēywē.

9 No mayap vatag van hiy nēm̄ yon̄, ba Diotrēfēs et yon̄teg te kemem, veg kē nemyōs so nim̄agm̄agoy kēy mahgen. 10 Veg bege gōh, nok din̄ me en, tō no tiqoyo aklō nahap a kē niakak en, nohohole het a kē nihole gatay veg kemem. Et haytēyēh te so kē nihohole hethet hiy kemem, ba kē et lep vasgēt te ige yathēthēngēn. Tō hag apwon en, kē nigatgatgoy ige a nemyōs so lep vasgēt kēy, tō kē nim̄ōk lō kēy den nēm̄ yon̄.

11 Bulsal, nitog tatag nehet, ba tatag nēwē. Net a niak nēwē en, kē tiwag mi Ḡod. Net a niak nehet en, kē et tiwag te mi Ḡod.

12 Ige del vavasemlō so Dēmētrias en, kē itōk. Tō namtevōn netnenen tiwag mi nēhēyhēywē non Ḡod. Wa tō ino se, nok vasemlō temuk nēwē nonon. Tō nēk ēglal so nohohole nonmem nēhēyhēywē.

13 Woqse hohole mino lapgetō, so vap van hiy nēk, ba nok et buste so yap mi nēqēt yapyap. 14 Nok dēm van so no tiqyo vatēp nēk, tō gēn tohole togolgol.

15 Natm̄at nitog tiwag mi nēk. Ige yapluplu vēwē nēk. Vēwē hiy ige yapluplungēn vivitwag del.