1 Den Jud, net mugumgu non Tigsas Kraēs, ba ithik a Jemes.

Hiy kimi a Ḡod mōlōl vatag tō kimi, tō nitamtam kimi, wa tō Tigsas Kraēs nietgoy kimi.

2 !Nok tatay so namgaysēn, natm̄at, wa natamtam non Ḡod niōyheg kimi vaga!

3 Yēhē bulbulsal. Am̄ag no nemyōs so yap van hiy kimi so hole gatay namtehal a Ḡod mal vaēh gēn aē, ba nok hohole ēwē veg navatvatne a gēn nēdēmtig. Nok so vahiy maymay kimi so tēy maymay nēdēmtig nongēn. Veg Ḡod melep me nitiy vatvatne vag tiwag ēwē hiy gēn a ige yon̄ nonon. Yēhē, etgoy galsi navatvatne nan mi navaksami.

4 Veg yatkel et het mahayveg bat me lelo ēm̄ yon̄ nonmi. Kēy et dēmap te Ḡod. Kēy vap so et wē te so dēm leh veg nasgōp non Ḡod nilepyak nivipdeg bubug. Tō kēy dam vēlēs namyōs het nonoy. Tō kēy mēlēn̄lēn̄teg Tigsas Kraēs, a kē mahgen namyanag wa Welan nongēn. Ba am̄ag yeh ige lēgēlgēg mohole gatay namtehal a Ḡod so nivēvēg kēy aē.

5 Kimi nēglal vatag nakaka veg Ḡod. Dēm lok hiy mahē a Welan* mavaēh tō ige Tisrael den Itsip, tō mey atgiy kē muwuh mat qēt ige a kēy et dēmtig te kē.✝

6 Wa tō ige in̄sel en, a kēy et tatag te so tēy natno liwo nonoy alge, ba kēy mukēg veteg nitiy vōnō nonoy tō van me ige vu het. Tō Ḡod mēvētleg kēy lemlēglēgsil a wōsōy, tō mēyēt lap kēy mi nējēn a tit m̄ēt vēhte. Tō kēy tog dēyē nōqōn̄ liwo a Ḡod tēvēvēg kēy aē.

7 Tō qelese anen, ige sil telepnō a Sodom, Ḡomorah, wa lelqelqevōnō geh nen, ikēy damdam namtehal ne legleg soloteg, tō namyōs nonoy nehet a nehet. Tō kēy vasemlō qeleave tō Ḡod nēvēvēg ige het mi nep a tit mat vēhte.✝

8 Hēywē, ige het lēm̄ yon̄ qiyig gōh en, kēy akak tatag nahaphap a loqoyqoy nonoy ēwē. Kēy ak mamayge nataqn̄ēy lemtehal non ige Sodom. Tō tateh len̄e yon̄teg mi kēy. Tō kēy hole legelge hiy ige in̄sel a nēlēn̄as.

9 Kimi ēglal vatag nakaka veg in̄sel Michael, a kē net liwo non ige in̄sel en, mahē kē mēvēygēl tiwag mi Satan veg bataqn̄ēn Mosis.* Michael et dēm liwo te kē so nihole hethet hiy Satan. Ba kē mavap vēlēs so, "!Welan qoyo gatgoy nēk aē!"

10 Tō ige gōh ak sapsapwōy, tō kēy hole hethet hiy nahaphap a kēy et ēglal te aē. Veg kēy qele nahaphap tuytuy a nēdēmdēm nonoy tateh. Ba nahap a kēy nēglal en, namyōs het vēlēs anen, nahap nan niak hethet nowmat kēy.

11 !Ḡod tivipdeg kēy aē! Veg kēy madam namtehal non Ken,✝ tō madam nēdēmdēm het non Balaam, a lemtēsnag nēsēm.✝ Tō kēy so mat tiwag mi Korah, a mitig helem̄ag yatkel et so vēyvēyle tiwag mi Ḡod.✝

12 Mahē kimi tēlēm̄ yon̄ hag tiwag begengen en, kēy ak hethet kimi veg kēy nelem a nelem lengon Ḡod. Mahē kēy gengen wa inin, kēy dēmdēm vēlēs hiy kēy, qele ige betetgoy sipsip mey a et ven̄en te nisipsip. !Tō nataqn̄ēy et mamayge hōn te aē!

Tō kēy qeleso namlēg sam̄al a nelen̄ niyip kēlkēl ēwē kēy ba tit sam̄al vēhte. Kēy qele nētētēnge a memyuw tō lelen̄wuh. Kēy tit ō lokse vēhte nēway wa tō kēy meyen̄.

13 Namtevōy niak mamayge qēt nataqn̄ey qele so nanaw liwo nimlat me, tō namyosyos nihag lap, qeleso namamayge nonoy. Ikēy qele nivit a mavan ley, tō damdam namlēglēg mēdēn̄ mahē a nemlēglēg sil n̄a amnō. Ḡod mētēymat namtehal nan hiy kēy.

14 Am̄ag en, Enok, ikē net liwo liviyō negi lēklan Adam, kē melgēg tō kēy so, "!Atmi et! Welan tavan me tiwag mi ige in̄sel nonon a kēy tey vag tey. 15 Tō Ḡod tēvēvēg nisil del, wa tak vēglal kēy veg namtevuy mey nehet a kēy mak tō. Tō kē tak vēglal se kēy veg bohohole hethet mey kēy musuwyeg tō lengon veg kēy et dēmap te kē."*

16 Kēy damdam namtehal ne mōyōs het nonoy. Kēy ige ben̄en̄e wa bavap n̄ay, ba kēy hole besbes ige tegha so tēy nēwē nonoy aē. Tō kēy hole dēm yak kēy mahgey.

17 Yēhē bulbulsal. Atmi dēmlok vel hohole a ige hal non Welan nongēn Tigsas Kraēs mohole tō van hiy kimi aē am̄ag, 18 a kēy vap so, "Mahē a yipteg so namyam nibah en, woqse et toboyboyheg Ḡod wa kēy tak tatag vēlēs namyōs het nonoy, wa tō kēy titig kēlē Ḡod wa tit yon̄teg vēhte kē."

19 Ige qelegōh, kēy akak vēlwoy kimi, veg kēy tatag vēlēs nēdēmdēm nonoy, wa Nuvu Yon̄ tateh mi kēy.

20 Yēhē bulbulsal. !Navatvatne a gēn nēdēmtig en, kē noyon̄ a noyon̄! Atmi vasusup lokse kimi lēdēmtig nonmi. Tō tatay mi naman ne Vu Yon̄. 21 Ak so natamtam non Ḡod notog mi kimi. Tō kimi so et van hiy Tigsas Kraēs Welan nongēn, tō kē so nimgaysēn kimi, wa nilep van nēh lap hiy kimi.

22 Ige et a nēdēmtig nonoy et maymay te en, atmi magaysēn kēy ba biyin̄ kēy. 23 Ige mey a nahaphap het niqal kēy lēh nonoy en, atmi biyin̄ kēy. Tō megōhkē qeleso kēy misisgoy lep, tō kimi so vaēh kēy, ba lepyak togotgo kēy me den nep nan. Ige mey negengenyeg en, atmi magaysēn kēy, ba mētēgteg goy veg kimi se tiple gengenyeg. Van tagtag den negengenyeg nonoy, qele kimi van tagtag den namalmal a nelem veg negengenyeg aē.

24,25 !Sōwlē, gēn lep kal nahan Ḡod a vitwag woy! Veg kē mahgen mavaēh gēn. Tō kē nitigoy gēn den negengenyeg gaydēn̄ a so kē nilep kal gēn, tō gēn tig van lengon. Gēn titig lēlēn̄as nonon, tō gēn wenwen wa ōyheg mi namlaklak. Kē nitiy mayanag liwo, a nēlēn̄as, naman, wa nahan nilwo. Gēn ōl liwo kē heylō Tigsas Kraēs Welan nongēn. !Kē neketket den am̄ag yeh, qiyig gōh, wa tit bah vēhte! Amen.