1 Den Pol, a notog lēm̄ yētyēt veg Kraēs Tigsas en, tiwag mi Timoti, a ēthēngēn.

Hiy Filemon, a nitiy qulqul nongēn wa gēn nemgumgu tiwag. 2 Apia, a tētan gēn, wa Akipas, a kamyō nemgumgu maymay tiwag, wa ige ne ēm̄ yon̄ mey hay tiwag tō lēm̄ nōnōm.

3 Nasgōp nivan hiy kimi, wa natm̄at den Ḡod Imam nongēn wa Welan Tigsas Kraēs.

4 Filemon, vel tatay mino, nok gatay vaga nēk, tō nok vēwē Ḡod aē. 5 Veg no moyon̄teg batamtam nōnōm wa nēdēmtig nōnōm a nivan hiy Welan Tigsas wa hiy ige del non Ḡod. 6 Nok tatay so nēk tavasemlō vēh nēdēmtig nōnōm, tō so nilep kal galsi me nololmeyen besgōp. Nasgōp nan en, nahaphap mey nēwē del a Kraēs melep tō me hiy gēn. 7 Ithik, nēdēmdēm mino memhuy veg batamtam nōnōm, veg nēk mak so nalo taqan ige non Ḡod mamaymay lokse.

8 Veg batamtam gōh nok dēmdēm so vēhge nēk. Kraēs mōm̄ōk no so vasemlō namtehal mey netgolgol vēlēs, 9 ba nok et malaklak te so vap maymay van hiy nēk aē. Veg batamtam en, nok so vēhge ēwē. Ino Pol, no mal tamayge, wa no notog lepgetō lēm̄ yētyēt veg Kraēs Tigsas.

10 Nok vēhge nēk veg intik, Onēsimas. Mahē no lēm̄ yētyēt en, no mavasemlō Kraēs van hiy kē, tō no mavan me imam nonon. 11 Am̄ag en, kē et wē te van lengē, ba togtōkē, kē mitiy wē yeh van hiy nēk wa me hiy no.* 12 Nok vētleg m̄ōl lok kē van hiy nēk, ikē napyek.

13 Mahē no lēm̄ yētyēt boyoy ēwē en, no nemyōs net so nimyin̄ no. Tō nok dēmdēm mahgēk so tēy goy Onēsimas so nimyin̄ no lehe. 14 Ba nok et buste so tēy goy kē asaw den nēdēmdēm nōnōm en. Itōk so nēk ak nage mey nēwē veg nēk nemyōs, ba et veg te so nok ak maymay van hiy nēk aē.

15 Kē motog yeh den nēk nusuvay minis, ba Ḡod wun mukēg kē megōh tō so niak nage mey nēwē en; tō so nēk telep lap lokse kē qeleso ithi. 16 Am̄ag kē neslev ēwē, togtōkē nahan nilwo den am̄ag, kē nitiy ithi. No natam kē a natam kē, ba nēk wun nitiy tam yeh kē. Veg ikē net mugumgu nōnōm wa kē ithi heylō Welan.

17 Veg bege gōh, so nēk wo tēy maymay no qeleso iplu, lep vasgēt kē qeleso nēk lep vasgēt no. 18 So kē wo mak nahap mey nehet hiy nēk, si so melep mamah tō nahap den nēk en, yap vasem hōw lehek. 19 Ino Pol, nok yap van nohohole gōh mi namnēk, nok tēwēl goy qēt. Ba no tit gatay lok vēhte so nēk melep nēh gayaq nōnōm heylō no.* 20 O-oh, ithik, no nemyōs nēvēvēhiy liwo vitwag den nēk lahan Welan. Ak netnet nalo teqek lahan Kraēs.

21 Nok yapyap en, no nemhuy veg no nēglal galsi so nēk toyon̄teg no, wa tō nēk telep malig se van den nohohole mino.

22 Nage vitwag se, tēymat how natno mitiy mino, veg no nēdēmtig so Ḡod teplu goy natatay nonmi, wa telep lokse no van hiy kimi.

23 Epapras, a notog tiwag mi no lēm̄ yētyēt veg Kraēs Tigsas en, kē nihole vētleg lemtap nēwē van hiy nēk. 24 Wa tō ige yaplupluk mey a kemem nemgumgu tiwag, Mak tiwag mi Aristakas, Dēmas wa Luk.

25 Nasgōp non Welan Tigsas Kraēs nitog tiwag mi natalami.