1 Nēk vasusup lok ige sil nōnōm so kēy dēmap ige mayanag wa kapman nonoy. Kēy so yon̄teg kēy, wa tēytēymat vaga so ak namgumgu mey nēwē. 2 Kēy nitog hohole hethet hiy net tegha wa kēy nitog vēyvēygēl. Kēy so qulqul galsi mi ige sil del, wa etet lolwē kēy vaga.

3 Veg am̄ag gēn nataqlēn̄lēn̄, nēqēt maymay, wa gēn madam nagalgal ba mavan qelen̄. Namyōs tegtegha mey nehet magamteg gēn mavan me qeleso ige slev, veg namyōs het geh nen mak tō so gēn mak nahaphap mey nehet vēlēs. Nēmētwungēn mehet, wa gēn matwolwol. Nisil mololgagay gēn, ba gēn mepsipteg lok gēn vivitwag.

4 Ba Ḡod, Ivaēh nongēn, mavasemlō natamtam wa nēmētwōn togolgol me en, 5 tō kē mavaēh gēn. Kē mavaēh gēn en, et veg te bemgumgu tenenen nongēn, ba veg bemgaysēn nonon hiy gēn. Kē mavaēh gēn heylō Nuvu Yon̄ a moh wenwen gēn, mak gayaq gēn, wa melep me hiy gēn namtevungēn mey negyaq. 6 Nuvu Yon̄ en, Ḡod mōlōwyeg galsi kē me hiy gēn heylō Tigsas Kraēs, Ivaēh nongēn. 7 Bastō Ḡod mōm̄ōk togolgol gēn lengon mi nasgōp nonon tō so Ḡod nisolyak gēn. Ak tō, gēn qultiwag mi ige a nēdēmdēyē bēh lap.

8 !Nohohole nan, ikē hēyhēywē! Ba namyōs kokoym̄eg mino so nēk hole maymay lokse bege agōh. Hole maymay, tō so ige a nēdēmtig Ḡod en, kēy so tig maymay lemgumgu mey nēwē, tō namgumgu togolgol nan temyin̄ galsi ige sil.

9 Ba van yeh den nēvēyvavaleh qaqa en, nēvēy kōn̄kōn̄, wa nēvēyvavaleh veg ige bum tam̄ag, si nele non Mosis. Nēvēyvavaleh del nan yeghuquy ēwē wa tateh su wē nan geh. 10 Ba net mey a niak vēlwoy nēm̄ yon̄ en, ōlgontegoy kē. Ōlgontegoy kē vagyō ēwē, ba so kē wo et yon̄teg te, lepyak kē. 11 Nēk so ēglal ēwē so net qelegōh en, namtevōn et tenenen tē, wa kē negengenyeg, tō kē tivipdeg kē mahgen.

12 Nok so vētleg Atemas si Taykikas hiy nēk. Kē wo mēdēn̄ van en, ba nēk hatig van ēgē me n̄a Nikopolis, veg no mal qetqet so tog me gōh a lōwōl momyiy. 13 Senas a net bele* wa Apolos en, itōk so nēk vētleg galsi kōyō mi natkel hap bemtehal nōyō, tō so nahaphap del bemtehal nōyō nihaytēyēh.

14 Itōk so ige et nongēn vatne so mugumgu togolgol vaga wa tō so biyin̄ ige m̄asay, tō so ige tēlēm̄ yon̄ en, namyen tit qal vēhte kēy, ba nēway aē.

15 Ige del mey hiy no gōh en, kēy vasem van namlaklak nonoy van hiy nēk. Vasemlō namlaklak mino van hiy ige bulsal nongēn a gēn nēdēmtig tiwag.

Nasgōp non Ḡod nitog tiwag mi kimi del.