1 Ba inēk, Titus, toytoy lō nahaphap a netnenen heylō navatvatne mey a nitiy tenenen.

2 Nēk so vatne ige tamatmayge tam̄an so kēy nitog inin meh, namtevuy niwē, namhuy wa natamtam aē mi kēy, nēdēmtig nonoy nimaymay, wa kēy so tig maymay mi nēdēmdēm mey nehyo.

3 Tō ige magmagtō se qeleanen, vatne kēy so namtevōy niwē haytēyēh qeleso ige non Ḡod. Tō nitog lēlēlhiy net wa nitog inin meh. Ba itōk so kēy vatne ige m̄alm̄al mi nahaphap mey a itōktōk. 4 Tō kēy tavatne vēh kēy lemtehal mey kēy tatam vēh yagnōgnōy tiwag mi yantēntēy. 5 Ba ige m̄alm̄al so tog muhuy, etgoy galsi nēm̄ nonoy, wa kēy so tamtam, wa namtevuy so niwenwen galgalsi. Wa tō kēy so dēmap yagnōgnōy tō so tateh et so nihole hethet hiy nohohole non Ḡod.

6 Veg ige lōmlōmgep se qeleanen, hole biyin̄ kēy so dēm muhuy. 7 Ba Titus, inēk namakaliw mey nēwē, vasemlō namtevu mey nēwē heylō namgumgu togolgol. Tō vatne kēy mi nololēwē wa mi nēdēmap. 8 Tō etgoy so navatvatne nōnōm nitnenen qēt, a net tit hole gatay lok vēhte nēk aē. Ba vatne galsi ige sil tō so ige tavale en, nataqn̄ēy tamamayge aē veg tateh hole hethet so net nihole visipteg gēn aē.

9 Vatne ige slev* so yon̄teg galsi ige welan nonoy, a nēmētwuy nemtuw lahaphap del, ba et maymay te. 10 Tō itōk so kēy tesey betetgoy sēm vaga, ba et net batan̄tan̄hephep te. Namtevuy mey nēwē qelenen itōk, tō kēy tewseg me ige sil so yon̄teg nitiy vatvatne non Ḡod, Ivaēh nongēn.

11 Veg Ḡod maklō me nasgōp nonon tō so nivaēh ige del. 12 Tō nasgōp nan nivatne gēn so tigkēlē den namtevungēn mey nehet wa namyōs het telemyamkē. Heylō nasgōp nan gēn tog muhuy, tog tenenen, wa tō tog dēmap Ḡod vaga lelo mayam gōh. 13 Togtōkē gēn dēmdēyē Tigsas Kraēs, a Ivaēh wa nitiy Ḡod liwo nongēn. Gēn tog dēyē so kē nivan lok me mi nēlēn̄as liwo nonon. 14 Tigsas mahgen a mukēg van nēh nonon veg gēn, so niwēl yak gēn den negengenyeg del, wa tō so niak wenwen ige sil nonon van hiy kē. Kē mak qelegōh veg kē nemyōs so gēn van me nēvēwti et nonon. Tō kē nemyōs so gēn ak namgumgu togolgol mi navaksangēn.

15 Titus, vasemlō galsi nahap geh gōh van hiy ige nēm̄ yon̄ del. Vasusup kēy mi nēwē, wa ōlgontegoy kēy den nehet, heylō letno liwo nōnōm. Wa nitog so ukēg net so nidēm tēqēl nēk.