Nohohole biyin̄ ige tamatmayge wa ige magmagtō
1 Ba inēk, Titus, toytoy lō nahaphap a netnenen heylō navatvatne mey a nitiy tenenen.
2 Nēk so vatne ige tamatmayge tam̄an so kēy nitog inin meh, namtevuy niwē, namhuy wa natamtam aē mi kēy, nēdēmtig nonoy nimaymay, wa kēy so tig maymay mi nēdēmdēm mey nehyo.
3 Tō ige magmagtō se qeleanen, vatne kēy so namtevōy niwē haytēyēh qeleso ige non Ḡod. Tō nitog lēlēlhiy net wa nitog inin meh. Ba itōk so kēy vatne ige m̄alm̄al mi nahaphap mey a itōktōk. 4 Tō kēy tavatne vēh kēy lemtehal mey kēy tatam vēh yagnōgnōy tiwag mi yantēntēy. 5 Ba ige m̄alm̄al so tog muhuy, etgoy galsi nēm̄ nonoy, wa kēy so tamtam, wa namtevuy so niwenwen galgalsi. Wa tō kēy so dēmap yagnōgnōy tō so tateh et so nihole hethet hiy nohohole non Ḡod.
Nohohole biyin̄ ige lōmlōmgep wa ige bemgumgu
6 Veg ige lōmlōmgep se qeleanen, hole biyin̄ kēy so dēm muhuy. 7 Ba Titus, inēk namakaliw mey nēwē, vasemlō namtevu mey nēwē heylō namgumgu togolgol. Tō vatne kēy mi nololēwē wa mi nēdēmap. 8 Tō etgoy so navatvatne nōnōm nitnenen qēt, a net tit hole gatay lok vēhte nēk aē. Ba vatne galsi ige sil tō so ige tavale en, nataqn̄ēy tamamayge aē veg tateh hole hethet so net nihole visipteg gēn aē.