ዮሓኒሴም ፆኦሲ ፔጋሲ ዻዌ ባኮ 11

ላምዖ ማርካ

1 ዬካፓ ዖዶሱሞና ዳልጉሞና ሃሣ ዔጶና ዋርቆያ ዎኦሺ ማላ ሚሢ ታኣም ዒንጊንታዖ፦ «ዓኣዺ፥ ፆኦሲኮ ጌኤዦ ማኣሮና ፆኦሲም ዒንጊፆ ዒንጎ ቤዞና ዋርቄ፤ ሃሣ ዒኢካ ካኣሽካ ዓሶዋ ፓይዴ፤ ✝11፥1 ሂዚ. 40፥3፤ ዛካ. 2፥1-2። 2 ጌኤዦ ማኣሮኮ ዙላ'' ዓኣ ጶኦኮ'' ጋዓንቴ ዋርቂፖ፥ ሃሼ''፤ ዬይ፦ ሜሌ'' ዴሮ''ም ዒንጊንቴ ቤሲኬ፤ ዔያታ ፆኦሲም ዱማዼ ካታሜሎ ዖይዲታሚ'' ላምዖ ዓጊኒ ጉቤ ባሺ ዎይሣንዳኔ፤ ✝11፥2 ሉቃ. 21፥24። 3 ላምዖ ታኣኮ ማርኮንሢ ሲዬ ፓቲሌ ማይንቲ ፔቴ'' ሺያና ላምዖ ፄኤታና ላሂ''ታሚ'' ኬሊ'' ታ ማሊሢ ኬኤዛንዳጉዲ ዎልቄ ታ ዔያቶም ዒንጋንዳኔ» ጌይንቴኔ።

4 ዬንሢ ማርኮንሢ ሳዖይዳ ጎዳ ቤርታ ዔቃ፥ ላምዖ ሪሚቶ ሚፆንሢና ላምዖ ፖዖ ጌሦ ሻርኖንሢናኬ፤ ✝11፥4 ዛካ. 4፥3፤ 4፥11-14። 5 ዖኦኒያ ዔያቶ ማኣሳንሣኒ ማሌቶ ታሚ ዔያቶ ዻንጋፓ ኬስኪ ዬያቶ ሚቻንዳኔ፤ ዔያቶ ማኣሳንሣኒ ኮዓሢ ቢያ ሓይቃንዳ ጎይፃ ዬያይዲኬ። 6 ዔያታ ታ ማሊፆ ኬኤዛ ዎዶ''ንሢዳ ዒርዚ ዋርቁዋጉዲ ጫሪንጮ ዲርቃኒ ዔያቶኮ ቢታንቶ ዓኣኔ፤ ዬያጉዲ ዋኣፆ ሱጉሢ ማሂ ላኣማኒ ኮዔ ዎዶ''ና ቢያ ዓይጎ ባኣዚ''ናኣ ማዖም ሳዖ ባይዛንዳ ባኣዚ''ና ጳርቃኒ ቢታንቶ ዔያቶኮ ዓኣኔ። ✝11፥6 1ካኣቶ''. ማ 17፥1፤ ኬሲ. ማፃ 7፥17-19፤ 1ሳሙ. 4፥8።

7 ዔያታ ፔኤኮ ማርካቶ ጋፒሴሢኮ ጊንፃ ዼኤፖ፥ ዒጊቻ ዔታፓ ኬስካንዳ ቦዓሢ ዔያቶና ዖልቲ ባሻንዳኔ፤ ዎዺያ ዔያቶ ዎዻንዳኔ። ✝11፥7 ዳኣኔ. 7፥7፤ ዮሓ. ፆፔዻ 13፥5-7፤ 17፥8። 8 ሌዛ ዔያቶኮ ኮኦኪንሢና ሶዶኦሜ፥ ሃሣ ጊብፄ ጌይንታ ዼኤፖ ካታሜሎኮ ዓሳ ቡካ ጶኦካ'' ኬኤሪንታንዳኔ፤ ዬና ካታሜላ ዔያቶኮ ጎዳሢ ሱፂንቴ ካታሜሎኬ። ✝11፥8 ዒሲ. 1፥9-10። 9 ዱማ ዱማ ዜርፃፓ፥ ቶኦካ''ፓ ሓሣ ዱማ ዱማ ሙኡቺ ጌስታ ዓሶና ዴሮ''ናይዳፓ ማዔ ዓሳ ሓይሦ ኬሊ''ና ዛላና ማዓንዳኣና ሌዞ ዔያቶኮ ዒኢካ ዓኣንቴ ዛጋንዳኔ፤ ሌዛ ዔያቶኮ ዱኡኪንቱዋጉዲ ላኣጊንታያ ማዓንዳኔ፤ 10 ዬንሢ፥ ላምዖ፥ ፆኦሲ ማሊፆ ኬኤዛዞንሢ ሳዖይዳ ናንጋ ዓሶ ሜታሴሢሮ ሳዖይዳ ናንጋ ዓሳ ዔያታ ሓይቄሢሮ ዎዛዻንዳኔ፤ ዬያ ዎዛ''ፓ ዔቄያና ዔያቶኮ ሓይቦ'' ኬሎ'' ቦንቾ ኬሊ'' ማሂ፥ ዎሊም ዒንጎ ባኣዚ''ያ ዒንጋንዳኔ፤ 11 ሓይሦ ኬሊ''ና ዛላና ማዔሢኮ ጊንፃ ጋዓንቴ ሼምፖ ዒንጋ፥ ፆኦሲኮ ዑኡዛ ፆኦሲዳፓ ሙኪ ሌዛ ዔያቶኮ ጌሌም፥ ዔያታ ዔቄሢሮ ዔያቶ ዛጌ ዓሳ ሚርጌና ዒጊጬኔ። ✝11፥11 ሂዚ. 37፥10። 12 ዬካፓ ላምዖ ፆኦሲ ማሊፆ ኬኤዛዞንሢ፦ «ሓንጋ ኬስኩዋቴ!» ጋዓ ዼኤፒ ዑኡሲ ጫሪንጫፓ ዋይዜኔ፤ ዬማና ዔያቶኮ ሞርካ ዔያቶ ዛጋ ጎይሣ ዓኣንቴ ሻኣሬና ሌካ ጫሪንጮ ዔያታ ዓኣዼኔ። ✝11፥12 2ካኣቶ''. ማ 2፥11። 13 ዒማ''ና ሳዓ ሚርጌ ዓጊፄኔ፤ ካታሜሎኮዋ ታጶይዳፓ ፔቴ''ማ ማዓ፥ ቤዛ ቢያ ዶዒ ጋፔኔ፤ ዬያይዲ ዓጊፂፆና ላንካይ ሺያ ዓሲ ሓይቄኔ፤ ሓይባ''ፓ ዓቴዞንሢ ሚርጌና ዒጊጪ፥ ጫሪንጮ ፆኦዛሢ ጋላቲ፥ ቦንቼኔ። ✝11፥13 ዮሓ. ፆፔዻ 6፥12፤ 16፥18።

14 ላምዓሳ ሜታሢ ዎዳ'' ጋፔኔ፤ ሓይሾ ዓካሪ ሃይሣሳ ሜታሢ ዎዳ'' ዑኬና ዬዓንዳኔ።

ኪኢታንቻሢ ዋርቄ ላንካሳ ዛያሢ

15 ላንካሳ ኪኢታንቻሢ ዛያሢ ዋርቃዛ፥ ጫሪንጮይዳ፦

«ዓጮ'' ካኣቱማ

ኑ ጎዳሢ ማዔ ፆኦዛሢና ዒዛኮ ሜሲሔናም ማዔኔ፤

ዒዚያ ናንጊና ካኣታዻንዳኔ» ጋዓ ዼኤፒ፥ ዼኤፒ ዑኡሲ ዋይዚንቴኔ። ✝11፥15 ኬሲ. ማፃ 15፥18፤ ዳኣኔ. 2፥44፤ 7፥14።

16 ፆኦሲ ቤርታ፥ ካኣቱሞ ዖይቶይዳ ዴዒ ዓኣ፥ ላማታሞ ዖይዶ ጋርቾንሢ ባሊቶና ሳዖ ባንሢ ሂርኪ ጌዒ ጉምዓቲ ፆኦሲም ዚጌኔ፤

17 ዔያታ ዚጋ ዎዶ''ና፦

«ሓሢ ዓኣያ ሚናፓ ናንጋያ

ቢያ ባኣዚ'' ዳንዳዓ ጎዳ ማዔ ፆኦዛሢዮ!

ዼኤፖ ዎልቆ፥ ኔኤሮ ኔ ማሄሢሮ

ሓሣ ኔ ካኣታዼሢሮዋ ኔና ኑ ጋላታኔ።

18 ሜሌ'' ዴራ'' ሚርጌና ዻጋዼኔ፤

ሃሣ ኔ ዻጋ''ኣ ሙኬኔ፤

ሓይቄ ዓሶይዳ ኔ ዎጋ ዎዳ''ኣ ሄሌ''ኔ።

ኔኤም ማዻ፥ ኔ ማሊፆ ኬኤዛዞንሢና

ኔኤም ዱማዼዞንሢና ሱ’ንፆዋ ኔኤኮ ቦንቻዞንሢም

ዻኮ''ና ዼኤፖ ማዔዞንሢናም

ዔያታ ማዼሢ ዛሎ'' ማሂ ኔ ዒንጋንዳ ዎዳ''

ሓሣ ዓጮ'' ባይዜዞንሢያ ኔ ባይዛንዳ ዎዳ'' ሄሌ''ኔ» ጌዔኔ። ✝11፥18 ዓይኑ. 2፥5፤ 110፥5፤ 115፥13።

19 ዬካፓ ጫሪንጫ ዓኣ፥ ፆኦሲኮ ጌኤዦ ማኣራ ቡሊ''ንታዛ ጋሮይዳ ዒዛኮ ጫኣቁሞ ሳኣፂና ዓኣያ ማዒ ጴዼኔ፤ ዬማና ዜኤሊንሢ ዜኤሊንሤኔ፥ ዼኤፒ ዑኡሲ ዋይዚንቴኔ፥ ጉጉንሢያ ጉጉንሤኔ፥ ሳዓኣ ዓጊፄኔ፥ ዼኤፒ ሻቺያ ኬዴ''ኔ። ✝11፥19 ዮሓ. ፆፔዻ 8፥5፤ 16፥18፤ 21።