ዮሓኒሴም ፆኦሲ ፔጋሲ ዻዌ ባኮ 8

ቡሊ''ንቶፓ ጌይ ዓይሦና ላንካሳዞኮ ቡሊ''ንቲፆ

1 ማራዓሢ ቡሊ''ንቶፓ ጌይ ዓይሦና ላንካሳ፥ ባኬሎ ቡሌ'' ዎዶ''ና ጫሪንጫ ዋይዚንታ ባኣዚ'' ባኣያ ማዒ፥ ዻካ'' ዚቲዮ ጌዔኔ፤ 2 ዬካፓ ፆኦሲ ቤርታ ዔቃ፥ ላንካዎ ኪኢታንቾ ታ ዴንቄኔ፤ ዔያቶም ዒማ''ና ላንካይ ዛዬ ዒንጊንቴኔ።

3 ዑንጆ ጩቢሶያ ዎርቄና ኮሺ''ንቴ ሱሢ ኩንዔ ኩጫ ዔኬ፥ ኪኢታንቻ ሙካዖ ፆኦሲም ዒንጎ ባካ ዒንጊንታ ቤዞ ኮይላ'' ዔቃዛ ካኣቱሞ ዖይቶ ቤርታ ዓኣ፥ ዎርቆና ኮሺ''ንቴ ፆኦሲም ዒንጎ ባኮ ዒንጎ ቤዛ፥ ፆኦሲም ዱማዼ ዓሶኮ ሺኢጲፆና ዎላ'' ፆኦሲ ቤርቶ ሺኢሻንዳጉዲ ሚርጌ ዑንጄ ዒዛም ዒንጊንቴኔ። ✝8፥3 ዓሞ. 9፥1፤ ኬሲ. ማፃ 30፥1፤ 3። 4 ዑንጆኮ ጩባ'' ፆኦሲም ዱማዼ ዓሶኮ ሺኢጲፆና ዎላ'' ኪኢታንቻሢ ኩጫፓ ፆኦሲ ቤርቶ ኬስኬኔ። 5 ዬካፓ ኪኢታንቻሢ ጩቢሶ፥ ሱፆ ኩንዖ ዔኪ ፆኦሲም ዒንጎ ባኮ ዒንጎ ቤዛፓ ታሚ ካኣሺ ሱፆ ኩንዖይዳ ኩንሤስካፓ ሳዖ ባንሢ ኬኤራዛ ጉጉንሢና ዼኤፒ ዑኡሲና ሓሣ ዜኤሊንሢያ ዜኤሊንሤም ሳዓ ዓጊፄኔ። ✝8፥5 ሌዊ. ዓኬ 16፥12፤ ሂዚ. 10፥2፤ ኬሲ. ማፃ 19፥16፤ ዮሓ. ፆፔዻ 11፥19፤ 16፥18።

ኪኢታንቻ ዛያሢ ዋርቄሢ

6 ዬካፓ ላንካይ ዛዬ ኩጫ ዔኬ፥ ላንካይ ኪኢታንቾስኬንሢ ዛያሢ ዋርቃኒ ጊኢጊንቴኔ።

7 ቤርታሳ ኪኢታንቻሢ ዛያሢ ዋርቃዛ፥ ሱጉሢ ሲኢሪንቴ ሻቺና ታሚና ሳዓ ኬዴ''ኔ፤ ዬማና ዛላኮ ዛላ ጊንሢ ማዓ ሳዓ ሚጬኔ፤ ሚፆንታ ዓኣዔ ማኣቶንታኮዋ ዛላኮ ዛላ ማዓይ ቢያ ሚጬኔ። ✝8፥7 ኬሲ. ማፃ 9፥23-25፤ ሂዚ. 38፥22።

8 ሃሣ ላምዓሳ ኪኢታንቻሢ ዛያሢ ዋርቃዛ ታሚ ዔኤታ፥ ዼኤፒ ዹካ ማላ ባኣዚ'' ባዞ''ይዳ ኬዳ''ዛ ዛላኮ ዛላ ጊንሢ ማዓይ ቢያ ባዞ''ኮ ሱጉሢ ማዔኔ፤ 9 ባዞ''ይዳ ናንጋ፥ ሼምፓ ዓኣ ባኮኮ ዛላኮ ዛላ ማዓይ ቢያ ሓይቄኔ፤ ሃሣ ዋኣፆ ካኣሚሎኮዋ ዛላኮ ዛላ ጊንሢ ማዓይ ቢያ ፑርቲ ጋፔኔ።

10 ሃይሣሳ ኪኢታንቻሢ ዛያሢ ዋርቃዛ ፆምፔጉዲ ዔኤታ ዼኤፒ ዦኦጌ ጫሪንጫፓ ዎሮ ዋኣፆና ዓልቃ ዋኣፆናኮ ዛላኮ ዛላ ማዓ ጊንፆይዳ ኬዴ''ኔ። ✝8፥10 ዒሲ. 14፥12። 11 ዬያ ዦኦጋሢኮ ሱ’ንፃ «ዋላንጋ» ጌይንታያኬ፤ ዬያሮ ዋኣፆኮ ዛላኮ ዛላ ጊንሢ ማዓይ ቢያ ጫንቺ ማዔኔ፤ ዋኣፆኮ ጫንቂፆይዳፓ ዔቄያና ሚርጌ ዓሲ ሓይቄኔ። ✝8፥11 ዔር. 9፥15።

12 ዖይዳሳ ኪኢታንቻሢ ዛያሢ ዋርቃዛ ዓቦ''ንታ ዓጊኖንታ ዦኦጋሢንታኮ ዛላኮ ዛላ ጊንሢ ማዓይ ቢያ ዹይንቴኔ፤ ሮኦሮንታ ዒባኖንታኮ ዛላኮ ዛላ ማዓ ጊንፆይዳ ፖዒ ፖዑዋጉዲ ላኣጊንቴኔ። ✝8፥12 ዒሲ. 13፥10፤ ሂዚ. 32፥7፤ ዒዩ. 2፥10፤ 3፥15።

13 ዬካፓ ሃሣ ፔቴ'' ኮኦኬ ጫሪንጫ ባራናንቴ ታ ዴንቄኔ፤ ዬይ ዼኤፒ ዑኡሲና፦ «ዓቴ'' ሓይሦ ኪኢታንቾንሢ ዛያሢ ዋርቃዛ ዋይዚንታንዳ ዑኡዞ ዛሎ''ና ሳዖይዳ ናንጋ ዓሶም ባዴዔ! ባዴዔ! ባዴዔ!» ጋዓንቴ ታ ዋይዜኔ።