1 ዬካፓ ዓኪ ጫሪንቺና ዓኪ ሳዓና ታ ዛጌኔ፤ ዎይቲ ጌዔቴ ቤርታኣ ጫሪንጮና ቤርታኣ ሳዖና ባይቄሢሮኬ፤ ባዚ''ያ ባኣያ ማዔኔ። ✝21፥1 ዒሲ. 65፥17፤ 66፥22፤ 2ጴፂ. 3፥13። 2 ፆኦሲም ዱማዼ ካታሜላ፥ ዓኮ ዬሩሳላሜ ዓኒም ሎዓኒ ፓልሚ፥ ጊኢጊንቴያ ማዒ ፆኦሲ ኮይሎ ጫሪንጫፓ ኬዳ''ንቴ ታ ዛጌኔ፤ ✝21፥2 ዒሲ. 52፥1፤ 61፥10፤ ዮሓ. ፆፔዻ 3፥12። 3 ካኣቱሞ ዖይታ'' ዓኣ ቤዛፓ፦ «ፆኦሲኮ ዎይፆ ቤዛ ዓሶ ባኣካኬ፤ ዒዚያ ዔያቶና ዎላ'' ናንጋንዳኔ፤ ዔያታ ዒዛ ዓሲ ማዓንዳኔ፤ ፆኦሲ ፔ ቶኦኪና ዔያቶና ዎላ'' ማዓንዳኔ፤ ፆኦዛሢያ ዔያቶኮ ዒዛ ማዓንዳኔ፤ ✝21፥3 ሂዚ. 37፥27፤ ሌዊ. ዓኬ 26፥11-12። 4 ሓሣ ዓቢፆ ቢያ ዔያቶኮ ዓኣፓፓ ዒ ዑጫንዳኔ፤ ሓይቢ ማዔቴያ ዖዪሢ፥ ዬኤፒ ማዔቴያ ሜታ ማይ ዔያቶኮ ባኣሴ፤ ዓይጎሮ ጌዔቴ ቤርታኣ ባካ ቢያ ዓኣዼኔ» ዼኤፒ ዑኡሲና ጋዓንቴ ታ ዋይዜኔ። ✝21፥4 ዒሲ. 25፥8፤ 35፥10፤ 65፥19።

5 ዒማ''ና ካኣቱሞ ዖይቶይዳ ዴዔሢ፦ «ዓካሪ፥ ታ ቢያ ባኮ ዓካሳንዳኔ» ጌዔኔ፤ ዬካፓ ሃሣ፦ «ሓይ ቃኣላ'' ጉሙርቂንታያ፤ ጊንሣ ጎኔ ማዔሢሮ ፃኣፔ» ታኣም ጌዔኔ። 6 ሃሣ ዒዚ፦ «ዓካሪ ቢያ ባካ ጋፔኔ! ዔኤቢኮ ቢያ ዓርቃሢና ጋፒሳሢና ታናኬ፤ ዼኤቢንቴሢም ናንጎ ዋኣፆይዳፓ ጪጎ ባኣዚ'' ባኣንቴ፥ ጉሪ ታ ዒንጋንዳኔ፤ ✝21፥6 ዒሲ. 55፥1። 7 ዖሎና ባሼሢ ዬያ ቢያ ዴንቃንዳኔ፤ ታ ዒዛኮ ፆኦሲ ማዓንዳኔ፤ ዒ ታኣኮ ናዖ ማዓንዳኔ፤ ✝21፥7 2ሳሙ. 7፥14፤ ዓይኑ. 89፥26-27። 8 ጋዓንቴ ዒጊጫ ዓሳ፥ ጉሙርቁዋ ዓሳ፥ ዒኢቴያ ማዔ ፑርቶ ዓሳ፥ ዓሶ ዎዻ ዓሳ፥ ማቾ ሃሣ ዓኒ ማዒባኣያና ላሃ ዓሳ፥ ማርሾ ማርሻ ዓሳ፥ ሜሌ'' ፆኦዞ ካኣሽካ ዓሶንታ ሉኡቃ ዓሶንታኮ ቢያ ዔያታ ጌላንዳ ቤዛ ፂኢሊ'' ኬስኪ ዔኤታ ታሞ ባዞ''ይዳኬ፤ ዬይያ፦ ላምዓሳ ሓይቦ''ኬ» ታኣም ጌዔኔ።

9 ጋፒንሢ ማዔ፥ ባይዛ ባኮ ላንካዎንሢ ኩንሦና ላንካዎ ዑዦ ዓንጎ ዔኪ ዓኣ ላንካዎ ኪኢታንቾንሢዳፓ ፔቴ''ሢ ታ ኮይላ'' ሙካዖ፦ «ማራዓሢኮ ማቾ ማዓ፥ ዑኡቴሎ ታ ኔና ዻዋንዳኔ» ጌዔኔ። 10 ዓያና ጌኤሺ ማሊሢ ጋሮ ታኣኒ ጌሊ ዓኣንቴ ዒዚ ፔቴ''፥ ዼኤፒ ዹካ ታና ዔኪ ዓኣዻዖ ፆኦሲም ዱማዼ፥ ዬሩሳላሜ ካታሜላ ፆኦሲ ኮይሎ፥ ጫሪንጫፓ ኬዳ''ያ ታና ዻዌኔ፤ ✝21፥10 ሂዚ. 40፥2። 11 ፆኦሲኮ ቦንቻ ዒዞም ፖዓኔ፤ ዒዞኮ ፖዓ ሚርጌና ሚዛጳያ ማዔ፥ ዒያስጲዴ ጌይንታ ሹጮጉዲ ኮሺ'' ፖዓያ፤ ሃሣ ጌኤሺ ሌማሌኤሼጉዲ ፖዓያኬ፤ 12 ታጶ ላምዖ ጌሎ ካራ ዓኣ፥ ዼኤፒ ሃሣ ሹቺና ኬልቆና ዼ’ጌ ኬኤሌ'' ዲሢ ዒዞኮ ዓኣኔ፤ ዬኖ ታጶ ላምዖ ጌሎ ካሮ''ይዳ ታጶ ላምዖ ኪኢታንቻ ዔቂ ዓኣኔ፤ ዒኢካ ሃሣ ታጶ ላምዖ ዒስራዔኤሌ ፃጶ ሱ’ንፃ ፃኣፒንቲ ዓኣኔ። 13 ዓባ'' ኬስካ ዛሎ''ና ሃይሦ ካራ፥ ኬዶ'' ዛሎ''ና ሃይሦ፥ ዾኦሎ'' ዛሎ''ና ሃይሦ፥ ዓባ'' ጌላ ዛሎ''ናኣ ሃይሦ ካራ ዓኣኔ። ✝21፥13 ሂዚ. 48፥30-35። 14 ካታሜሎ ሹጮና ኬልቂ፥ ዲርቆና ዲፆኮ ዶዲሻኒ ዴማ'' ጌሢ ማዦና ታጶ ላምዖ ሹቺ ዓኣኔ፤ ዬያቶ ዑፆይዳ ማራዓሢ ማዾ''ም ዳኪንቴ፥ ታጶ ላምዖንሢኮ ሱ’ንፃ ፃኣፒንቲ ዓኣኔ፤ 15 ዒማ''ና ታኣና ጌስታ ኪኢታንቻሢ ካታሞንታ ካታሞኮ ጌሎ ካሮ''ንታ ሹጮና ኬልቂ ዲርቆና ዲፆዋ ዋርቆ፥ ዎርቄና ኮሺ''ንቴ ዖዶሲ ዓንጊ ኮኦሎ'' ዔኪ ዓኣኔ፤ ✝21፥15 ሂዚ. 40፥3። 16 ካታሜሎኮ ዖዱሱሞና ዳልጉሞና ዖይዶ ዛሎ''ና ቢያ ሄኮ ማዔያኬ፤ ኪኢታንቻሢያ ካታሜሎ ዬኖ ዓንጌሎና ዋርቃዛ ዒዞኮ ዖዶሱማ ታጶ ላምዖ ሺያ ሚራፔ *21፥16 ሚራፔ፦ ጌይፃ ሚናኣ ዎዶ''ና ዔኤቢኮ ዖዶሱሞንታ ዳልጉሞንታ ዔጲንታ ዋርቂ ዔሮያ ማዓዛ ፔቴ'' ሚራፔ' ፔቴ'' ፄኤታና ሳሊ''ታሚ'' ዶንጎ ታኣኪሢ ማዓያኬ። ማዔኔ፤ ዒዞኮ ዳልጉሞና ዔጶና ዬኖ ጎይፆ ማዔኔ፤ 17 ኪኢታንቻሢ ሹጮና ኬልቂ ዲርቆና ዲፆ ዋርቄኔ፤ ዋርቃዛ ዖዶሱማ ኪኢታንቻሢ ዋርቃ፥ ዔርቴ ዋርቆ ባኮና ፄኤታና ዖይዲታሚ'' ዖይዶ ዋዻ ማዔኔ። 18 ዬይ ኮሾ''ና ኬኤሎ'' ዲራ፥ ዒያስጲዴ ሹጮና ኮሾ''ናያኬ፤ ካታሜላ ሌማሌኤሼጉዴ ጌኤሺ ዎርቄና ማዦናያኬ፤ ✝21፥18 ዒሲ. 54፥11-12። 19 ካታሜሎኮ ኬኤሎ'' ዲፆ ዶዲሻንዳጉዲ ዴማ'' ጌሢ ማዦና ሹጫ ዱማ ዱማ ሹጮና ቢያ ማይሊ ጊኢጊሾናያኬ፤ ቤርታሲ ዒያሲጲዴ፥ ላምዓሶ ሴንፔሬ፥ ሃይሣሶ ኬልቂዶኔ፥ ዖይዳሶ ሜሬጊዴ፥ 20 ዶንጋሶ ሴርዴንክሴ፥ ላሃ''ሶ ሴርዲዮኔ፥ ላንካሶ ኪሪስቶሎቤ፥ ሳላ''ሶ ቢሬሌ፥ ታዞጳሶ ዌራዊሬ፥ ታጳሶ ኪሪስጲራሲሴ፥ ታጶ ፔታ''ሶ ያኪንቴ፥ ታጶ ላምዓሶ ዓሜቴስፂሮ ጌይንታ ሹጮ ጌሢ ማዢንቴያኬ። 21 ታጶ ላምዖ ካሮ''ይዳ ታጶ ላምዖ ሚዛጲ ሹቺ ዓኣኔ፤ ፔቴ'' ፔቴ'' ካራ'' ፔቴ'' ፔቴ'' ሚዛጲ ሹቺና ማዢንቴያኬ፤ ካታሜሎኮ ሳዞ'' ዼኤፖ ጎይፃ ሌማሌኤሼጉዲ ፖዓ፥ ጌኤሺ ዎርቄና ኮሾ''ናያኬ።

22 ቢያ ባኣዚ'' ዳንዳዓ ጎዳ ማዔ ፆኦዛሢና ማራዓሢና ዬኖ ካታሜሎኮ ጌኤዦ ማኣሮ ማዔሢሮ ካታሞይዳ ጌኤሺ ማኣሪ ታ ዴንቂባኣሴ። 23 ፆኦሲኮ ቦንቾ ፖዓ፥ ዒዞም ፖዓሢሮና ሓሣ ማራዓሢያ ዒዞኮ ፖዓሢ ማዔሢሮ ካታሜሎም ዓቢያ ማዖም ዓጊኒያ ፖዓንዳጉዲ ኮይሱዋሴ። ✝21፥23 ዒሲ. 60፥19-20። 24 ዴራ'' ዒዞ ፖዖና ሃንታንዳኔ፤ ሓሣ ዓጮ'' ካኣታ'' ፔኤኮ ዓኣ ባኮ ዒዞ ባንሢ ዔኪ ዬዓንዳኔ። ✝21፥24 ዒሲ. 60፥3። 25 ዒኢካ ዹሚ ባኣያታሢሮ ካታሜሎኮ ካራ'' ቢያ ዎዴ ዎዺንቱዋዖ ዴዓኔ። 26 ዴሮ''ኮ ዓኣ ባካ ቢያ ዒዞ ጋሮ ጌላንዳኔ፤ ✝21፥26 ዒሲ. 60፥11። 27 ፑርታ፥ ሻኣካ ባኣዚ'' ማዔያ ፔቴ''ታዖ ዒዞ ካታሜሎ ጌላዓኬ፤ ሃሣ ፔና ዒኢሳ ማዾ ማዻያና ሉኡቃ ዓሲ ፔቴ''ታዖ ዒኢካ ጌላዓኬ፤ ዒኢካ ጌላንዳዞንሢ ሱ’ንፃ ማራዓሢኮ ናንጎ ማፃኣፖይዳ ፃኣፒንቴዞንሢ ሌሊኬ። ✝21፥27 ዒሲ. 52፥1፤ ሂዚ. 44፥9።