Lucas 19

Yesu iyingila ku Yelusalemu kwa luheku

28 Yesu peamali kujova genago, akavalongolela kuhamba ku Yelusalemu. 29 Peavili papipi kuhika ku Betifage na ku Betania papipi na chitumbi cha mikongo ya Mizeituni, avatumili vavili va vawuliwa vaki, 30 na kuvajovela, "Muhamba muchijiji chechivii palongolo yinu, na pemwitumbula kuyingila muchijiji chenicho yati mulikolela mapapakasi wa punda akungiwi langatumbula kugega mundu. Muwopolayi, mubwela nalu apa. 31 Ngati mundu akuvakota, ndava kyani mukuliwopola lipunda? Mumjovela, ‘Bambu akumgana.’ "

32 Vevatumiwi vala vakahamba nakukolela ngati chavajoviwi na Yesu. 33 Pevawopolayi punda mpakakasi, vakolo lipunda vakavakota, "Ndava kyani mukuliwopola lipunda mpapakasi ili?"

34 Vakayangula, "Bambu akumgana." 35 Ndi vampelakili Yesu. Kangi vakatola nyula na kumuyambatisa punda mpapakasi panani na kumtamisa Yesu panani yaki. 36 Yesu ayendalili na lugendu kuni vandu vayendelela kumdandasila nyula zavi munjila.

37 Paavi papipi kuhika ku Yelusalemu paluhelelu lwa chitumbi cha mikongo ya Mizeituni, msambi woha wa vandu na vawuliwa vaki vatumbwili kumlulutila kwa lwami luvaha na kumlumba Chapanga ndava ya mambu gakulu goha gevagaweni, 38 vakajova, "Amotisiwa Nkosi mweibwela kwa uhotola wa Bambu! Uteke uvya kunani kwa Chapanga na Chapanga alumbiwa mweavi kunani!"

39 Vafalisayu vangi vevavili mu msambi wula wa vandu vakamjovela Yesu, "Muwula, vagunisa vawuliwa vaku!"

40 Yesu akavayangula, "Nikuvajovela, ngati venava vaguni, maganga haga yati giywanga."