1 Bambu Chapanga akajova na Musa kulugangatu lwa ku Sinai mumwehi wa kutumbula wa mwaka wa pili Vaisilaeli pevamali kuhuma ku Misili. Akajova, 2 "Uvahamula Vaisilaeli vaselebuka Pasaka mulukumbi lwelupangiwi. 3 Yeniyi yati yivya ligono la kumi na mcheche la mwehi uwu, lukumbi lwa kimii yati vikita chenicho kulandana na malagizu gaki goha." 4 Ndava yeniyo, Musa akavajovela vandu kuvya viganikiwa kuselebukila mselebuko wa Pasaka. 5 na vene vakakita chenicho Kulugangatu la ku Sinai lukumbi pelitumbula kutipama lilanga ligono la kumi na mcheche la mwehi wa kutumbula. Vaisilaeli vakakita kila chindu ngati Bambu Chapanga cheamulagizi Musa.

6 Nambu vangi pagati yavi vahotwili lepi kuselebukila Pasaka ligono lila ndava vavi vangayidakiliwa palongolo ya Chapanga ndava ya kupamisa mundu mweafwili. Ndava yeniyo vamahambili Musa na Aloni ligono lila lila, 7 vakamjovela Musa, "Tete tiyidakiwa lepi kuvya palongolo ya Bambu nda tipamisi higa ya mundu mweafwili, nambu ndava kyani tidivaliwa kumuwusila Bambu Chapanga luteta lwaki pamonga na Vaisilaeli vangi mulukumbi lweuhamuliwi?"

8 Musa akayangula, "Mlinda mbaka penapo penipata malagizu ndava yinu kuhuma kwa Bambu Chapanga."

9 Ndi Bambu Chapanga akamjovela musa, 10 uvajovela Vaisilaeli, "Lukumbi mmonga winu amala viveleku vinu akavya angayidakiliwa palongolo ya Chapanga ndava ya kupamisa mundu mwefwili amala vavi mulugendu, hati naha vihotola kuselebuka Pasaka ya Bambu Chapanga. 11 Yati mwiselebuka lukumbi lwa kutipama lilanga ligono la kumi na mcheche la mwehi wa pili. Yati vilya mwanalimbelele, pamonga na libumunda langasopewa ngemeku, na likolo livavanu. 12 Vakoto kusigalisa chakulya chochoha mbaka lukela, wala vakotoka kudenya hati lihupa limonga la hinyama. Yati viselebukila mselebuko wenuwu wa Pasaka kulandana na malagizu gaki goha. 13 Nambu mundu yeyoha mweanyambili amala avii lepi mulugendu, na akakotoka kuselebukila Pasaka, yati ibaguwliwa na vandu vangu ndava muni anipeli lepi luteta kwa lukumbi lwelupangiwi. Ndi yikumgana abuniwa ndava ya kumbudila Chapanga uku."

14 "Ngati na kuvii myehe mweitama pamonga na nyenye igana kuselebukila mselebuko wa Pasaka, mundu mwenuyo iganikiwa akita chenicho kuwanangana na malagizu goha ga Pasaka. Kila mundu yati ilanda malagizu galagala, akavya myehe amala mkolonjinji."

15 Ligono Lindanda la kukonganekela pelahimikwi, lihundi lahelilili na kugubika Lindanda lenilo. Lukumbi lwa kilu lihundi lenilo lawonikini ngati motu mbaka lukela. 16 Chenicho ndi chayavili kila ligono, lihundi lagubiki Lindanda muhi, na kilu lawonikini ngati motu. 17 Lukumbi lwoha lihundi palayinuliwi kunani ya Lindanda, Vaisilaeli vadenyili kambi na kujenga kavili pandu lihundi lenilo pelatulili. 18 Vagendili kwa malagizu ga Chapanga, na kutama kavili pa Lindanda kwa maalagizu gaki. Lukumbi lwoha lihundi pelavili kunani ya Lindanda, vandu vatamili palikambi lenilo. 19 Hati ngati lihundi lenilo latamili kunani ya Lindanda kwa lukumbi lwa magono gamahele, Vaisilaeli vamyidikili Chapanga, vene vawukili lepi. 20 Lukumbi lungi, lihundi lenilo latamili panani ya Lindanda kwa lukumbi lwa magono gadebe ndu, nambu lukumbi lwoha Vaisilaeli vasigalili pakambi, na vahamili pala ndu Chapanga peaganili vahama. 21 Lukumbi lungi, lihundi latamili kunani ya Lindanda kutumbula kimii mbaka lukela ndu na mala ndu pelayinuliwi, mewa vandu venavo vawukili. Na ngati litamili kunani ya Lindanda muhi woha na kilu yoha, vene vawukili ndu lihundi pelayinuliwi. 22 Yikavya lihundi latamili panani ya Lindanda magono gavili amala mwehi amala mwaka, lukumbi lwoha lihundi lenilo pelavili kunani ya Lindanda, Vaisilaeli vahamili lepi, nambu pelayinuliwi, na vene mewa vahamili. 23 Kwa lilagizu la Bambu Chapanga vatamili, na kwa lilagizu la Bambu Chapanga vawukili, Vayidakili mihilu ya Bambu Chapanga kulandana malagizu gaki kupitila Musa.