1 Bambu Chapanga amjovili Musa na Aloni, 2 Uvavalanga Vakohati vevavi pandu pa lukolo lwa Valawi, kulandana na vandu va munyumba zavi na lukolo zavi, 3 yati ukuvayandakisa vagosi voha vevavi na ntanga ya miaka selasini mbaka hamusini vevihotola kuhengela mu Lindanda la kukonganekela ndava Chapanga. 4 Lenili ndi lihengu la Vakohati pa Lindanda la kukonganekela ndava ya Chapanga, yati viyangalila vindu vyevivi vya Msopi neju.

5 Lukumbi lwa kuhamisa likambi, Aloni na vana vaki yati viyingila mu Lindanda, na kuhelesa lipazia lelivi palongolo ya lisanduku la lilaganu, kangi valigubika lisanduku kwa lipazia lenilo. 6 Panani yaki yati vivika chigubiku cha chikumba nyililili cha chinyama cha munyanja, kangi yati vidandasa chitambala cha langi ya buluu chachivi bwina. Kangi yati viyingisa mikongo ya kugegela lisanduku lenilo.

7 Panani ya meza ya kuvikila mabumunda gegivikiwa palongolo ya Bambu Chapanga yati vidandasa chitambala cha buluu chene panani yaki yati vivika nkele na vimbani vya ubani, nkeve na ndeve, ndava ya kuwusila luteta lwa mnyweso. Lukumbi lwoha yati kwiva na libumunda panani ya meza. 8 Kangi, yati vigubika vindu vyenivi vyoha kwa chitambala chidung'u, na pananai yaki vivika chigubiku cha chikumba nyilili cha chinyama cha munyanja. Ndi yati viyingisa mikamulilu pandu paki.

9 Yati vitola chitambala cha buluu na kugubika chindu cha kuvikila hahi na hahi zaki, mikasi, lisiniyal aki na vindu vyoha vyevihengeka kuvikila mahuta. 10 Yati vivika pamonga na vindu vyaki vyoha mugati chikumba nyililili cha chinyama chamunyanja na kuvivika pandu pa kuvitolela.

11 "Kangi yati vidandasa chitambala cha buluu panani ya meza ya dhahabu na kuigubika kwa chikumba nyililili cha chinyama cha munyanja panani yaki. Ndi yati viyingisa mikongo ya kugegela pandu paki. 12 Yati vitola vindu vyoha vyevihengeka pa Lindanda la kukonganekela, yati vikunga kwa chitambala cha buluu na kugubika kwa chikumba nyililili cha chinyama cha munyanja, kangi yati vivika panani ya mikongo ya kugegela. 13 Yati viwusa malyenge kuhuma mumeza ya shaba na panani yaki yati vidandasa chitambala cha zambalau. 14 Panani yaki vivika vindu vyoha vyevihengeka kwa kumuyupila Chapanga papandu pa kuwusila teta, lumbani, hindu vya kuwusila motu na sepetu yeyinaminu na mikamulilu na nkele. Kangi, panani yaki yati vidandasa chigubiku cha chikumba nyililili cha chinyama cha munyanja chechikemiwa Pomboo na kuiyingisa mikongo ya kuligegela pandu paki. 15 Aloni na vana vaki pevimala kugubika vindu Vya Msopi pamonga na vindu vyaki vyoha, lukumbi ndu vandu pevivya vajitendekihi ndava ya lugendu, vandu va lukolo lwa Kohati yati vibwela na kuvigega. Nambu vene, viyidakiliwa lepi kupamisa njee vindu vyenivyo vya Msopi, vakotoka kufwa. Yeniyo ndi lihengu la lukolo wa Kohati kila lukumbi Lindanda la kukonganekela ndava ya Bambu. 16 Eleazali mwana wa Aloni mweavi mteta wa Chapanga yikumgana kuyunga mahuta ga zeituni ndava ya hahi, ubani wa kunungalila, luteta za mabenu za kila ligono, mahuta ga kunyambisa muni kuvika usopi na vindu vyoha vyevibaguliwi ndava ya Bambu mu Lindanda lenilo."

17 Kangi Bambu Chapanga amjovili Musa na Aloni, 18 "Mkotoka kuleka vandu va lukolo lwa Vakohati vakomiwa pagati ya Valawi. 19 Muni vahotola kulama vakotoka kufwa pevihegelela vindu vya Msopi neju, uvakitila naha, Aloni na vana vaki yati vihamba pandu pa Msopi na kumgavila kila mundu lihengu laki, ndi kyani yati igega. 20 Nambu vachiveleku va Kohati katu yati viyingila lepi kuvilola vindu vyenivyo vya Msopi neju, vakakita chenicho ndi vifwa."

21 Bambu Chapanga amjovili Musa, 22 Uvavalanga vandu va lukolo lwa Gelishoni, kulandana vandu va munyumba zavi na lukolo lwavi 23 Uvavalanga vagosi voha vevavi na ntanga ya pagati ya miyaka selasini mbaka hamusini vevihotola kuhenge lihengu mu Lindanda kukonganekela. 24 Lihengu lavi yati livya ili, Yati vigega mapazia ga Lindanda la kukonganekela pamonga na 25 chigubiku chaki, chigubiku cha chikumba nyilili cha chinyama chechitama munyanja chechikemiwa Pomboo, lipazia la limlyangu, 26 mapazia ga luvanja lwelutindila pandu pa kuwusila teta na Lindanda la Msopi, mapazia ga limlyangu la kuyingilila na nyosi na pamonga na vindu vyoha vyevihengeka kulijenga Lindanda lenilo. Vene yati vikita mambu goha gegivala vindu ivi. 27 Aloni na vana vaki vamteta va Chapanga ndi vevilagiza mahengu goha ga Vagelishoni kuvala vindu vyevigega na mahengu gevihenga. Yati ukuvapangila vindu vyoha vila vyeviganikiwa kugega. 28 Lenili ndi lihengu la lukolo lwa Gelishoni pa Lindanda la kukonganekela, yati vikita lihengu kwa ulongosi wa Isamali mwana wa Aloni mweavi mteta wa Chapanga.

29 Kangi, Bambu Chapanga akamujovela Musa"Mewawa, yati uvavalanga Vamelali, kulandana na vandu va munyumba zavi na ukolo lwavi. 30 Yati ukuvavalanga vagosi voha vevavi na ntanga ya miyaka selasini mbaka hamusini, veviganikiwa kuhengela mu pa Lindanda la kukonganekela ndava ya Chapanga. 31 Vene, yati vivya na lihengu la kugega felemu, mbagalu na mapanda na vitamilu vya Lindanda la kukonganekela. 32 Mapanda ga luvanja weutindila pandi zoha za Lindanda na vitamilu vyaki na vikongwani vya Lindanda na nyosi pamonga na vindu vyaki vyoha na kila chindu chechivala mahengu gaki. Kila mundu mjovela vindu vila vyeiganikiwa kugega. 33 Yeniyi ndi yati yivya lihengu la lukolo lwa Melali mulihengu lavi loha ku Lindanda la kukonganekela ndava ya Chapanga, kwa ulongosi wa Isamari mwana wa mteta wa Chapanga Aloni."

34 Hinu, Musa na Aloni na vilongosi va vandu voha vakavavalanga vandu va lukolo lwa Kohati, kulandana na lukolo zavi na vandu va munyumba zavi, 35 vakavayandikisa vandu voha vevavi na ntanga ya miyaka selasini mbaka hamusini, kila mweaganikiwi kuhengela mu Lindanda la kukonganekela ndava ya Bambu. 36 Mvalangu wavi kulandana na lukolo lwavi yavili vandu elufu zivili na miya saba hamusini. 37 Venava ndi vandu va lukolo lwa Kohati, vevahengili pa Lindanda la kukonganekela ndava ya Chapanga, vevavalangiwi na Musa na Aloni ngati Bambu Chapanga cheamlagizi Musa. 38 Mvalangu wa vandu va lukolo lwa Gelishoni kulandana na lukolo zavi na vandu va munyumba zavi, 39 vevavi na ntanga ya miaka selasini mbaka hamusini, vevaganikiwi kuhenga pa Lindanda la kukonganekela ndava ya Bambu, 40 vevavalangiwi vavi vandu elufu zivili miya sita na selasini. 41 Chenichi ndi cheyavili mvalangu wa vandu va lukolo lwa Gelishoni voha vevahengili ku Lindanda la mngonganu, vala Musa na Aloni vavalangi ngati Bambu Chapanga cheavalagizi. 42 vandu voha vevavalangiwi va lukolo lwa Melali kulandana na lukolo zavi na vandu va nyumba zavi 43 vevavi na ntanga ya miyaka selasini mbaka hamusini, vevaganikiwi kuhenga pa Lindanda la kukonganekela ndava ya Bambu, 44 yavili vandu elufu zidatu na miya zivili. 45 Wenuwu ndi mvalangu wa vandu va lukolo lwa Melali vevavalangiwi na Musa na Aloni ngati Bambu Chapanga cheamlagizi Musa. 46 Ndi, Valawi voha vayandikiswi na Musa na Aloni na vachilongosi va vandu va munyumba zavi, kwa kulanda na lukolo zavi na vandu va munyumba zavi, 47 vagosi voha vevavii na ntanga ya miyaka selasini mbaka hamusini, vevabwelili kuhenga lihengu mu Lindanda la kukonganekela na kuligega Lindanda lenilo, 48 vandu voha vevavalangiwi vavi vandu elufu nane miya mhanu na semanini.

49 Kila mmonga apewili lihengu lakukita na ajoviwi chindu cha kugega, chenicho ndi chevavalangiwi ngati Bambu Chapanga cheamlagazili Musa.