1 Kilu yila vandu voha va Isilaeli vakavembeneka kwa lwami luvaha. 2 Vamvembenikili Musa na Aloni vakajova, "Nga yivii mbanga ngatifwilili ku mlima wa Misili! Amala palungatu ulu. 3 Ndava kyani Bambu Chapanga akutileta pamulima uwu? Yati vakutikoma kungondo, vadala vitu na vana vitu yati vikamuliwa kungondo! Wu, mbanga lepi tiwuya ku Misili?" 4 Hinu vakajovesana vene, "Hinu timuhagula chilongosi yungi, tiwuyayi ku Misili."

5 Penapo ndi Musa na Aloni vakafugama palongolo ya Vaisilaeli voha. 6 Yoshua, mwana wa Nuni na Kalebu mwana wa Yefune vevavi pamonga na vandu vala vevahambali kuying'omesa ndima yila vakapapula nyula zavi zevawalili, 7 na kuvajovela Vaisilaeli voha, "Ndima yetihamba kuying'omesa yabwina neju. 8 Ngati Bambu Chapanga iganiswa na tete, yati akutipeleka kwenuko na kutipela mulima wula wabwina kwa kugaba na kudimila mifuya. 9 Ndi mkoto kumbudila Chapanga mewa mkoto kuvayogopa vandu va mulima wenuwo. Muni yati tikuvahotala, vachapanga vavi vevakuvayunga vamali kuavaleka, nambu Chapanga avii pamonga na tete, mkoto kuyogopa. 10 Nambu vandu voha vaamwili kuvatova kwa maganga. lulanga lukahumila chighafula panani ya Lindanda la kukonganekela palongolo ya Vaisilaeli voha."

11 Kangi Bambu Chapanga akamjovela Musa, "Ava vandu yati vakunivevesa mbaka ndali? Yati vibela kunisadika mbaka ndali, hati pamonga kuvya nihengili gachinamtiti pagati yavi. 12 Yati nikuvatova vene kwa matamu gahakahu na kuvayongomesa. Nambu veve yati nikukita kuvya mulima uvaha kuliku vene na kuvya na makakala kuliku vene."

13 Nambu Musa akamjovela Bambu Chapanga, "Wavawusili vandu ava kuhuma pamulima wa Misili kwa makakala gaku. Vamisili peviyuwana kuvya uvahengili genago vandu vaku, 14 yati vakuvajovela vakolonjinji va mulima uwu. Vandu ava vamali kuyuwana kukuva veve, Bambu, uvi pamonga na tete, kangi Bambu ulolikini hotohoto lihundi laku peliyima panani. yitu, na veve ukutilongolela muhi kwa lipanda ya lihundi na kilu kwa lipanda ya lihundi la motu, 15 Hinu ngati uvakomili vandu ava kwa mala monga, milima yeyiyuwini ulumba wa mambu gaku kukuvala veve yati vijova, 16 ‘Bambu mwene nakuhotola kuvapeleka vandu ava kumulima weavalagili kwa chilapu, ndi avakomili kulugangatu.’ 17 Hinu chondi nikuyupa, veve Bambu Chapanga, utilangisa uhotola waku kwa kuhenga ngati chila chewatilagazili pewajovili. 18 ‘Nene Bambu Chapanga nangali ligoga la kanyata, ndi mweavii na uganu na mweilekekesa mabudilu. Nambu ileka lepi kuvabuna vevahokili, akuvabuna vana ndava ya mabudilu ga vadadi vavi hati chiveleku cha datu na cha mcheche.’ 19 Chondi nikukuyupa uvalekekesa mabuidilu ga vandu ava, kuwanangana na uganu waku wangali mwishu ngati chila chewavalekekisi kutumbula pavahuma ku Misili mbaka hinu."

20 Bambu akayangula, "Nivalekekekisi ngati cheuniyupili. 21 Nambu chachakaka, ngati cheniyendelela kuvya, na ngati mulima woha chewimema ukulu wangu, 22 kawaka hati mmonga mwisigalila, vandu venava vauwene ukulu wangu na gachinamtiti yenakili ku Misili kula nayanakitili kulugangatu, nambu vayendalili kunilinga kubela kuyidakila, 23 yati viyingila lepi pamulima wenapili kuvapela vagogo vavi. Kawaka hati mmonga wavi vevanivevisi mwakuyiwona. 24 Nambu ndava mtumisi wangu Kalebu ana mtima wungi na akunilanda kwa mtima woha, yati nikumuyingisa mumlima wevihamba na chiveleku chaki yati vitalalila. 25 Ndava muni Vaamaleki na Vakanani vevitama ku makemba ga mulima wenuwo, chilau mun'ganamuka muhamba kulugangatu mbaka ku nyanja ya Shamu."

26 Kangi Bambu Chapanga akavakota Musa na Aloni, 27 "Msambi uwu wa vandu vahakau yati viyendelela kunivembenekela mbaka ndali? Nitotokili kuyuwanila kuvembeneka kwa Vaisilaeli ndava yangu! 28 Hinu uvayangula aga, ‘Ngati chenitama, nijova nene Bambu Chapanga, yati nikuvahengela galagala geniyuwini mukugajova. 29 Kila mmonga winu mweavi na ntanga ya miyaka ishilini amala neju na mweavembeneki ndava yangu, higa zinu yati yitagwa palugangatu ulu, 30 Kawaka hati mmonga winu mweiyingili pamulima wenilapili kuvya uvya winu, nga Kalebu mwana wa Yefune na Yoshua mwana wa Nuni ndu ndi veviyingila. 31 Nambu vana vinu ndi mwmwajovili kuvya yati vikamuliwa kungondo, yati nikuvapeleka na kuvavika kwenuko muni vasangalukila mulima wula mwemwaubelili nyenye. 32 Nyenye yati mwifwa mumumu mulugangatu. 33 Vana vinu ya vilyungalyunga na kung'aika kulugangatu lwenulu kwa miyaka alobaini, ndava ya kubela kusadika kwinu mbaka mundu winu wa mwishu peifwilila kulugangatu. 34 Ndava ya kubuda kwinu, yati mwing'aika kwa miyaka alobaini, kuwanangana na magono gala alobaini gemwahengili kuun'gomesa mulima wula, mwaka umonga kwa kila ligono limonga, yati mwimanya kuvya mniyomisi. 35 Nene Bambu Chapanga, chakaka yati nikuvahengela nyenye genago mwavoha mwemkonganiki penapa kunibela mwavoha yati mwifwilila mumu mulugagatu.’ "

36 Kangi vandu voha Musa veavatumili kuhamba kuung'omesa mulima wula vavawuyili na kuvakita vandu vamng'ung'utila Bambu kwa kujova malovi gahakahuu kuuvala mulima wula, 37 vandu vala vevaletili malovi ga uhakau kuuvala mulima wula, vatoviwi kwa utamu na kufwa palongolo ya Bambu. 38 Nambu Yoshua mwana wa Nuni na Kalebu mwana wa Yefune, vene ndu ndi vevasigalili pagati ya vandu vala vevahambili kuung'omesa mulima wula.

39 Musa peavajovili Vaisilaeli voha vene vakavembeneka kwa mvinisu wamahele. 40 Chilau yaki, vayumwiki lukela pehe vakahamba kuvitumbi, vakajova, "Tiyidakila kuvya tambudili Bambu."

41 Nambu Musa akajova, "Ndava kyani mwangayidakila mihilu ya Bambu Chapanga? Lijambu lenili yati lihotoleka lepi! 42 Mkotoka kuhamba kuvitumbi ndava muni Bambu Chapanga avi lepi na nyenye. Yati mukuvahotola lepi makoko vinu, 43 Mukatovana navu Vaamaleki na Vakanaani, yati mwifwila kungondo, ndava muni mulekili kumlanda Bambu Chapanga, mwene yati ivya lepi pamonga na nyenye."

44 Pamonga na ago, kwa ndindani yavi vakakwela kuhamba mulima wa vitumbi, nambu Musa awukili lepi pamonga na Lisanduku la Lilaganu la Bambu Chapanga lapelikwi lepi. 45 Kangi Vaamaleki na Vakanaani, vevatamayi kumulima wenuwo wa vidunda, vakahelela vakavazangila na kuvahotola. Vakavavingisana mbaka kumuji wa Holima.