1 Bambu Chapanga ayendalili kuvajovela Musa na Aloni, 2 Mihilu yenikuvapela nene Bambu Chapanga yigana naha. Vajovela Vaisilaeli vavaletela ng'ombi yidala yidung'u mwangali chilema amala livamba loloha, na yula mweangahenga lihengu loloha. 3 Nyenye yati mukumpela mteta Eliazali ng'ombi yeniyo. Yati iwusiwa kuvala ya kambi na kuhijwa palongolo ya mwenuyo mteta wa Chapanga. 4 Kangi mteta Eliazali yati itola ngasi na kunyunyusila kwa lung'onji lwaki mala saba, kuyelekela upandi wa kulongolo wa Lindanda la kukonganekela. 5 Ng'ombi yeniyo yati yitinyiswa yoha kwa motu palongolo ya Mteta wa Chapanga. Vindu vyaki vyoha yati vitinyiswa, chikumba na ngasi na nyama na matumbu gaki. 6 Kangi Mteta wa Chapanga yati itola sagala za mkongo wa mwelezi na husopo na nyuzi yidungu za manyoya ga limbelele na kuvivika pamotu wenuwo. 7 Pegimalika genago, ndi yikumgana Mteta mwenuyo kuchapa nyula zaki na kusamba higa, kangi ndi ihotola kuwuya pakambi, nambu yati ivya iyidakiliwa lepi na Bambu mbaka kimii. 8 Mundu mweakuyiyocha ng'ombi yula mewa yikumgana kuchapa nyula zaki na kusamba higa yaki, mewa mwene yati ivya angaganikiwa na Bambu mbaka kimii. 9 Mundu mweiyidakiliwa na Bambu ndi yati iyola malyenge ga ng'ombi yeniyo na kugapeleka pandu pepabaguliwi kuvala ya kambi yati givikiwa na kutumiwa na vandu voha va Isilaeli kutengenezela manji ga kuwusa kubela kuyidakiliwa kwavi, muni kuwusa kumbudila Chapanga. 10 Mundu yula mweiyola malyenge yikumgana kuchapa nyula zaki, na mwene mewa yati ivya mweangaganikiwa nmukuyupa mbaka kimii. Lilagizu lenili ndi la magono goha ndi yati likuvavala Vaisilaeli na vandu vayehe vevitama pamonga nawu.

11 "Mundu akapamisa higa ya mundu yeyoha mweafwili yati ivya angayidakiliwa kwa kuyupa mu magono saba. 12 Ndi yikumgana ajinyambisa mwene kwa manji ga unyambiso paligono la datu na ligono la saba ndi yati iyidakiliwa mu kuyupa. Nambu ngati ajinyambisi lepi mwene paligono la datu na la saba ndi yati iyendelela kube kuyidakiliwa mukuyupa. 13 Mweipamisa higa ya mundu mweafwili ngati ajinyambisi lepi ndi ikita Bambu Chapanga alibela Lindanda lenilo, mwene mewa yati ibaguliwa na vandu va Isilaeli. Mundu mwenuyo yati iyendalela kubela kuyidakiliwa mu kuyupa muni ayitaliwi lepi manji ga unyambiso."

14 "Wenuwu ndi muhilu kuvala mundu mweafwili mu Lindanda, mundu yeyoha mweiyingila mugati ya Lindanda lenilo, amala mweavi mugati ya Lindanda lenilo, yati ivya mweangayidakiliwa mu kuyupa kwa magono saba. 15 Chombo chochoha changagubikwa yati chivya changayidakiliwa. 16 Mundu yeyoha akapamisa higa ya mundu mweakomiwi amala mweafwili lifwa la uyovalela kumgunda, amala mundu yoyoha akapamisa lihupa la mundu mwafwili amala litinda yati ivya mweangayidakiliwa mu kuyupa kwa magono saba."

17 "Ndava ya kuwusa uko kubelelewa mu kuyupa, yati vitola malyenge ga teta wa unyambiso wa kumbudila Chapanga gegatinyiswi, malyenge ago yati gihangisanwa na manji ga mfuleni muchiviga. 18 Kangi mundu mweiyidakiliwa mu kuyupa yati itola husopo, ndi yati ijwiga mumanji ago, kangi yati inyunyusila Lindanda na vindu vyoha vyevivili mugati ya Lindanda na vandu vevavi mugati. Yati akumnyunyusila mewa yula mweapamisi lihupa la mundu amala higa ya mundu mweakomiwi amala mweafwili lifwa la uyovela amala mweapamisi litinda. 19 Paligono la datu na saba, mundu mweiyidakiliwa mu kuyupa yati akumnyunyusila manji ago mundu yula mweangayidakiliwa mu kuyupa, paligono la saba yati akumnyambisa mundu mwenuyo, namwene yati ichapa nyula zaki na kusamba ndi kimii yati ivya ayidakiliwi mu kuyupa."

20 Nambu yikavyayi mundu angayidakiliwa mu kuyupa akabelayi kujinyambisa yati ibelalewa na vandu voha, muni akulikita Lindanda la Bambu Chapanga likotoka kuyidakiliwa. Ndava muni anganyunyusiwa manji ga unyambiso mwene ndi mweangayidakiliwa mu kuyupa. 21 Genaga ndi malagizu ga magono goha kwavi, "Mundu yeyoha yula mweinyunyusila gala manji ga unyambiso iganikiwa mewa kuchapa nyula zaki, na yoyoha yula mweipamisa manji ago na mwene yati ivya angayidakiliwa mu kuyupa mbaka chimihi. 22 Chindu chocho cheipamisa mundu mweangayidakiliwa mu kuyupa yati chivya changayidakiliwa mewa yoyoha mweipamisa ivya mweangayidakiliwa mu kuyupa mbaka kimii."