1 Bambu Chapanga amjovili Musa, 2 "Valagiza Vaisilaeli vamuwusa kuvala ya kambi kila mundu mweavi na utamu wa higa weuyambukisa na kila mundu mweiwusa mahila, na kila mwangayidakiwa na kumfugamila Chapanga ndava ya kupamisa mtuhi wamundu. 3 Yati mukuvawusa kuvala ya kambi vandu voha, vagosi kwa vadala, muni vakotoka kukita kambi yavi yikoto kuyidakiwa muni nene nitama mwenumo." 4 Vaisilaeli vakitili chenicho, vakavavinga kuvala ya kambi. Vakakita ngati Bambu Chapanga cheamjovili Musa.

5 Kangi Bambu Chapanga amjovili Musa, 6 "Uvajovela Vaisilaeli kuvya, mundu yeyoha mgosi amala mdala akambudila myaki kwa loloha, na akavya angasadikika kwa Bambu Chapanga, mundu mwenuyo ivya anihokili nene. 7 Mundu mwenuyo yikumgana ayidakila kubuda kwaki kweabudili. Yikumgana alipiswa kulandana na kubuda kwaki, kuni ayongesa yimonga pagati ya muhanu, yati akumpela yeniyo yula mweambudili. 8 Nambu ngati mundu mwenuyo afwili na angali mlongo wa papipi mweihotola kupokela malipu genago, ndi malipu yati givya ga Bambu Chapanga ndava ya vamteta, malipu genaga ndi pamoga na limbelele ligosi lelikitiwa kuvya utepulanisi ndava ya kubuda kwaki. 9 Mawusilu goha geviwusa Vaisilaeli kwa Bambu yati chivya cha vamteta. 10 Chindu chochoha cha mundu chechiwusiwi kwa Bambu na kupelekwa kwa mteta yati chivya cha mteta."

11 Bambu Chapanga amjovili Musa, 12 uvajovela Vaisilaeli, ngati mdala wa mundu yoyoha akitii gangaganikiwa na msadikika lepi kwa mgosi waki, 13 akagona na mundu yungi changali mgosi amala mundu yungi kumanya, ajihakisi hati ngati kawaka mundu mweavawene. 14 Ngati mugosi akavya na wihu kwa mdala waki na ngati akumuholalela gahakahu mdala waki na igana kumanya ngati ahakiswi amala lepi, 15 mgosi iganikiwa amupeleka mdala waki kwa mteta wa Chapanga na kupeleka luteta lweluganikiwa, ndi pandu pa kumi pa uhembe wa shayili, nambu changali kusopa mahuta amala ubani, ndava muni luteta lwa uhembe lwa mugosi mweakumuholalela gahakahu mdala waki, luteta lweluwusiwa ndava ya kumanyisa kuvya mdala abudili amala lepi.

16 Mteta wa Chapanga yati akumleta mdala mwenuyo, na kumyimika papipi na pandu pa kuwusila teta. 17 Kangi, isopa manji ga Msopi muchombo cha ludaka na kutola lububu kuhuma pahi pepakilimwi pa Lindanda la Msopi na kusopa mumanji ago muni kugakita gavya gavavanu. 18 Peimala mteta wa Chapanga mwenuyo kumyimika mdala papipi ya pandu pa kuwusila teta, yati akugawopola mayunju ga mdala mwenuyo na kumpela luteta lwa ukumbuso mumawoko gaki, luteta ulu lwa mabenu ndava ya wihu, kuni mteta wa Chapanga mwene akamulili manji gala gavavanu gegileta likoto. 19 Ndi mteta wa Chapanga yati akumlapakisa mdala mwenuyo ijova, "Ngati ugonili lepi na mgosi yungi, na kujihakasa kuni wakona ugegiwi, hinu, yati wipata lepi likoto leliletwa na manji ago gavavanu. 20 Nambu ngati uhokili kuni ugegiwi, ujihakisi kwa kugona na mgosi yungi mweangavya mgosi waku, 21 Bambu Chapanga na akubunayi hati uvya likoto na vandu vaku vakupela likoto na kukubela, uvya ngaveleka na lutumbu lwaku lwinyala. 22 Manji ago gegileta likoto ndi gayingila mulutumbu lwako na kukukita uvya ngaveleka na lutumbu lwaku lunyalili.

Na mdala mwene yati iyidakila, ‘Ena, ena.’ "

23 "Kangi Mteta wa Chapanga yati iyandika likoto lenilo muchitabu chechitenganizwi kwa chikumba na kujihungulisi mumanji gavavanu, 24 Mteta wa Chapanga yati akumnywisa mdala yula manji gavavanu gegileta likoto, na manji ago yati gakumyingila na kumkita avya na uvinisu neju mulutumbu. 25 kangi mteta wa Chapanga yati itola luteta lula lwa uhembe wa wihu mumawoko ga mdala mwenuyo na kuyiyinula palongolo ya Bambu Chapanga, na kuyipeleka papandu pa kuwusila teta. 26 Kangi mteta wa Chapanga yati ihapula luteta lwa uhembe kumema chiwoko kuvya luteta lwa ukumbuso na kuyitinyisa panani ya pandu pa kuwusila teta, peimala genago yati akumjovela mdala yula, anywa manji gala. 27 Akamala kunywa, ngati ajihakasi na avi lepi msadikika kwa mngana waki, manji gala gegileta likoto yati gakumletela mvinisu neju, lutumbu lwaki yati lwinyala na kuvya ngaveleka. Na vandu voha yati vimanya kuvya mdala mwenuyo apewi likoto. 28 Nambu ngati mdala yula ajihakisi lepi na ahokili lepi, ivya lepi na likoto na ihotola kuveleka vana."

29 "Hinu, wenuwu ndi muhilu kuvala wihu, mdala peihoka na kujihakasa kuni akona agegiwi, peiwuka na kujipela uhakahu. 30 amala maholo ga wihu pegakumbwelela mgosi ndava ya kuuholalela mdala waki gahakahu. Mteta wa Bambu Chapanga yati akumkita mdala mwenuyo kuyima palongolo ya Bambu na kuhengela muhilu uwu woha kwa mdala mwenyo. 31 Mgosi waki yati ihoka lepi chochoa, nambu mdala yati ihamuliwa ndava ya kuhoka kwaki."