1 Nkosi mmonga Mkanaani wa Aladi mweatamayi ku Negebu peayuwini kuvya Vaisilaeli vibwela kwa njila ya Athalimu, ahambili kuvazangila, na kuvakamula vangi vavi. 2 Penapo, Vaisilaeli vakungili chilapu na Bambu Chapanga kujova, "Ngati yati ukutikita tete tivahotola vandu ava, yati tikuyiyongomesa njwe miji yavi." 3 Bambu Chapanga ayuwini luyupu lwa Vaisilaeli, na mwene akavakita vavahotola Vakanaani. Vaisilaeli vavayongomisi njwe Vakanaani pamonga na miji yavi. Ndava yeniyo pandu penapo pakemeliwi Holima.

4 Vaisilaeli vatumbwili lugendu kuhuma kuchitumbi cha Holi kupitila njila yeyihamba nyanja ya Shamu, kutindila Edomu. Nambu munjila vandu vakadenyeka mtima. 5 Hinu vakatumbula kumvembenekela Chapanga na Musa, vijova, "Ndava kyani utiwusili ku Misili kula tibwelwa kufwilila kuni kulugangatu? Kuni kawaka chakulya mewa manji, titotokili kwa chakulya ichi changanoga." 6 Penapo ndi Bambu Chapanga apeliki mayoka gegana chimatila pagati ya vandu, ndi gavalumili vandu na Vaisilaeli vamahele vafwili. 7 Hinu, vandu vamhambalili Musa, vakamjovela, "Tibudili muni timuvembenikili Bambu Chapanga pamonga na veve. Muyupa Bambu Chapanga muni atiwusila mayoka aga." Ndava yeniyo Musa akavayupila vandu. 8 Bambu Chapanga akamjovela Musa, "Tengenezayi liyoka la shaba, ulikoveka panani ya lipanda. Mundu yeyoyoha mwealumiwi na liyoka, akalilingulila liyoka lila la shaba, yati ilama." 9 Kangi Musa akatenganeza liyoka la shaba na kulipachika panani ya lipanda. Na kila mundu mwealumiwi na liyoka na akalilingulilayi liyoka lenilo la shaba alamili.

10 Vaisilaeli vayendalili na lugendu lwavi, vakavika kambi ku Oboti. 11 kangi vakawuka Oboti na kuvika kambi ku Iye Abalimu, kulugangatu lwelulolesana na Moabu upandi wa kwelihumila lilanga. 12 Kuhuma penapo vayendalili kulongolo vakavika kambi kulikemba la Zeledi. 13 Kuhuma kwenuko vagendili, vakavika kambi kukasikazini ya mfuleni wa Alimoni, wula wewihelesa manji kuhuma mulima wa Vaamoli na kupitila lugangatu. Mfuleni Amoni wavi mumbaka pagati ya Vamoabu na Vaamoli. 14 Ndava yeniyo, yiyandikwi muchitabu cha Bambu Chapanga, "Muji wa Vahebu ku mulima wa Sufa, na makemba ga Alimoni, 15 na mhelelu wa makemba wihika mbaka muji wa Ali, na kuhamba kum'baka wa Moabu!"

16 Kuhuma kwenuko Vaisilaeli vagendili mbaka Beeli, ndi chiliva chila Bambu Chapanga amjovili musa, "Vavika vandu pamonga, nene yati nikuvapela manji." 17 Kangi Vaisilaeli vakayimba lunyimbu ulu,

"Didiwula manji, vee chiliva!

Muchiyimbila chiliva,

18 Chiliva chechagimiwi na vakulu mewa vandu vevamanyikini neju,

kwa ndonga zavi za ulongosi na mkongojo."

Kuhuma kulugangatu vagendili mbaka Matana.

19 Kuhuma matana mbaka Nahalieli, kuhuma Nahalieli mbaka Bamoti, 20 na kuhuma ku Bamoti vakahika kulikemba lelivi ku Moabu, pandu pala pepavii papipi chitumbi cha Pisiga ndi chituvilu chaki chilolesana na lugangatu.

21 Vaisilaeli vavatumili vajumbi vahamba kwa Sihoni nkosi wa Vaamoli, vakamujovela ujumbi uwu, 22 "Utiyidakila tipita pamulima waku, yati ting'anamuka lepi kuhamba kumuhana na kuyingila mumigunda amala pagati ya migunda ya mizabibu, mewa yati tinywa lepi manji ga viliva vyinu, yati tipita pagati ya njila yikulu ya mbaka petiwuka pamulima waku." 23 Nambu Sihoni avayidakili lepi Vaisilaeli vapita pagati ya mulima waki. Akavakemela manjolinjoli vaki voha pamonga, vakahamba ku Yahasa kulugangatu kuvazangila Vaisilaeli. 24 Pamonga na naha, Vaisilaeli vamkomili, vakautola mulima waki tangiya mfuleni Amoni mbaka mfuleni Yaboki, nambu mbaka kuhika mlima wa Vaamoni ndu, ndava muni mibaka yaki yatindiswi luhumba. 25 Vaisilaeli vayitolili kwa ngondo miji yoha ya Vaamoni na vene vakatama mumiji yeniyo pamonga na Heshiboni na hijiji hyaki. 26 Heshiboni wavi muji wa Sihoni nkosi wa Vaamoli. Heshiboni ndi yula kadeni mweatovini na nkosi wa Moabu, na akatola mulima waki woha mbaka ku Alinoni. 27 Ndava yeniyo vatunga nyimbu viyimba, "Bwela Heshiboni na kujenga. Muji wa Sihoni ujengewayi kavili.

28 Motu wayakili kuhuma ku Heshiboni,

lulimi lwa motu kuhuma muji wa Sihoni.

Wayongomisi muji wa Ali wa ku Moabu,

vandu vevatamayi panani ya vitumbi vya mumihana ya mfuleni Alimoni.

29 Mwalachikolela nyenye vandu va Moabu!

Muyongomiswi, nyenye vandu va chapanga Kemoshi!

Uvakitili vana vinu vagosi kuvya vajumbiswa va mulima wa chiyehe,

vasikana vinu muvalekili vakamuliwa kungondo mbaka kwa Sihoni, nkosi wa Amoli.

30 Nambu hinu chiveleku chavi chiyongomiswi,

kuhuma ku Heshiboni mbaka ku Diboni,

kuhuma ku Nashimu mbaka ku Nofa, papipi na ku Medeba."

31 Hinu, Vaisilaeli vakatama pamulima wa Vaamoli. 32 Kangi Musa avatumili vandu vaung'omesa muji wa Yazeli, kangi Vaisilaeli vakautola kwa ngondo pamonga na hijiji hyaki, na kuvavinga Vaamoli vevatama penapo.

33 Vaisilaeli vang'anamwiki vakalanda njila ya kuhamba ku Bashani. Nkosi Ogu wa ku Bashani ahumili na manjolinjoli vaki na kuvazangila kula ku Edilei. 34 Bambu Chapanga amjovili Musa, "Kotoka kumyogopa Ogu, ndava nikukiti uvahotola, pamonga na manjolinjoli vaki voha na vandu vaki voha. Mkitila ngati chewamkitili Sihoni nkosi wa Vaamoli, yula mweatalalili ku Heshiboni." 35 Hinu, Vaisilaeli vamkomili Ogu na vana vaki voha, changali kumleka hati mundu mmonga, kangi vakatalalila mlima.