1 Balaamu akamjovela Balaki, "Unijengela pandu saba pakuwusila luteta penapa, kangi uniletela ng'ombi zigosi saba pamonga na mambelele gagosi saba."

2 Ndi Balaki akitili ngati chejovili na Balaamu. Hinu vakawusa panani ya kila pandu pa kuwusila teta ng'ombi yigosi yimonga na limbelele ligosi limonga. 3 Kangi Balaamu akamjovela Balaki, "Tama bahapa pamuhana ya luteta lwaki lukumbi nene nihamba pamuhana. Pangi Bambu Chapanga yati ibwela kukonganeka na nene. Chochoha cheakunijovela, yati nikukujovela." Ndi akahamba pandu pamsopi panani chitumbi. 4 Chapanga akakonganeka na Balaamu na akamjovela, "Nimali kukujengela pandu saba pa kuwusila teta na kuwusa teta ya ng'ombi yigosi yimonga na limbelele ligoso limonga panani ya kila pandu pa kuwusila teta."

5 Bambu Chapanga akampela Balaamu malovi gakujova na akamjovela malovi aga, "Wuya kwa Balaki ukampelayi ukokoso uwu." 6 Balaamu awuyili, amkolili Balaki ayimili balapala papipi na luteta lwaki lwa kutinyiswa, pamonga na vakulu voha va Moabu.

7 Balaamu akajova malovi aga ga ulota,

"Balaki aniletili penapa kuhuma ku Alamu,

ena, nkosi wa Moabu aniletili kuhuma kuvitumbi vya kwelihumila lilanga.

‘Bwela uvapela likoto vandu va Yakobo ndava yangu

ena bwela uvapela likoto Vaisilaeli!’

8 Nikumpela wuli likoto mundu yula Chapanga angampela likoto?

Nikuvalaumu wuli vandu vala Chapanga angavalaumu?

9 Nihotola kuvalola kuhuma kuvituvilu vya matalahu,

Nihotola kuvalingulila kuhuma kunani ya vitumbi.

Nikuvawona vandu vevitama vene ndu,

vamanyili kuvya vamotiswi neju ya vandu vangi.

10 Yani mwehitola kuuvalanga umahele wa vandu va Yakobo,

amala kuhololela umahele wa Vaisilali?

Nifwayi ngati vevakumganisa Chapanga

mwishu wangu uvyayi ngati vene."

11 Penapo ndi Balaki akamjovela Balaamu, "Unihengili chindu kiki? Nikuletili kuni uvapela likoto makoko vangu, nambu pahali paki uvamotisi!"

12 Balaamu akamjovela, "Yikunigana kujova malovi gala geanipelili Chapanga ndu."

13 Mwanakandahi Balaki akamjovela Balaamu, "Tihamba pandu pangi pala pewihotola kuvalola, pamonga na ago yati wilola vandu vadebe, na yati wihotola lepi kuvalola voha. Kangi uvapela likoto kwenuko pandu pangu" 14 Hinu Balaki akampeleka Balaamu kumgunda wa ku Sofimu, panani ya chitumbi cha Pisiga. Penapo akajenga pandu saba pa kuwusila teta na kuwusa panani ya kila pandu pa kuwusila teta, teta yimonga ya ng'ombi yigosi na limbelele limonga ligosi.

15 Balaamu akamjovela Balaki, "Tama bahapa papipi na luteta lwaku lwa kutinyiswa, na nene nihamba kula kumwambu kukonganeka na Chapanga."

16 Chapanga akakonganeka na Balaamu, akamjovela malovi ga kujova na kumjovela, "Wuya kwa Balaki kampela ukokoso uwu." 17 Hinu Balaamu akawuya, akamkolela Balaki ayimili papipi na luteta lwa kutinyisa pamonga na vachilongosi vaki voha va Moabu. Balaki akamukota, "Chapanga akujovili kyani?" 18 Ndi Balaamu akamjovela Balaki malovi gaki,

"Yinuka Balaki, uyuwanila,

niyuwanila veve mwana wa Sipoli.

19 Chapanga mundu lepi hati ajova udesi,

mewa lepi mundu hati ang'anamusa maholo gaki!

Wu, ihotala kujova chindu na akotoka kukita,

mewa kujova chindu angatimilisa?

20 Yuwanila, nipewili muhilu kukumotisa,

na mwene amotisi nene nihotola lepi kung'anamusa."

21 "Chapanga alolili lepi uhakau kwa vana va Yakobo,

mewa ng'ani pa Isilaeli.

Chapanga wavi avi pamonga nawu,

Mwene ilumbiwa kwa vilulu pagati yavi,

na vene vikokosa kuvya mwene ndi Chapanga wavi.

22 Chapanga mweavatolili kuhuma ku Misili,

akuvatovanila kwa makakala ngati makakala ga mbunju.

23 Kawaka kulogwa kwa vandu va Yakobo,

mewa uhavi ndava ya Vaisilaeli.

Hinu kuvavala vandu va Isilaeli, vandu yati vijova,

hinu yati yijoviwa ndava ya Yakobo

‘Mlola makangaso geahengili Chapanga!’

24 Yuwanila! Vaisilaeli vayinwiki ngati lihimba lidala,

vayimili ngati lihimba ligosi.

Ndi ngati lihimba langagona mbaka limala kulya cheawindili.

na kunywa ngasi ya chinyama chelikomili."

25 Ndi Balaki akamjovela Balaamu, "Hinu ukotoka kuvapela likoto mewa kotoka kuvamotisa!"

26 Nambu Balaamu akamyangula Balaki, "Wu, nakujovili lepi kuvya cheijova Chapanga ndi cheniganikiwa kukita?"

27 Balaki akamjovela Balaamu, "Bwela nikupeleka pandu pangi. Manya Chapanga yati iyidakila uvapela likoto vandu avo kuhuma kwenuko ndava yangu." 28 Hinu Balaki akamtola Balaamu mbaka kula kuchituvilu cha Chitumbi Peoli, kula upandi weulolesana na lugangatu. 29 "Balaamu akamujovela Balaki, nijengela pandu saba pa kuwusila teta penapa, unitendelekela ng'ombi saba zigosi na mambelele saba gagosi." 30 Balaki akakita ngati cheajoviwi na Balaamu, kangi akawusa panani ya kila pandu pa kuwusila teta ng'ombi yimonga yigosi na limbelele ligosi limonga.