1 Chenichi ndi chiveleku cha Aloni na Musa lukumbi Bambu Chapanga pealongili na Musa ku chidunnda Sinai. 2 Maina ga vana va Aloni gavi, Nadabu mtumbulanu na Abihu na Eleazali pamonga na Ithamali. 3 Genaga ndi gavii mahina ga vana va Aloni, vevahaguliwi kwa kunyalwa mahuta vavya vamteta va Chapanga. 4 Nambu Nadabu na Abihu vafwili palongolo ya Bambu Chapanga, lukumbi pevampelili teta kwa motu wewangayidakiliwa palongolo ya Chapanga kulugangatu la ku Sinai. Vene vavavi lepi na vana ndava yeniyo Eleazali na Ithamali vahengalili ngati vamteta va Chapanga lukumbi lwa wumi wa Aloni dadi wavi.

5 Bambu Chapanga amjovili Musa, 6 "Valeta vandu va likabila la Lawi kwa mteta Aloni, muni vamuhengela. 7 Yati vihenga lihengu ndava yaki na ya vandu voha pa Lindanda la kukonganekela lukumbi pevihenga pa Lindanda la kukonganekela, 8 yati vakuvayangalila na kuvika bwina hyombo vyoha vya Lindanda la Musopi na kuvatangatila Vaisilaeli pevihenga mahengu gavi pa Lindanda la kukonganekela. 9 Uvagotola Valawi voha kwa Aloni na vana vaki, venavo ndi Vaisilaeli vevakumuhengela Aloni na vana vaki. 10 Uvavika Aloni na vana vaki vavya na lihengu la unteta, nambu mundu yungi yoyoha mwaihegelela pandu papevaguliwi ndava ya nene yati ikomiwa."

11 Bambu Chapanga ayendalili kumjovela Musa, 12 "Nivahagwili Valawi kuhuma kwa Vaisilaeli, pahali pa kila mvelekwa wa kutumbula wa chigosi pagati ya kila vandu va munyumba. Valawi ndi vangu, 13 ndava muni vavelikwa voha va kutumbula ndi vangu. Penavakomili vavelekwa va kutumbula voha ku Misili kula, namvagwili kila mvelekwa wa kutumbula pagati ya Isilaeli avya wangu, avya mundu amala hinyama. Yati vivya vangu. Nene ndi Bambu Chapanga."

14 Mwanakandahi Bambu Chapanga amjovili Musa ku lugangatu lwa Sinai, 15 "Vavalanga vana va Lawi voha kulandana na lukolo zavi na vandu va munyumba zavi, kila mgosi kutumbula vevana ntanga ya mwehi umonga na neju." 16 Ndava yeniyo Musa avavalingi, ngati chealagaziwi na Bambu Chapanga. 17 Genaga ndi gavii maina ga vana va Lawi. Gelishoni na Kohati pamonga na Melali. 18 Na aga ndi mahina ga vana va Gelishoni kwa kulanda lukolo lwavi, Libini pamonga na Shimei. 19 Vana va Kohati kwa kulanda lukolo lwavi, Amlamu na Ishali na Hebuloni pamonga na Uzieli. 20 Vana va Melali kwa kulanda lukolo lwavi ndi, Mahli na Mushi. Venava ndi vavi lukolo lwa Valawi kulandana na vandu va munyumba zavi.

21 Kwavili na lukolo za Walibini na Washimei zezahumili kwa Gelishoni, venava ndi lukolo lwa Vagelishoni. 22 Vagosi voha vevavalangiwi vevavi na ntanga ya mwehi umonga amala neju ndi elufu saba na miya muhanu. 23 Lukolo lwa Vagelishoni, yavaganili kutama upandi welitipama lilanga, mumbele ya Lindanda la kukonganekela 24 Chilongosi wa vandu va likabila la Vagelishoni avi Eliasafu mwana wa Laeli. 25 Lihengu la vana va Gelishoni lavili kuyangalila Lindanda la kukonganekela na vigubiku vyaki, lipazia la mlyangu wa kuyingilila mu Lindanda la kukonganekela ndava ya Chapanga, 26 mapazia ga ua weuvii pagati ya Lindanda la kukonganekela na pandu pa kuwusila teta, na lipazia la mlyangu wa ua, na nyosi zaki. Kila chindu chahengiki kwa lihengu laki.

27 Vaamlami na Vaishali na Vahebuloni pamonga na Vauzieli zenizo ndi lukolo zezahumili kwa Kohati, venava ndi valukolo va Vakohati. 28 Mvalangu wa vagosi voha vevavii na mwehi umonga amala neju yavili vandu elufu nane na miya sita. Lihengu la Wakohati lavi kuyangalila pandu pa Msopi. 29 Lukolo za Kohati zaganikiwi kutama upandi wa kusini wa Lindanda la kukonganekela, 30 Chilongosi wa lukolo lwa Vakohati avili Elisafani mwana wa Uzieli. 31 Lihengu lavi ndi lavili kuliyunga lisanduku la lilaganu na meza ya kuvikila mabumunda na chindu cha hahi na pandu pa kuwusila teta na vyombo vyevihengela Vamteta va Chapanga pandu pa Msopi pamonga na lipazia na mahengu goha gegivali vindu vyenivi zavili zavi.

32 Chilongosi mkulu wa Valawi avii Eleazali mwana wa, Aloni mweavi mteta wa Chapanga. Avikiwi kuvayimilila vala vevaganikiwi kuyangalila Lindanda la Musopi. 33 Lukolo lwa Vamaili na Vamushi zezahumili kwa Melali. 34 Lwenulu ndi lukolo lwa Melali. Jumula ya mvalangu wa vagosi voha kutumbula vevavi na ntanga ya mwehi umonga amala neju yavili vandu elufu sita na miya zivili. 35 Mkulu wa lukolo za Melali avi Sulieli mwana wa Abihaili, venava vaganikwi kutama upandi wa kasikazini wa Lindanda la kukonganekela. 36 Vamelali vavikiwi kuyangalila fulemu za Lindanda lamusopi na mbagalu zaki na lipanda na vitamilu na vindu vyaki vyoha na kila chindu chechivala mahengu gaki. 37 Mewa vaganikiwi kuyangalila mapanda ga ua gegitindila na vitamilu vyaki na vikongwani na nyosi.

38 Musa na Aloni na vana vavi vaganikiwi kuvika Lindanda palongolo ya Lindanda la kukonganekela upandi wa kwelihumila lilalanga kulola kwelihumila lilanga. Mahengu gavi gavili kuyimamila mahengu goha gegihengeka pa Lindanda la Musopi ndava ya Vaisilaeli voha. Mundu yungi yoyoha mwealingili kuhenga lihengu la vamteta mweangavya Mlawi aganikiwi kukomiwa. 39 Valawi voha vevavalangiwi na Musa pamonga na Aloni kwa amuli ya Bambu Chapanga, kulandana na lukolo zavi, pamonga na kila mgosi mweavi na mwehi umonga amala neju vavi vandu elufu ishilini na zivili.

40 Kangi Bambu Chapanga amjovili Musa, "Uvavalanga vachiveleku vatumbulanu vachigosi voha va Isilaeli kutumbula vevavi na ntanga ya mwehi umonga na neju. 41 Na veve yati ukuvabagula Valawi ndava yangu nene Bambu Chapanga, mewa yati ubagula mifuya yoha ya Valawi ndava ya nene pahala pa viveleku vya kutumbula ya vandu va Isilaeli. Nene ndi Bambu Chapanga." 42 Musa akayidakila ndi avavalingi vachiveleku va kutumbula voha va vandu va Isilaeli ngati Bambu Chapanga cheamlagizi. 43 Vavelekwa voha vatumbulanu vagosi vevavalangiwi vevavi na ntanga ya mwehi umonga amala neju, vevayandikiswi kwa mahina gavi ndi elufu ishilini na vavili na miya zivili na sabini na datu.

44 Bambu Chapanga akamjovela Musa, 45 "Hinu, uakita vavya va nene pahala pa vachiveleku va kutumbula va Vaisilaeli. Mewawa, ubagula ng'ombi za Valawi voha pahala pa viveleku vya kutumbula vya ng'ombi za Vaisilaeli. Valawi ndi vangu, Nene ndi Bambu. 46 Ndava ya kuvasangula vachiveleku va kutumbula vagosi va vandu va Isilaeli miya zivili na sabini na datu, veviyonjokeseka mvalangu wa Valawi vagosi, 47 yati wipokela kwa kila mgosi mashonga vipandi mhanu ya madini ga feza, kuwanangana na chipimu cha Lindanda la Musopi. 48 Mpela Aloni na vana vaki mashonga genago ndava ya usangula wa mvalangu wa Vaisilaeli vevayonjokisiki." 49 Ndava yeniyo Musa akatola mashonga ga ugombozi kuhuma kwa vala vevayonjokisiki, kwa vala vevagomboliwi na Valawi. 50 apokili kuhuma kwa vachiveleku va kutumbula va Vaisilaeli vipandi vya madini ga feza elufu yimonga na miya zidatu na sitini na mhanu, kuwanangana na chipimu cha pandu pa Msopi, 51 Musa akampela Aloni na vana vaki mashonga ago ga ugombozi, ngati chealagizwi na Bambu Chapanga.