1 Bambu Chapanga amjovili Musa, 2 "Uvapela Vaisilaeli malagizu ago, ngati mgosi amala mdala avi chilapu maalumu, nazili ya kujiwusa mwene ndava ya Bambu, akajibagula ndava ya Bambu Chapanga, 3 ndi, akoto kunywa divayi amala ugimbi, akoto kunywa kawoli ya divayi amala mnyweso wungi weuchuchuta, akotoko kunywa manji ga zabibu amala kulya zabibu zezihundili amala zivisi. 4 Lukumbi lwoha peivya muchilapu akotoka kulya chindu chochoha chechihuma mumzabibu, kuhumila mbeyu hati makava gaki."

5 "Magono goha ga nazili yaki ya kujibagula, akotoka kuketa mayunju gaki mbaka lukumbi lwa nazili yaki ya kujibagula yati ivya wa Bambu Chapanga palumalika, yati akugaleka mayunju gaki gavya gatali. 6 Magono goha gakujinyambisa ndava ya Bambu Chapanga, mundu mwenuyo akotoka kuhegelela mtuhi wa mundu, 7 hati ngati ya dadi amala mau amala mlongo, amala mlumbu waki vafwili, akoto kujihakasa kwa kuhegelela ndava muni ajibagwili ndava ya Bambu Chapanga kwa nazili. 8 Magono goha ga nazili zaki mwene yati ivya wa Bambu Chapanga."

9 "Ngati mundu akafwayi chigafula papipi na mwene, na kugakita mayunju gaki gavya gangayidakiliwa na Chapanga, ndi yati iganikiwa aketa ligono la saba la kunyambiswa kwaki. 10 Kangi ligono la nane yikumgana kuleta majiva gavili amala mawela gavili ga ngunda kwa Mteta wa Chapanga pamlyangu wa Lindanda la Kukonganekela ndava ya Chapanga. 11 Mteta wa Chapanga yati akuliwusa limonga la liwela lenilo kuvya luteta lwa kulekekesa kubuda na lingi kuvya luteta lwa kutinyiswa njwee, na mwene yati akumkitila utepulanisi, ndava muni abudili kwa kuvya papipi na mundu mweafwili. Ligono lilolo, yati akuunyambisa mutu waki ndava ya Bambu, 12 na kujivika kavili palongolo ya Bambu Chapanga kulandana na magono gala geajivikili pa kutumbula. Magono ago geajivikili pa kutumbula yati givalangiwa lepi ndava mayunju gaki geagavikili ndava ya Bambu gahakiswi. Ndava ya kujiwusa kavili palongolo ya Bambu yati iwusa mwanalimbelele ligosi la mwaka umonga kuvya luteta ndava ya kubuda kwa kulola mundu mweafwili."

13 "Yeniyi ndi nazili ya chilapu lukumbi amali kutimalisa lukumbi lwaki lwa kujinyambisa, yati iletwa pamlyangu wa kuyingilila wa Lindanda kukonganekela ndava ya Bambu, 14 na kumuwusila Bambu Chapanga vinyama ivi vyangali chilema kuvya luteta, ndi mwanalimbelele ligosi limonga la mwaka umonga ndava ya luteta lwa kutinyiswa na mwanalimbelele lidala limonga la mwaka umonga ndava ya luteta lwa kuwusa kumbudila na limbelele limonga ligosi ndava ya luteta lwa uteke. 15 Mewa yati iwusa chidengu chechina mabumunda gangali ngemeku; Maandazi gegatengenizwi kwa uhembe nyililili weuhangisiwi na mahuta, na mabumunda ngalingasi geganyaliwi mahuta pamonga na luteta lwa uhembe na luteta lwa mnyeso."

16 "Mteta yati akumuwusila Chapanga vindu vyoha ivi pamonga na luteta zaki za kumbudila Bambu Chapanga na luteta lwa kutinyiswa. 17 Yati akumuwusila Bambu Chapanga limbelele lenilo ngati luteta lwa uteke, yati akuliwusa pamonga na lidengu lelina mabumunda gangasopewa ngemeke, luteta lwa uhembe na mnyweso. 18 Kangi pamlyangu wa kuyingilila pa Lindanda la kukonganekela ndava ya Bambu, yula mweavikii nazili yati iketa mayunju gaki na kugasopa pamoto weuvili pahi ya luteta lwa uteke."

19 "Akamala kuketa mayunju gaki mweaviki nazili yula, mteta wa Chapanga yati itola na kumupela livega la limbelele ligosi lelitutumwiswi pamonga na liandazi na libumunda ngalingasi kuhuma muchidengu. Vyoha vyenivyo vitengenizwi changali kusopewa ngemeku. 20 Kangi mteta wa Chapanga yati akuviyinula vindu vyenivyo ngati luteta lwa kuyinuliwa palongolo ya Bambu, ndi vya Msopi na ndi vindu vya mteta, pamonga na chidali chechiyinuliwi na liwondo lelawusiwi. Pagenago mweaviki nazili ihotola kunywa divayi."

21 "Wenuw ndi wavii muhilu ndava ya mundu mwaviki nazili, mwalapili kuwusa mawusilu kwa Bambu. Ihotola kuwusa mawusilu gegayonjokisi ngati ihotola, nambu iganikiwa kuwusa kila chaalapili kuwusa lukumbi pavikili nazili."

22 Bambu Chapanga amjovili Musa, 23 "Mjovela Aloni na vana vaki kuvya chenichi ndi chemkuvamotisa Vaisilaeli, Muvajovela, 24 Bambu Chapanga avamotisa na kuvayangalila;

25 Bambu Chapanga avalola kwa wema waki na kuvakitila gegavii gabwina;

26 Bambu Chapanga avalangisa lipyana laki na kuvapela uteke."

27 "Ngati Aloni na vana vaki vakaniyupayi nivamotisa Vaisilaeli kwa liina langu, yati nikuvamotisa."