1 Kangi Musa akalongela na vachilongosi va makabila ga Isilaeli, akavajovela, "Bambu Chapanga, ilagisa naha. 2 Mundu akavika nazili kwa Bambu amala akajovayi mwene kwa kulapa kuvya akumpela Chapanga chindu yati ivya ajikungili mwene, yiganikiwa akotoka kung'anamusa linenu laki ndi iganikiwa akita goha geagajovili mwene."

3 "Msikana mweakona itama kunyumba ya dadi waki akavikayi nazili kwa Bambu Chapanga kuvya yati akumupela chindu ndi iganikiwa ayitimilisa, 4 na dadi waki amali kuyuwana ahadi yeniyo, na akotoka kumbelalela, hinu iganikiwa kutimilisa nazili yaki kwa kuwusa kila chindu cheavikili. 5 Nambu ngati dadi waki akammbesayi lukumbi peiyuwana, nazili zenizo na chilapuchenicho kawaka chechikumukunga."

6 "Ngati igegewa lukumbu amali kuvika chilapu amala ajovili ahadi nunuyu changaholalela ndi ivya ajikungili mwene, 7 ndi mgosi waki akayuwana lijambo lenilo akotoka kumbesa, hinu chilapu chaki yati chilandana na ahadi zaki yati iganikiwa akita ngati chaajovili. 8 Nambu ngati mgosi waki akayuwana lijambu lenilo na akambesa, msikana mwenuyo iganikiwa lepi kukita geajovili ndi Bambu Chapanga yati akumlekekesa."

9 "Ngati lipwela yoyoha amala mdala mwealekiwi akavika nazili amala ahadi yoyoha viganikiwa vawusa chavajovili."

10 "Nambu mdala mweagegiwi na avii kunyumba ya mgwana waki akavika nazili amala ahidi kwa kulapa, 11 kangi mngwana waki akayuwana lijambu lenilo nambu akoto kumdivala, amala kumjovela chochoha, hinu iganikiwa mdala mwenuyo akita goha geajovili. 12 Nambu ngati mngwana waki yati iyuwana na kumbesa, hinu mdala mwenuyo iganikiwa lepi kukita cheajovili, na Bambu Chapanga yati akumlekekesa mdala mwenuyo. 13 Mngwana waki ihotola kumbesa amala kumyidakila mdala waki kukitagala geajovili akugakita kwa Bambu. 14 Nambu ngati mngwana waki ijova lepi chochoa kuhumila peayuwini kuvala nzili amala ahadi yeavikili mdala waki, yati ivya ayidakili kuwusa goha geahaidi mdala waki. 15 Nambu ngati mngwana waki akumbesa lepi pala peayuwini hinu lawama zenizo yati zivya za mnganawaki."

16 Genaga ndi malagizu gala Bambu chapanga amlagizi Musa kuvala mambu ga mngwana na mdala waki, na pagati ya dadi na msikana waki yula mweakona angagegewa.