1 Bambu Chapanga akamjovela Musa, 2 "Valagiza Vaisilaeli ujova. Pemwiyingila ku Kanaani, mulima wenikuvapela uvyayi winu, mibaka ya mulima winu woha yati yivya naha. 3 Upandi wa kusini mmbaka winu yati wivya kuhuma lugangatu la Sini kulanda mbaka wa Edomu. Yati utumbula kwelihumila lilanga upandi wa kusini kumwishu wa nyanja ya mwinyu. 4 Kangi ung'anamukila kusini mwa ndila ya Akilabimu, yendelelayi kupitila lugangatu ku Sini na kuhamba kusini ya Kadeshi Balinea. Kangi m'baka wenuwo yati uhamba mbaka ku Hasali Adali mbaka ku Azimoni, 5 kuhuma Azimoni ya ung'anamuka kuyelekela kapela ya Misili kwekuvi na mmbaka wa Vamisili ma kumalisila nyanja ya Meditelania."

6 "Mmbaka winu upandi welitima lilanga yati wivya nyanja ya Meditelania."

7 "Mmbaka winu wa upandi wa kasikazini yati wivya, kuhuma nyanja ya Meditelania, yati muvika chindu cha kulangisa mubaka mbaka kuchitumbi cha Holi. 8 Kuhuma chitumbi cha Holi yati mwivika chindu kulangisa mmbaka mbaka njila ya Hamati, na kuyendelela mbaka Sedadi, 9 kuyendela mbaka Zifuloni na kumalisila Hazali Enani, wenuwo ndi mbaka winu kukasikazini."

10 "Mmbaka winu wa upandi kelihumila lilanga yati mukuuvika chindu kulangisa mmbaka, kuhuma Hazali Enani mbaka Shefamu. 11 Kuhuma Shefanu yati wihamba kusini mbaka Libila, kwelihumila lilanga mwa Aini, kangi mmbaka wenuwo yati wihamba pahi mhelelu kwelihumila lilanga wa nyanja Kineleti, 12 kangi yati wihelela kulanda mfuleni Yoludani mbaka nyanja ya Mwinyu, wenuwu ndi mulima waku ngati mmbaka cheuvili."

13 Hinu Musa akavajovela Vaisilaeli, "Wenuwu ndi mulima wemugaviwa kuvya winu kwa gudugudu, mulima wula Bambu Chapanga anilagizi vapewa makabila tisa na yapinga. 14 Vandu va kabila la Lubeni na la Gadi na yapinga ya likabila la Manase gapatili kuwanangana na lukolo zavi. 15 Makabila gavili na yapinga aga gapewili pandu pavi kumwambu ya mfuleni yoludani, mwambu ya Yeliko kwelihumila lilanga."

16 Bambu Chapanga akamjovela Musa, 17 "Mteta Eliazali na Yoshua mwana wa Nuni ndi vevakuvagavila vandu mulima kuvya wavi. 18 Kangi uhagula chilongosi mmonga kuhuma kila likabila ndava ya kutangatila kugava ndima. 19 Genaga ndi mahina gavi, Vandu va likabila la Yuda. Kalebu mwana wa Yefune. 20 Kuhuma kabila la Simeoni, ahaguliwi Shemueli mwana wa Amihudi. 21 Kuhuma likabila la Benjamini ahaguliwi Elidadi mwana wa Kisiloni. 22 Kuhuma likabila la Dani ahaguliwi Buki mwana wa Yogoli. 23 Vandu va kabila la Manase ahaguliwi mwana wa Yosefu, Hanieli mwana wa Efodi. 24 Kuhuma likabila la Efulaimu, mwana wa Yosefu, Kemueli mwana wa Shifutani. 25 Vandu va kabila la Zebuluni, Elisafani mwana wa Palinaki. 26 Kuhuma likabila la Isakali, ahaguliwi Palitieli mwana wa Azani. 27 Kuhuma likabila la Asheli, ahaguliwi Ahihudi mwana wa Shelomi 28 Kuhuma likabila la Nafutali ahaguliwi Pedaheli mwana wa Amihudi.

29 Venava ndi vandu vala Bambu Chapanga avalagizi vavagavila Vaisilaeli mulima wa Kanaani kuvya mulima wavi."