1 Bambu Chapanga akamjovela Musa, 2 "Uvawuyisila mambu gahakau gala Vamidiani gevavakitili Vaisilaeli, kangi veve yati wifwa."

3 Hinu Musa akalongela na Vaisilaeli akavajovela, "Muvatendekela vandu kwa ngondo vahamba kuvazangila Vamidiani kuvawuyisila ndava ya Bambu Chapanga gala gevatikitili tete. 4 Kuhuma kila likabila la Isilaeli, yati mwipeleka vandu elufu yimonga kungondo."

5 Hinu vandu elufu yimonga vawusiwi kuhuma mukila likabila pagati ya maelufu ya Vaisilaeli, mvalangu wavi wavivagosi elufu kumi na zivili vevavi na vindu vya kukomanila ngondo. 6 Musa avapeliki kungondo vandu elifu yimonga kuhuma mukila likabila kwa uyimalila wa Finehasi mwana wa mteta Eliazali, kuni avi na vindu vya pandu pa kumufugamila Chapangana mapenenga ga ulangisu. 7 Vauzangili mulima wa Midiani, ngati Bambu Chapanga cheamlagizi Musa, ndi vakavakoma vagosi voha. 8 Pagati ya vandu venavo vevakomiwi, kwavili va nkosi mhanu wa Midiani, vene ndi Evi na Lekemu na Suli na Huli pamonga na Leba. Mewawa vamkomili Balaamu mwana wa Beoli.

9 Vaisilaeli vavakamwili kungondo vadala va chimidiani pamonga na vana vavi vatolili kwa makakala misambi ya ng'ombi na mambelele na vindu vyoha vya Vamidiani. 10 Vayochili motu miji yavi yoha yila Vamidiani yevatamili, pamonga na kambi zavi zoha. 11 Vatolili vindu vyoha, mewa vavakamwili kwa makakala vandu pamonga na hinyama, 12 vakampelekela Musa na Eliazali, na vandu Vaisilaeli voha vevatamayi kukambini ku mulima wa selede wa Moabu, kumwambu ya papipi na Yeliko.

13 Musa na mteta Eliazali pamonga na vachilongosi voha va Vaisilaeli vahumili kukambi na kuhamba kuvapokela manjolinjoli. 14 Musa avayomili vakulu va vandu va ngondo, ndi vala vakulu wa vandu maelufu na vakulu va vandu miya va ngondo, vala vevawuyili kuhuma kungondo. 15 Musa akavakota, "Ndava kayani muvalekili vadala ava muni? 16 Mukumbukayi kuvya vadala ndi vevalandili mpangu wa Balaamu. vakavakita Vaisilaeli vambela Bambu Chapanga ku Peoli hati matamu gahakau gakavakolela vandu va Bambu Chapanga. 17 Ndava yeniyo muvakoma vana voha vagosi kila mdala mweamali kugona na mgosi. 18 Nambu mkoto kuvakoma vasika voha vangagona na vagosi, muvaleka mumi ndava yinu mwavene. 19 Voha vala vevavii pagati yinu vala vevakomili mundu amala kupamisa mundu mweafwili ndi yiganikiwa vatama kuvala ya kambi kwa magono saba, mujinyambisa na vavanda vinu paligono la datu na la saba. 20 Mchapa nyula zinu bwina pamonga na kila chindu chechitenganizwi kwa chikumba cha mene amala mkongo."

21 "Kangi mteta Eliazali akavajovela vagosi vevawuyili kungondo, Yeniyi ndi mihilu yila Bambu Chapanga ampelili Musa. 22 Zahabu na hipandi ya madini ga feza na lyuma na bati na madini ga lisasi, 23 ndi vindu vyoha vila vyevisindimala motu, yati vinyambiswa kwa kupitila kumoto, hati vyenivyo, ndi yiganikiwa vinyambiswa kwa manji ga unyambiso. Vindu vingi vyoha vila vyangasindimala moto yati vinyambiswa kwa manji ga unyambiso. 24 Paligono la saba ndi yiganikiwa muchapa nyula zinu, ndi yati bwina na kuyidakiliwa kuyingila kukambi."

25 Bambu Chapanga akamjovela Musa, 26 "Veve na mteta Eliazali pamonga na vachilongosi va makabila ga Vaisilaeli, mvalanga vandu voha na hinyama vala vemvatolili kungondo. 27 Mgava vindu vyemtoli kungondo malundu gavili, lilundu limonga ndava ya msambi wa vandu va ngondo vevahambi kungono na lilundu lingi ndava ya vandu voha. 28 Kangi tola lilundu limonga pagati ya kumi kwa vandu vevahambili kungondo, ndava ya Bambu Chapanga, chindu chimonga kuhuma muvindu miya mhanu, yivya vandu amala ng'ombi amala punda amala limbelele amala mene, 29 umpela mteta Eliazali kuvya teta kwa Bambu Chapanga. 30 Kuhuma mulilundu lila la vandu voha, tola lilundu limonga pagati ya hamusini, yikavya vandu amala ng'ombi amala punda amala limbelele amala mene. Vyenivyo yati ukuvapela Valawi vala vevikita lihengu mu Lindanda la kukonganeka na Bambu. 31 Musa na mteta Eliazali vakakita ngati Bambu Chapanga cheamlagizi Musa."

32 Vindu vyevanyagili Vaisilaeli ku ngondo vyavili, mambelele laki sita na elufu sabini na mhanu, 33 ng'ombi elufu sabini na zivili, 34 punda elufu sitini na yimonga, 35 na vasikana vangagona na vagosi elufu selasini na vavili. 36 Yapinga ya lilundu ya vala vevahambi kutovana ngondo yavi mambelele laki zidatu na selasini na saba na miya mhanu. 37 Mumambelele ago, mambelele miya sita sabini na muhanu gawusiwi kwa Bambu Chapanga. 38 Ng'ombi zevapewili manjolinjoli zavili elufu selasini na sita, ndi pagati ya zenizo sabini na zivili zawusiwi ndava ya Bambu Chapanga. 39 Punda zavili elufu selasini na miya muhanu, pagati ya zenizo sitini na yimonga zawusiwi luteta ndava ya Bambu Chapanga 40 Vandu vavi elufu kumi na sita, na pagati ya avo lilundu la Bambu Chapanga yavi vandu selasini na vavili. 41 Hinu Musa akampela mteta Eliazali mawusilu genago gegawusiwi ndava ya Chapanga, ngati Bambu Chapanga cheamlagizi Musa.

42 Kavili yapinga yevapewi Vaisilaeli, yila Musa yeaibagwili na yapinga yila vapewili misambi wa vandu va ngondo vevahambili kungondo. 43 yapinga yeyavili ya vandu yavii mambelele laki zitadu na elufu selasini na saba na miya muhanu, 44 na ng'ombi elufu selasini na sita, 45 na punda elufuselasini na miya muhanu, 46 na vandu elufu kumi na sita. 47 Kuhuma yapinga yeniyo yeyavi ya Vaisilaeli, Musa ahagwili yimonga pagati ya hamusini ya vandu na hinyama, ngati Bambu Chapanga cheamlagizi, mwene akavapela Valawi, vala vevikita lihengu la kuyangalila Lindanda la Bambu Chapanga.

48 Kangi vakulu vala vevavi vavaha va manjolinjoli, vakulu va msambi wa vandu maelufu na vakulu va misambi ya vandu miya, vamhambili Musa, 49 vakamjovela, "Vatumisi vaku tavavalingi manjolinjoli voha vevavi pahi ya uyimalila witu tiloli kuvya kawaka hati mmonga mweapungwiki. 50 Hinu tiletili yombo ya zahabu na vikuku na bangili na pete na vipuli na shanga ndi kila mundu apatili. tiviwusili muni kukita utepulanisu palongolo ya Bambu Chapanga. 51 Musa na mteta Eliazali vapokili vindu vyoha vyevyanyaliwi zahabu. 52 Jumula ya zahabu yoha yevamuwusili Bambu Chapanga yavi papipi kilo miya zivili. 53 Kila linjolinjoli ajitolili vindu vyevatolili kungondo kuvya vyaki mwene. 54 Musa na mteta Eliazali vapokili zahabu kuhuma kwa vakulu va manjolinjoli na kuyipeleka ku Lindanda la mngonganu muni yivya ukumbuso wa Vaisilaeli palongolo ya Bambu."