1 Bambu Chapanga amjovili Musa, 2 "Tengeneza mapenenga gavili kwa madini ga feza yeyikitiwi lufumbu. Ugahengela kwa kukemela vandu lukumbi lwa kudenya kambi ndava ya kuwuka. 3 Mapenenga goha gavili pegipulwa pamonga, vandu voha yati vikonganeka pamonga papipi na veve palongolo ya mlyangu wa Lindanda la kukonganekela. 4 Nambu ngati likapulwa limonga ndu, vachilongosi yaani vakulu va lukolo za Isilaeli, ndi vevihegelela palongolo yaku. 5 Lukumbi lwami lwa lipenenga lwa kumanyisa kuwuka likapuliwayi, makabila gegavii na makambi upandi welihumila lilanga yati vitumbula kuwuka. 6 Lwami lwenulo lwa lipenenga yati luyuwanika lukumbi lwoha lwa kutumbula lugendu, vala va kambi za upandi wa kusini yati vitumbula kuwuka. Lwami lwa lipenenga lwa kumanyisa kuwuka yati luvya ulangisu wa kutumbula kuwuka. 7 Lukumbi peukuvakemela vandu vakonganeka pamonga pula lipenenga, nambu kotoka kupula kwa lwami lwa kuwuka." 8 Vana wa Aroni, vevavi vamteta, ndi vevipula mapenenga genago.

"Lenili yati livya lilagizu la magono goha ndava yinu na kwa viveleku vyevibwela. 9 Lukumbi lwa ngondo pamulima wenu ndava ya vamakoko vevakuvawonela, yati mwiwusa ulangisu wa ngondo kwa kupula mapenenga genago muni Chapanga, Chapanga winu apatayi kuvakumbuka na kuvasangula kuhuma kwa makoko vinu. 10 Mewa lusenje lwa luheku lwinu, miselebuko ya mwehi peuvandama na miselebuko hingi, yati mwipula lipenenga genaga pemwiwusa teta zinu za kutinyiswa na luteta zinu za uteke. Penapo nene Chapanga winu yati nikuvakumbuka nyenye. Nene ndi Bambu, Chapanga winu."

11 Paligono la ishilini la mwehi wa pili, mwaka wa pili, tangia Vaisilaeli pevahumili ku Misili, lihundi layinuliwi kuhuma kunani ya Lindanda la kukonganekela, 12 na vene Vaisilaeli vakatumbula lugendu lwavi kuhuma lugangatu lwa ku Sinai. Lihundi lenilo lawukili na kuhamba kutula palugangatu la Palani.

13 Lwenulu ndi lwavili lugendu lwa kutumbula lwa vana va Isilaeli vawukili kwa mihilu ya Chapanga ngati cheyajoviwi na Musa. 14 Misambi ya kambi ya Yuda yalongolili hoti pahi ya bendela yavi. Chilongosi wavi ndi avii Nashoni mwana wa Aminadabu. 15 Natanyeli mwana wa Suali, avili chilongosi wa msambi wa likabila la Isakali, 16 na Eliabu mwana wa Heloni, avi chilongosi wa masambi wa likabila la Zebuluni.

17 Kangi, Lindanda validenyili, na vandu va lukolo lwa Gelishoni na wa Melali ndi vevagegili, vatumbwili kuwuka.

18 Kangi misambi ya kambi ya lukolo lwa Leubeni yalandili pahi ya bendela zavi. Chilongosi wavi ndi avii Elishuli mwana wa Shedeuli. 19 Shelumieli mwana wa Sulishadai alongwisi msambi wa likabla la Simeoni, 20 na Eliasafu mwana wa Deueli alongwisi msambi wa likabila la Gadi.

21 Kangi vagelekili vandu va lukolo lwa Kohati, kuni vagegili vindu vya Msopi. Yaganikiwi Lindanda liyimikwayi kwakona vene vangabwela.

22 Kangi misambi ya kambi ya likabila la Efulaimu vyalandili pahi ya bendela yavi. Chilongosi wavi ndi avii Elishama mwana wa Amihudi. 23 Gamalieli mwana wa Pedasuli alongwisi misambi ya likabila la Manase, 24 na Abidani mwana wa Gideoni, alongwisi likabila la Benyamini.

25 Pamwishu, vala vevavili pahi ya bendela ya msambi wewalongiswi na likabila la Dani vawukili pahi ya ulangisu wavi. chilongosi wavi ndi avii Ahiezeli mwana wa Amishadai. 26 Pagieli, mwana wa Oklani, alongwisi likabila la Asheli, 27 na Ahila mwana wa Enani, alongwisi likabila la Nafutali. 28 Lwenulo ndi lwavii luhumu lwa kuwuka misambi ya Vaisilaeli, ndava ya kuyendelela na lugendu. 29 Penapo Musa akamujovela Hobabu mweavii mlamu waki mwana wa Leueli mkohanu wa Musa, mundu wa ku Midiani, "Tiwuka kuhamba pandu peatijovili Bambu tihamba, ‘Yati nikuvapela nyenye pandu penapo.’ Tihamba pamonga, na tete yati tikukuhengela gabwina, muni Bambu atihaidili mambu gabwina kwa Vaisilaeli." 30 Akayangula, "Pehe, yati nihamba lepi na nyenye, yati nikiliwuka kumulima wangu namwene, na kwa vandu vangu namwene." 31 Nambu Musa akajova, "Chondi kotoka kutileka. Veve ulumanyili lugangatu ulu, na uhotola kutilangisa pandu pa kuvika kambi. 32 Ngati ukalongosana na tete chochoha chabwina cheakutihengela Bambu Chapanga, ndi chewihengewa mewa na veve."

33 Chenicho ndi vawukili kuhuma ku Sinai kuchitumbi cha Bambu Chapanga, navene vagendili kwa magono gadatu. Lisanduku la Lilaganu la Bambu Chapanga lavi palongo yavi kwa magono ago gadatu muni kuvalondela pandu pa kupumulila. 34 Lihundi la Bambu lavili panani yavi lukumbi lwa muhi kila ligono pevavii mulugendu.

35 Lukumbi lwolwoha lisanduku pelawukili, Musa ajovili, "Vee Bambu Chapanga, yinuka! Vang'aiswa vitu vapechenganayi, vamakoko vitu vatilayi palongolo yaku." 36 Na kila lukumbi pelayimili, Musa ajovili, "Vawuyila, veve Bambu Chapanga, vawuyilayi Vaisilaeli ava vevavii vamahele neju."