1 Musa peamali kuliyimika Lindanda la kukonganekela, ayitalili mahuta pa Lindanda pamonga na vindu vyaki vyoha muni vivya vya Chapanga. Mewa asopili mahuta papandu pa kuwusila teta pamonga na vindu vyaki vyoha muni vivya vya Bambu. 2 Vachilongosi va Isilaeli na vakulu va lukolo na vachilongosi va makabila vevavayimalili vandu vevavalangiwi, 3 vamletili Bambu Chapanga mawusilu gavi, mutuka sita zezigubikwi za kuhutwa na ng'ombi zigosi kumi na zivili, na Mutuka yimonga ya kuhutwa kuhuma kwa kila vilongosi vavili na ng'ombi yigosi yimonga kwa kila chilongosi. Vyenivi vaviletili palongolo ya Lindanda la Msopi, 4 Bambu Chapanga amjovili Musa, 5 "Pokela mawusilu ago muni gatumiwayi kulihengu lelikitika ndava ya Lindanda la kukonganekela ndava ya Chapanga, uvapela Valawi, kila mmonga kwa kulandana na lihengu laki." 6 Hinu Musa akatola mutuka za kuhutwa zila pamonga na ng'ombi zigosi, na kuvapela Valawi. 7 Avapeli Vagelishoni mutuka zivili za kuhutwa na ng'ombi zigosi mcheche, ngati chevaganili kwa lihengu lavi, 8 na Vamelali vapewili mutuka mcheche za kuhutwa na ngombi zigosi nane, na mahengu gavi goha gaganikiwi kuhengeka pahi ya uyimilila wa ulongosi wa Isamali mwana wa Aloni mweavi mteta wa Chapanga. 9 Nambu Musa avapeli lepi chochoha Vakohati ndava muni vaganikiwi kugega vindu vya Msopi mumavega gavi, muni yavili lihenga lavi.

10 Vachilongosi voha kumi na vavili vakaleta luteta palongolo ya pandu pa kuwusila teta ligono lila pelwanyaliwi mahuta, vavikili luteta zavi palongolo ya pandu pa kuwusila teta. 11 Bambu Chapanga amjovili Musa, "Kila ligono chilongosi mmonga yati iwusa luteta ndava ya kulikita livya ndava ya Bambu."

12 Hinu, yula mweavikili luteta ligono la kutumbula, avi Nashoni mwana wa Aminadabu, wa likabila la Yuda 13 Luteta lwaki lwavi, sahani yimonga ya madini ga feza zezinautopa wa kilo yimonga na yapinga na nkeve umonga la madini ga feza lelitopa gilamu miya nane kuwanangana na vipimu vya Lindanda la Msopi, sahani na nkeve zenizo kuni vimemiswi uhembe nyililili weuhangisini na mahuta ga zeituni ndava ya luteta lwa uhembe, 14 kakalai kamonga ka zahabu kekito gilamu miya yimonga na kumi kuni kamemiswi ubani, 15 mpapakasi umonga wa ng'ombi yigosi, limbelele limonga ligosi na mpapakasi umonga wa limbelele ugosi wa mwaka umonga, ndava ya teta ya kutinyiswa, 16 lipongo limonga ndava ya teta ya kulekekesa kumbudila Chapanga, 17 na ng'ombi higosi hivili, mambelele mhanu gagosi, mapongo muhanu na vanalimbelele muhanu va mwaka umonga ndava ya kuteta ya luteta lwa uteke. Lwenulo ndi lwavili luteta lwa Nashoni mwana wa Aminadabu. 18 Ligono la pili, Netaneli mwana wa Suali, chilongosi wa likabila la Isakali aletili teta yaki. 19 Netaneli awusili, sahani yimonga ya madini ga feza zezinautopa wa kilo yimonga na yapinga na nkeve umonga la madini ga feza lelitopa gilamu miya nane kuwanangana na vipimu vya Lindanda la Msopi, sahani na nkeve lenilo kuni vimemiswi uhembe nyililili weuhangisini na mahuta ndava ya luteta lwa mabenu, 20 kakalai limonga la zahabu chechitopa gilamu miya yimonga na kumi kuni chimemiswi ubani, 21 mpapakasi umonga wa ng'ombi yigosi, limbelele limonga ligosi na mpapakasi umonga wa limbelele ugosi wa mwaka umonga, ndava ya teta ya kutinyiswa, 22 lipongo limonga ndava ya teta ya kulekekesa kumbudila Chapanga, 23 na ng'ombi higosi hivili, mambelele mhanu gagosi, mapongo muhanu na vanalimbelele vagosi muhanu va mwaka umonga ndava ya kuteta ya luteta lwa uteke. Lwenulo ndi lwavili luteta lwa Netanyeli mwana wa Suali. 24 Ligono la datu likavya zamu ya Eliabu mwana wa Heloni, chilongosi wa likabila la Zebuluni. 25 Luteta lwaki lwavi lwavii, sahani yimonga ya madini ga feza zezinautopa wa kilo yimonga na yapinga na nkeve umonga la madini ga feza lelitopa gilamu miya nane kuwanangana na vipimu vya Lindanda la kukonganekela ndava Chapanga, sahani na nkeve zenizo kuni vimemiswi uhembe nyililili weuhangisini na mahuta ndava ya luteta lwa uhembe, 26 kakalai kamonga ka zahabu kekitopa gilamu miya yimonga na kumi kuni chimemiswi ubani, 27 mpapakasi umonga wa ng'ombi yigosi, limbelele limonga ligosi na mpapakasi umonga wa limbelele ugosi wa mwaka umonga, ndava ya teta ya kutinyiswa, 28 lipongo limonga ndava ya teta ya kulekekesa kumbudila Chapanga, 29 na ng'ombi higosi hivili, mambelele mhanu gagosi, mapongo muhanu na vanalimbelele vagosi muhanu va mwaka umonga ndava ya luteta lwa uteke. lwenulo ndi lwavili luteta lwa Eliabu mwana wa Heloni. 30 Ligono la nne likavya zamu ya Elisuli mwana wa Shedeuli, chilongosi wa likabila la Leubeni. 31 Luteta lwaki lwavi, sahani yimonga ya madini ga feza zezinautopa wa kilo yimonga na yapinga na nkeve umonga la madini ga feza lelitopa gilamu miya nane kuwanangana na vipimu vya Lindanda la kukonganekela ndava ya Chapanga, sahani na nkeve lenilo kuni vimemiswi uhembe nyililili weuhangisini na mahuta ndava ya luteta lwa mabenu, 32 kasahani kamonga ka zahabu kekanautopa gilamu miya yimonga na kumi kuni kamemiswi ubani, 33 mpapakasi umonga wa ng'ombi yigosi, limbelele limonga ligosi na mpapakasi umonga wa limbelele ugosi wa mwaka umonga, ndava ya teta ya kutinyiswa, 34 lipongo limonga ndava ya teta ya kulekekesa kumbudila Chapanga, 35 na ng'ombi higosi hivili, mambelele mhanu gagosi, mapongo muhanu na vanalimbelele vagosi muhanu va mwaka umonga ndava ya luteta lwa uteke. lwenulo lwavili luteta lwa Elisuli mwana wa Shedeuli. 36 Mweawusili luteta ligono la muhanu avii Shelumieli mwana wa Suli Shadai, chilongosi wa likabila la Simeoni. 37 Luteta lwaki lwavi, sahani yimonga ya madini ga feza zezinautopa wa kilo yimonga na yapinga na nkeve umonga la madini ga feza lelitopa gilamu miya nane kuwanangana na vipimu vya Lindanda la kukonganekela ndava ya Chapanga, sahani na nkeve lenilo kuni vimemiswi uhembe nyililili weuhangisini na mahuta ga zeituni ndava ya luteta lwa uhembe, 38 kasahani kamonga ka zahabu kekanautopa wa gilamu miya yimonga na kumi kuni kekamemiswi ubani, 39 mpapakasi umonga wa ng'ombi yigosi na limbelele limonga ligosi na mpapakasi umonga ugosi wa limbelele wa mwaka umonga, ndava ya luteta ya kutinyiswa, 40 lipongo limonga ndava ya luteta ya kulekekesa kumbudila Chapanga, 41 na ng'ombi higosi hivili, mambelele mhanu gagosi, mapongo muhanu na vanalimbelele vagosi muhanu va mwaka umonga ndava ya luteta lwa uteke. Lwenulo lwavili luteta lwa Shelumieli mwana wa Suli Shadai. 42 Ligono la sita likavya zamu ya kulet luteta Eliasafu mwana wa Deuli, chilongosi wa likabila la Gadi. 43 Luteta lwaki lwavi, sahani yimonga ya madini ga feza zezinautopa wa kilo yimonga na yapinga na nkeve umonga la madini ga feza lelitopa gilamu miya nane kuwanangana na vipimu vya Lindanda la kukonganekela ndava ya Chapanga, sahani na nkeve zenizo kuni vimemiswi uhembe nyililili weuhangisini na mahuta ga zeituni ndava ya luteta lwa uhembe, 44 kasahani kamonga ka zahabu kekanautopa wa gilamu miya yimonga na kumi kuni kamemiswi ubani, 45 mpapakasi umonga wa ng'ombi yigosi, limbelele limonga ligosi na mpapakasi umonga wa limbelele ugosi wa mwaka umonga, ndava ya teta ya kutinyiswa, 46 lipongo limonga ndava ya luteta ya kulekekesa kumbudila Chapanga, 47 na ng'ombi higosi hivili, mambelele mhanu gagosi, mapongo muhanu na vanalimbelele vagosi muhanu va mwaka umonga ndava ya luteta lwa uteke. Lwenulo ndi lwavii luteta lwa Eliasafu mwana wa Deueli. 48 Ligono la saba likavya zamu ya kuleta luteta Elishama mwana wa Amihudi, chilongosi wa likabila la Efulaimu. 49 Luteta lwaki lwavi, sahani yimonga ya madini ga feza zezinautopa wa kilo yimonga na yapinga na nkeve umonga la madini ga feza lelitopa gilamu miya nane kuwanangana na vipimu vya Lindanda la kukonganekela ndava ya Chapanga, sahani na nkeve lenilo kuni vimemiswi uhembe nyililili weuhangisini na mahuta ndava ya luteta lwa uhembe, 50 kasahani kamonga ka zahabu kekanautopa gilamu miya yimonga na kumi kuni chimemiswi ubani, 51 mpapakasi umonga wa ng'ombi yigosi, limbelele limonga ligosi na mpapakasi umonga wa limbelele ugosi wa mwaka umonga, ndava ya teta ya kutinyiswa, 52 lipongo limonga ndava ya luteta lwa kulekekesa kumbudila Chapanga, 53 na ng'ombi higosi hivili, mambelele mhanu gagosi, mapongo muhanu na vanalimbelele vagosi muhanu va mwaka umonga ndava ya luteta lwa uteke. Lwenulo ndi lwavili luteta lwa Elishama mwana wa Amihudi. 54 Ligono la nane likavya zamu ya kuleta luteta Gamalieli mwana wa Pedasuli, chilongosi wa likabila la Manase. 55 Luteta lwaki lwavi, sahani yimonga ya madini ga feza zezinautopa wa kilo yimonga na yapinga na nkeve umonga wa madini ga feza lelitopa gilamu miya nane kuwanangana na vipimu vya Lindanda la kukonganekela ndava ya Chapanga, sahani na nkeve zenizo kuni vimemiswi uhembe nyililili weuhangisini na mahuta ndava ya luteta lwa mabenu, 56 kasahani kamonga ka zahabu kekanautopa gilamu miya yimonga na kumi kuni chimemiswi ubani, 57 mpapakasi umonga wa ng'ombi yigosi, limbelele limonga ligosi na mpapakasi umonga ugosi wa limbelele la mwaka umonga, ndava ya teta ya kutinyiswa, 58 lipongo limonga ndava ya teta ya kulekekesa kumbudila Chapanga, 59 na ng'ombi higosi hivili, mambelele mhanu gagosi, mapongo muhanu na vanalimbelele vagosi muhanu va mwaka umonga ndava ya kuteta ya luteta lwa uteke. Lwenulo lwavili luteta lwa Gamalieli mwana wa Padasuli. 60 ligono la tisa likavya zamu ya kuleta luteta Abidani mwana wa Gideoni, chilongosi wa likabila la Benyamini. 61 Luteta lwaki lwavi, sahani yimonga ya madini ga feza zezinautopa wa kilo yimonga na yapinga na nkeve umonga la madini ga feza lelitopa gilamu miya nane kuwanangana na vipimu vya Lindanda la kukonganekela ndava ya Chapanga. Na sahani na nkeve zenizo kuni vimemiswi uhembe nyililili weuhangisini na mahuta ndava ya luteta lwa mabenu, 62 kasahani kamonga ka zahabu kekanautopa wa gilamu miya yimonga na kumi kuni chimemiswi ubani, 63 mpapakasi umonga wa ng'ombi yigosi, limbelele limonga ligosi na mpapakasi umonga wa limbelele ugosi wa mwaka umonga, ndava ya teta ya kutinyiswa, 64 lipongo limonga ndava ya teta ya kulekekesa kumbudila Chapanga, 65 na ng'ombi higosi hivili, mambelele mhanu gagosi, mapongo muhanu na vanalimbelele vagosi muhanu va mwaka umonga ndava ya kuteta ya luteta lwa uteke. Lwenulo ndi lwelwavii luteta lwa Abidani mwana wa Gideoni. 66 Ligono la kumi likavya zamu ya kuwusa luteta Ahiezeli mwana wa Amishadai, chilongosi wa likabila la Dani. 67 Luteta lwaki lwavi, sahani yimonga ya madini ga feza zezinautopa wa kilo yimonga na yapinga na nkeve umonga la madini ga feza lelitopa gilamu miya nane kuwanangana na vipimu vya Lindanda la kukonganekela ndava ya Chapanga. Na sahani na nkeve lenilo kuni vimemiswi uhembe nyililili weuhangisini na mahuta ndava ya luteta lwa mabenu, 68 kasahani kamonga ka zahabu kekanautopa wa gilamu miya yimonga na kumi kuni kamemiswi ubani, 69 mpapakasi umonga wa ng'ombi yigosi, limbelele limonga ligosi na mpapakasi umonga wa limbelele ugosi wa mwaka umonga, ndava ya teta ya kutinyiswa, 70 lipongo limonga ndava ya luteta lwa kulekekesa kumbudila Chapanga, 71 na ng'ombi higosi hivili, mambelele mhanu gagosi, mapongo muhanu na vanalimbelele vagosi muhanu va mwaka umonga ndava ya luteta lwa uteke. lwenulo ndi lwavii luteta lwa Ahiezeli mwana wa Amishadai. 72 Ligono la kumi na limonga likavya zamu ya kuleta teta Pagieli mwana wa Okilani, chilongosi wa likabila la Asheli. 73 Luteta lwaki lwavii, sahani yimonga ya madini ga feza zezinautopa wa kilo yimonga na yapinga na nkeve umonga wa madini ga feza lelitopa gilamu miya nane kuwanangana na vipimu vya Lindanda la kukonganekela ndava ya Chapanga, sahani na nkeve zenizo kuni zimemiswi uhembe nyililili weuhangisini na mahuta ga zeituni ndava ya luteta lwa uhembe, 74 Kasahani kamonga ka zahabu kekanautopa gilamu miya yimonga na kumi kuni kamemiswi ubani, 75 mpapakasi umonga wa ng'ombi yigosi, limbelele limonga ligosi na mpapakasi umonga wa limbelele ugosi wa mwaka umonga, ndava ya teta ya kutinyiswa, 76 lipongo limonga ndava ya luteta lwa kulekekesa kumbudila Chapanga, 77 na ng'ombi higosi hivili, mambelele mhanu gagosi, mapongo muhanu na vanalimbelele vagosi muhanu va mwaka umonga ndava ya luteta lwa uteke. lwenulo ndi lwavii luteta lwa Pagieli mwana wa Okilani. 78 Na ligono la kumi na mbili lavili zamu ya kuleta teta Ahila mwana wa Enani, chilongosi wa likabila la Nafutali. 79 Luteta lwaki lwavi, sahani yimonga ya madini ga feza zezinautopa wa kilo yimonga na yapinga na nkeve umonga la madini ga feza lelitopa gilamu miya nane kuwanangana na vipimu vya Lindanda la kukonganekela ndava Chapanga. Na sahani na nkeve zenizo kuni vimemiswi uhembe nyililili weuhangisini na mahuta ga zeituni ndava ya luteta lwa uhembe, 80 kasahani kamonga ka zahabu kekanautopa wa gilamu miya yimonga na kumi kuni kamemiswi ubani, 81 mpapakasi umonga wa ng'ombi yigosi, limbelele limonga ligosi na mpapakasi umonga wa limbelele ugosi wa mwaka umonga, ndava ya teta ya kutinyiswa, 82 lipongo limonga ndava ya teta ya kulekekesa kumbudila Chapanga, 83 na ng'ombi higosi hivili, mambelele mhanu gagosi, mapongo muhanu na vanalimbelele vagosi muhanu va mwaka umonga ndava ya luteta lwa uteke. lwenulo ndi lwavii luteta lwa Ahila mwana wa Enani.

84 Jumula ya mawusilu ga luteta za vilongosi va Isilaeli ndava ya pandu pa kuwusila teta paligono la kuwusiwa ndava ya Bambu kwa kunyalwa mahuta, zavili sahani kumi na hivili vya madini ga feza, nkeve za madini ga feza kumi na zivili, na visahani vya zahabu kumi na viwili. 85 Kila sahani yeyitenganizwi kwa madini ga feza, yavili na kutopa kwa kilo yimonga na wapinga na kila nkeve wavi na kutopa kwa gilamu miya nane. Vindu vyenivyo vyoha vyavi na kutopa kwa kilo ishilini na saba na gilamu miya sita kulandana na vipimu vya Lindanda la kukonganekela ndava ya Chapanga. 86 Visahani vila vya zahabu kumi na vivili vyevyamemili ubani, kila chimonga chatopa kwa utopo wa gilamu miya yimonga na kumi ngati vipimu vyeviamuliwi ku Lindanda la kukonganekela ndava ya Chapanga. Vyoha kwa pamonga vyavii na utopo wa kilo yimonga na gilamu miya zidatu na isilini. 87 Jumula ya hinyama hyoha ya luteta lwa kutinyiswa yavii mpapakasi wa ng'ombi kumi na vavili, mambelele gagosi kumi na gavili, na vanalimbelele vagosi va mwaka umonga kumi na gavili, pamonga na luteta lwa uhembe. Na mapongo kumi na gavili ndava ya luteta lwa kuwusa kumbudila Chapanga, 88 na ndava ya luteta lwa uteke, jumula ya hinyama vevawusiwi yavili ng'ombi higosi ishilini na mcheche, mambelele magosi sitini, mapongo sitini, na vanalimbelele vagosi va mwaka umonga sitini. Yeniyo ndi yavili luteta yeyawusiwu ndava ya kunyambisa pandu pa kuwusila teta.

89 Lukumbi Musa peayingili mugati ya Lindanda la kukonganekela na Chapanga, ayuwini lwami lujova kuhuma panani ya chigubiku cha lisanduku la lilaganu, chechikemiwa chigoda cha lipyana, kuhuma pagati ya vala viumbi vavili vevavi na magwaba.