1 Pelamaliki litovelu lila, Bambu Chapanga akamjovela Musa na Eliazali mwana wa Aloni mweavi mteta wa Chapanga, 2 "Mvalanga vandu voha wa Vaisilaeli kila mundu kulandana na vandu va munyumba yaki. Mvalanga vandu voha vevavi na ntanga ya miyaka ishilini na neju veviganikiwa kuhamba kungondo." 3 Hinu, Musa na mteta Eliazali vakalongela na vandu pamulima selede wa Moabu kumwambu ya Yoludani papipi na Yeliko. 4 Mvalanga vagosi vevavi na ntanga wa miyaka ishilini na neju, ngati Bambu Chapanga cheavalagizili Musa, venava ndi Vaisilaeli voha vevahumili ku Misili.

5 Vevatumbwili kuvavalangiwa Lubeni mwana tumbulanu wa Yakobo, kuhuma mumakabila genago mwavii na lukolo lwa Henoki, na lukolo lwa Palu. 6 Kuhuma kwa Hesiloni, na lukilo lwa Kalimi. 7 Zenizo ndi lwavii lukolo lwa likabila Lubeni, vandu vala vevavalangiwi vavi elufu alobaini na datu na miya saba na selasini. 8 Chiveleku cha Palu chavii Eliabu, 9 na vana va Eliabu ndi Nemueli na Datani na Abilamu. Vavili hava Datani na Abilamu ndi vavi vevahaguliwi na Vaisilaeli voha kuvya vachilongosi, nambu vavabelili Musa na Aloni, na kuvya vamulanda va Kola lukumbi pevambelili Bambu Chapanga. 10 Lukumbi lwenulo ndima yadindwiki yikavamila, vafwili pamonga na Kola na vamulanda vaki motu pewavatinyisi ndi vandu miya zivili na hamusini vevavili vamlanda va kola, vakavya lubeswa lwa vandu voha. 11 Pamonga na genago, nambu vana va Kola vafwili lepi.

12 Kuhuma likabila la Simeoni ndi vandu va lukolo lwa Nemueli na vandu va lukolo lwa Yamini na vandu va lukolo lwa Yakini. 13 Pamonga na lukolo lwa Zela na lukolo lwa Shauli. 14 Zenizo ndi lukolo lwa likabila la Simeoni, jumula yavi vagosi elufu ishilini na vavili na miya zivili.

15 Viveleku vya likabila la Gadi ndi lukolo lwavi, vavii, lukolo lwa vandu va Sefoni, lukolo lwa vandu Sefoni na lukolo lwa vandu va Hagi na lukolo lwa vandu va Shuni, 16 Lukolo lwa vandu va Ozini na lukolo lwa vandu va Eli, 17 na vandu va lukolo lwa Alodi na vandu va lukolo lwa Aleli. 18 Zenizo ndi lwavi lukolo lwa likabila la Gadi jumula vagosi vevavili na uhotola wa kuhamba kungondo vavi elufu alobaini na miya mhanu.

19 Likabila la Yuda kwavili na vana vaki Yuda ndi Eli na Onani. Venava vafwilili kumulima wa Kanani. 20 Likabila la Yuda lavili na vandu va munyumba zavi lukolo lwa Shela na Pelesi na Zela. 21 Kuhuma kwa Pelesi kwavii lukolo zivili ndi, lukolo lwa Hesiloni na lukolo lwa Hamuli 22 Zenizo ndi zavilili lukolo lwa Yuda jumula vavii vagosi vavi elufu sabini na sita na miya mhanu vevahotwili kuhamba kungondo.

23 Likabila la Isakali lavii na vandu va lukolo lwa Tola na lukolo lwa Puva, 24 na lukolo lwa Yashubu na lukolo lwa Shimloni. 25 Zenizo ndi zavili lukolo lwa Isakali, Na vagosi vevavalangiwi kuhuma mu lukolo zenizo vavili vagosi elufu sitini na mcheche na miya zidatu vevahotwili kuhamba kungondo.

26 Kuhuma mu likabila la Zebuluni lavii na lukolo za Seledi na lukolo lwa Eloni na lukolo lwa Yaleeli. 27 Zenizo ndi zavii lukolo za Zebuluni na vagosi vevavalangiwi kuhuma mulukolo zenizo ndi elufu sitini na miya mhanu.

28 Yusufu avii na vana vavili maina gavi Manase na Efulaimu, na kuhumila kwaki gahumalili makabila gavili.

29 Kuhuma mulikabila la Manase lavii na lukolo lwa Makili. Makili avi dadi wa Gileadi. 30 Venava ndi vavii likabila vya Gileadi, lukolo zavi ndi zavii lukolo lwa Yezeli na lukolo lwa Heleki, 31 na lukolo lwa Asilieli na lukolo lwa Shekemu, 32 na lukolo lwa Shemida na lukolo lwa Hefe. 33 Selofohadi mwana wa Hefeli apatili lepi mwana mgosi nambu vadala vene ndu, vene vavi Mala na Noa na Hogila na Milika na Tiliza. 34 Lwenulo ndi lwavi lukolo lwa Menasi, kuhuma mulikabila lenilo vevavalangiwi vavii vagosi elufu hamusini na zivili na miya saba.

35 Kuhuma mu likabila la Efulaimu kwavili na lukolo lwa Shutuhela na lukolo lwa Bekeli na lukolo lwa Tahani. 36 Mewawa kuhuma lukolo lwa Shutuhela kwavili na lukolo lwa Elani. 37 Lukolo zenizo zahumili mu makabila gavili ndi Manase na Efulaimu, vevavili vana va Yusufu.

38 Kuhuma mu likabila la Benjamini kwavili na lukolo lwa Bela na lukolo lwa Ashibeli na lukolo lwa Ahilamu, 39 na lukolo lwa Shufamu na lukolo lwa Hufamu. 40 mewawa kwavili na lukolo lwa Alidi na lukolo lwa Naamani, lukolo zenizo zahumili kwa Bela. 41 Zenizo zoha ndi lwavii lukolo kuhuma mu likabila la Benjamini, kuhuma mulikabila lenilo vagosi vevavalangiwi ndava ya kuhamba ku ngondo vavii elufu alobaini na mhanu na miya sita.

42 Kuhuma mu likabila la Dani kwavili na lukolo lwa Shuhamu. 43 na vagosi vevavalangiwi kuhuma mulikabila lenilo ndava ya kuhamba kungondo vavii elufu sitini na mcheche na miya mcheche.

44 Kuhuma mulikabila la Asheli kwavili na lukolo lwa Imna na lukolo lwa Ishivi na lukolo lwa Belia. 45 mewawa kuhuma kwa Belia kwavili na lukolo lwa Hebeli na lukolo lwa Malikieli. 46 Asheli avii na msikana mwakemiwi Sela. 47 Lukolo zenizi zoha ndi zavii viveleku vya lukolo lwa Asheli, jumula yavi vavii vagosi elufu hamusini na zidatu na miya mcheche.

48 Kuhuma mulikabila la Nafutali kwavi na lukolo lwa Yaseeli na lukolo lwa Guni, 49 na lukolo lwa Yeseli na lukolo lwa Shilemu. 50 Zenizo zavili lukolo za likabila la Nafutali, vagosi vevavalangiwi vevihotola kuhamba kungondo ndi vavii elufu alobaini na mhanu na miya mcheche.

51 Vagosi voha va Vaisilaeli vevalangiwi vevavii na uhotola wa kuhamba kungondo vavi laki sita na alufu yimonga na miya saba na selasini.

52 Kangi Bambu Chapanga akamjovela Musa, 53 "Vandu venavo yati vigaviwa mulima uvya wavi, kulandana na umahele wa mahina wavi. 54 Likabila lelinavandu vamahele lipewa pandu pavaha neju, na likabila lelina vandu vadebe yati lipewa pandu padebe, kila likabila yati lipewa pandu paki kuwanangana na umahele wavi amala udebe wavi. 55 Pamonga na ago ugavaji wa mulima yati mwigaviwa kwa gudugudu. Kila likabila yati lipewa mulima wavi kuwanangana na maihina ga vagogo vavi. 56 Ndima ya kila likabila yati yigaviwa kwa gudugudu kuwanangana na umahele wavi amala udebe wavi."

57 Mulikabila la Valawi kwavili na lukolo zenizi zeziyandikwi, ndi lukolo lwa Gelishoni na lukolo lwa Kohati na lukolo lwa Melali. 58 Mewawa kwavili na lukolo lwa Valibini na lukolo lwa Vahebuloni na lukolo lwa Vamahili na lukolo lwa Vamushi na lukolo lwa Vakola. Kohati avili dadi wa Amlamu. 59 Amlamu amgegili msikana wa Lawi mweikemiwa Yokobedi, mweavelikwi ku Misili. Mwenuyu ndi yula mweababakisili Amlamu vana vavili vagosi, maiina gavi ndi Aloni na Musa na msikana mmonga liina laki Miliamu. 60 Aloni avi na vana vagosi mcheche, Ndi Nadabu na Abihu na Eliazali na Ithamali. 61 Nambu Nadabu na Abihu vafwili lukumbi pevamuwusili Chapanga luteta kwa motu wangaganiwa. 62 Umahele wa Valawi vagosi vevavi na ntanga wa mwehi umonga na neju yavi vavi elufu ishilini na zidatu. Venava vavalangiwi lepi pamonga na Vaisilaeli vangi ndava vene vepewili lepi pandu pa mulima pavya pavi pa Isilaeli.

63 Venava ndi vala vagosi va Isilaeli vevavalangiwi na Musa na mteta Eliazali pamulima selede wa Moabu, kumwambu ya mfuleni Yoludani, papipi na ku Yeliko. 64 Pagati yavi asigalili lepi hati mmonga pagati ya vala vevavalangwi na Musa na mteta Aloni vevakitili mvalangu wa kutumbula kulugangatu lwa Sinai. 65 Bambu Chapanga amali kujova kuvya voha yati vifwilila kulugangatu, ndi chakaka kawaka hati mmonga mweasigalili mumi, nambu vevasigalili ndi Kalebu mwana wa Yefuni na Yoshua mwana wa Nuni.