1 Lukumbi Vaisilaeli pevatamili ku Shitimu, vagosi va Isilaeli vatumbwili kugona na vadala va Vamoabu, 2 vadala venavo vavagongolili Vaisilaeli vabwela kuhanganila ku matambiku gevatambikili michapanga yavi, na vene Vaisilaeli valili chakulya na kufugamila michapanga yavi. 3 Chenicho ndi Vaisilaeli chevahanganili na Baali wa Peoli, na Chapanga akavayomela vene. 4 Hinu Bambu Chapanga akamjovela Musa, "Uvatola vachilongosi voha va Isilaeli uvakoma palongolo yangu pandu pepalangwiki muhi pee, muni ligoga langu ndava yinu liwuka." 5 Ndava yeniyo Musa akavajovela vahamula va Isilaeli, "Kila mmonga winu yikumgana avakoma vala vagosi vinu, vevahanganili kumfugamila Baali wa Peoli."

6 Lukumbi lulolo mundu mmonga akamleta mdala mmonga Mmidiani kulindanda laki. Musa na vandu voha va Isilaeli vavembeneka pala pamlyangu wa Lindanda la kukonganekela ndava ya Chapanga. 7 Hinu Finehasi mwana wa Eliazali mwana wa mteta wa Chapanga Aloni peagawene genago, awukili pamngonganu wula akatola mgoha, 8 amlandili Muisilaeli yula mbaka mu Lindanda, akavahoma mgoha voha vavili kwa pamonga mumaleme, ukaholota muhiga yaa muisilaeli na muhiga ya mdala yula. Ndi utamu uhakau neju wewavakili Vaisilaeli vafwayi ukawuka. 9 Nambu vandu vevafwili ndava ya litovelu lila vavi vandu elufu ishili na mcheche.

10 Bambu Chapanga akamjovela Musa, 11 "Finehasi mwana wa Eliazali mwana wa mteta wa Chapanga Aloni, alidivalili ligoga langu ndava ya Vaisilaeli, pagati yinu mwene ndu ndi mweavi na wihu ngati chenivi nawu nene. Ndava yeniyo ndi navakomili lepi Vaisilaeli kwa ligoga langu. 12 Hinu, mjovela kuvya tivika lilaganu la uteke nene na mwene. 13 Mwene pamonga na chiveleku chaki yati vivya na lilaganu la kuvya vamteta wa Chapanga magono goha gangali mwishu, ndava avi na wihu ndava ya utopesa kwa Chapanga waki, na akakita utepulanisa kwa Vaisilaeli."

14 Liina la Muisilaeli mweakomiwi pamonga na mdala wa chimidiani lavi Zimli mwana wa Salu, monga ya lukolo lwa likabila la Simeoni. 15 Mewa liina la mdala wa chimidiani mweakomiwi ndi Kozibi msikana wa Suli, mweavi wa lukolo lumonga lwa likabila la Vamidiani.

16 Kangi Bambu Chapanga akamjovela Musa, 17 "Uvazangila Vamidiani na uvakomakesa, 18 ndava uhakau wevavakitili lukumbi pevavakongili kwa lijambu la Peoli na mlumbu wavi Kozibi msikana wa chilongosi wa Vamidiani, mdala yula mweakomiwi lukumbi lwa utamu uhakau wewahumalili ku Peoli."