1 Pa mwehi wa kutumbula Vandu voha va Vaisilaeli vahikili kulugangatu lwa Sini, na vene vakatama ku Kadeshi. Lukumbi pevavii kwenuko, Miliamu afwili na kuzikwa kukoko.

2 Pandu pala pevavikili kambi pavi lepi na manji ndava ya vandu vala vanywa, vene vakakonganeka na kubela kumuyidakila Musa na Aloni. 3 Vandu vakakomana kwa malovi na Musa, na kujova "Mbanga ngatifwa lukumbi valongo vitu pevafwili palongolo ya Bambu Chapanga. 4 Ndava kyani mwatiletili tete tavandu va Bambu Chapanga kulugangatu kuni? Wu mwatiletili muni tifwayi pamonga na mifuya yitu? 5 Ndava kyani mutiwusili kuhuma ku Misili na kutileta pandu apa pa kuyogofya? Penapa lepi pandu pa mabenu amala tini amala zabibu amala makongamanga. Hati manji ga kunywa kawaka!" 6 Hinu Musa na Aloni vakawuka pamsambi wa vandu wula vakahamba kuyima pamlyangu wa Lindanda la kukonganekela, vakafugama na kugundama mbaka pahi. Ndi lumuli lwa Bambu Chapanga ukahumila.

7 Kangi Bambu Chapanga akamjovela Musa, 8 "Tola ndonga yaku yila, kangi veve na mlongo waku Aloni, muvakonganisa vandu voha. Ndi palongolo ya mihu gavi, ulijovela litalahu lelivi palongolo ya mihu gavi lihumisa manji gaki. Ena yati wikita uhumisa manji, muni vandu voha pamonga na mifuya yavi vahotola kunywa." 9 Ndava yeniyo Musa akatola ndonga yeniyo pala peyavili palongolo ya Lisanduku la lilaganu, ngati chealagaziwi na Bambu Chapanga.

10 Kangi musa na Aloni vakavakemela vandu voha palongolo ya Litalau, kangi Musa akavajovela, "Myuwanila hinu, nyenye mwemuhokili, Wu mwigana tivahumisila manji kuhuma palitalau lenili?" 11 Kangi Musa akayinula chiwoko chaki, akatova litalau lila mala zivili kwa ndoga yaki. Maji gahumili gamahele, vandu vanywili pamonga na mifuya yavi.

12 Nambu Bambu Chapanga akamjovela Musa na Aloni, "Ndava nyenye mwanisadiki lepi nene, amala kunitopesa palongolo ya mihu ga Vaisilaeli, hinu ndava yeniyo yati mwiyingisa lepi pamonga na vandu avo pamulima wula wenivapeli."

13 Genaga gavili manji ga Meliba, pandu pala Vaisilaeli pavamumembenikili Bambu Chapanga, na mwene ajilangisi kwenuko kuvya Msopi pagati yavi.

14 Musa atumili vajumbi kuhuma ku Kadeshi kuhamba kwa nkosi wa Edomu akamjovela. "Mlongo waku, Isilaeli, ijova naha, Veve ukugamanya mang'aiso goha gegatikolili. 15 Chila vagogo vitu chevahambili ku Misili, kwetatamili kwa lukumbi lutali na chila Vamisili chevavang'ahili vagogo vitu, vakating'aha na tete. 16 Tete tamvembili Bambu Chapanga, mwene ayuwini chivembu chitu, atiletili mtumu wa kunani kwa kunani mweatiwusili ku Misili hinu tivi apa pa Kadeshi, muji wewubakana na mulima waku. 17 Chondi utiyidakila tipita pamulima waku. Yati tikanyatila lepi migunda yinu amala migunda yila ya mizabibu, mewa yati tinywa lepi manji ga viliva vinu. Yati tikuyilanda njila yikulu na kuhamba lumonga changali kung'anamukila lepi kwokwoha, mbaka petihuma pamulima waku."

18 Nambu nkosi wa Edomu akamuyangula, "Lepi! Yati mwipita lepi pamulima wangu, ngati mwakaliga kupita yati tihuma na kuvabuna."

19 Vaisilaeli vakamvajovela, "Tete yati tilanda njila yikulu, ngati tete namifuya yitu takanywayi manji ginu, yati tilipa. Tiyupa chondi utiyidakila ndu tipita kwa magendelu tigana lepi linenu loloha lingi."

20 Nambu nkosi wa ku Edomu akakangamisa, "Tikuvayidakila lepi." Bahapo Vaedomu manjolinjoli vakekesi vakahuma na kutovana nawu. 21 Hinu ndava muni Vaedomu vabelili kuvayidakila Vaisilaeli kupita pamulima wavi. Ndi Vaisilaeli vakang'amuka na kuhamba njila yingi.

22 Vaisilaeli voha vagendili kuhuma ku Kadeshi, vakahika kula kuchitumbi cha Holi. 23 Kula kuchitumbi cha Holi, papipi na mbaka wa Edomu, Bambu Chapanga akamjovela Musa na Aloni, 24 "Aloni yati ifwa, iyingila lepi mumulima wula wenivapeli vandu va Isilaeli ndava nyenye mwavoha mwavavili mwagayidakili lepi malagizu gangu kula ku Meliba. 25 Mtola Aloni pamonga na Eliazali mwana waki, uvaleta panani ya chitumbi Holi. 26 Kangi muhula Aloni nyula zaki na umuwalika Eliazali. Aloni yati ifwa kuni kuchitumbi." 27 Musa akitili ngati chila Bambu Chapanga cheamlagazili, ndi vakakwela kuhamba kuchitumbi Holi kuni vandu voha vaku. 28 Kangi Musa amuhuli Aloni nyula zaki za chimteta, akamuwalika Eliazali. Mwene Aloni afwili palapala pachitumbi. Hinu Musa na Eliazali vakahelela kuhuma kuchitumbi chila. 29 Vaisilaeli voha pevayuwini kuvya Aloni afwili, ndi vakamuvembela magono selasini.