1 Ligono limonga vasikana muhanu va Selofehadi vevamuhambili Musa. Mahina ga vasikana venavo ndi, Mala na Noa na Hogla na Milika na Tiliza, dadi wavi ndi Selofahadi mwana wa Hefeli mwana wa Gileadi, mwana wa Makili, Manase avii wa lukolo lwa Manase mwana wa Yusufu. 2 Ndi vamuhambalili Musa palongolo ya Lindanda la kukonganekela na kuyima palongolo Musa na mteta Eliazali na vilongosi va Isilaeli na vandu voha va Isilaeli. 3 "Dadi witu afwilalili kulugangatu. Avili lepi pagati ya valanda va Kola mweawungini pamonga kumbela Bambu, nambu afwili kwa uhakahu waki mwene na alekili lepi mwana. 4 Ndava kyani lihina la dadi witu liyaga ndava avili lepi na mwana wa chigosi? Tipela pandu pitu pagati ya valongo va dadi witu."

5 Penapo Musa apeliki muhalu wavi palongolo ya Bambu Chapanga. 6 Bambu Chapanga akaamjovela Musa, 7 "Chevijova vasikana va Selofehadi ndi chakaka, vapela pandu pamonga na valongo va dadi wavi, vautola mulima wavi. 8 Kangi uvajovela Vaisilaeli kuvya mundu yoyoha akafwayi changali kuleka mwana mgosi, mwana waki mdala ndi yati ipewa pandu peaganikiwi kupewa dadi waki. 9 Ngati avi lepi na mwana mdala, hinu pandu penapo yati vipewa valongo vaki vagosi. 10 Ngati avi lepi na valongo vagosi, hinu pandu pavi yati ukuvapela dadi vaki, vavaha na vadebe. 11 Ndi ngati dadi waki avili lepi na valongo va chigosi, hinu pandu paki yati pivya pa valongo vaki va papipi, mwene yati pivya paki ngati vindu vyaki. Lenili ndi lilagisu kwa Vaisilaeli pagati ya malagizu goha, ngati nene Bambu Chapanga chenikulagizi."

12 Kangi Bambu Chapanga akamjovela Musa, "Kwela kunani ya chitumbi ichi cha Abalimu uwulola mulima wenivapelili Visilaeli. 13 Ukamala kuwulola mewa veve yati wifwa ngati muhaja waku Aloni cheafwili, 14 ndava wabeli kuniyidakila mihilu yangu kulugangatu lwa Sini. Lukumbi vandu voha pevavembeniki ndava ya nene ku Meliba kula, mwalekili lepi ukulu wangu ulolekana palongolo yavi pevaganili vapewa manji." (Meliba ndi chinyepa cha manji ga Kadeshi kulugangatu lwa Sini.)

15 Musa akamjovela Bambu Chapanga, 16 "Veve Bambu Chapanga mweukuvapela vandu wumi, nikuwomba umhagula mundu wa kuyimalila vandu ava voha, 17 yula mweilongolela na kuvalongosa mumahengu gavi goha, muni vakoto kuvya ngati limbelele langali mdimaji."

18 Ndava yeniyo Bambu Chapanga akamjovela Musa, "Mtola Yoshua mwana wa Nuni, mundu mweavi na mpungu wangu mgati yaki mvikila mawako panani yaki, 19 ndi umuyimika palongolo ya mteta Eliazali na vandu voha, ndi umgotolela lihengu lenilo palongolo yavi. 20 Umpela hotola waku chidogo muni vandu voha wa Vaisilaeli vamyidakila. 21 Mwene yati akumtegemela mteta Eliazali yula mweakummanyisa maganu gangu kwa kukota palongolo ya Bambu kwa kutumila liganga la ulimu na tumimu. Kwa njila iyi, Eliazali yati akumulongosa Yoshua na Vaisilaeli voha pevihoma na peviyingila." 22 Musa akakita ngati Chapanga cheamlagizi. Amtolili Yoshua na kumuyimika palongolo ya mteta Eliazali na vandu voha wa Vaisilaeli. 23 Kangi akamvikila mawoko pamutu na kumpela uhotola ngati chealagaziwi na Bambu Chapanga.