1 Pamwaka wa pili mumwehi wa pili ligono la kutumbula, vana va Isilaeli pevahumili ku Misili, Bambu Chapanga alongili na Musa mugati ya Lindanda la kukonganekela ndava ya Chapanga kulugangatu ku Sinai, amjovili genaga. 2 "Mvalanga vandu voha va Isilaeli, kulanda lukolo zavi na vandu va munyumba vavi kwa mvalangu wa mahina ga kila mgosi mmonga mmonga. 3 Veve na Aloni yati mkuvavalanga kwa kulandana na lukolo lwavi vagosi voha va pa Isilaeli vevavi na miyaka ishilini na kuyendelela vevihotola kutovana ngondo. 4 Kangi mgosi mmonga kuhuma mukila likabila, mweavi chilongosi wa vandu vaki yati akuvatangatila kuvavalanga vandu. 5 Genaga ndi mahina ga vandu vevakukutangatila.

Kuhuma mu likabila la Leubeni ndi avili Elisuli, mwana waki Shedeuli, 6 Kuhuma mu likabila la Simeoni, avili Shelumieli mwana wa Suli Shadai, 7 Kuhuma mu likabila la Yuda, ndi avili Nashoni mwana wa Aminadabu, 8 Kuhuma mu likabila la Isakali, ndi avili Netaneli mwana wa Suali, 9 Kuhuma mu likabila la Zebuluni, ndi avili Eliabu mwana wa Heloni. 10 Kuhuma mu vana va Yosefu, kuhuma mulikabila la Efulaimu ndi avili Elishama wana wa Amihudi, va Manase ndi avili mwana waki Pedasuli; 11 Kuhuma mu likabila la Benyamini, ndi avili Abidani mwana wa Gideoni, 12 Kuhuma mu likabila la Dani, ndi avili Ahiezeli mwana wa Amishadai, 13 Kuhuma mu likabila la Asheli, ndi avili Pegieli mwana wa Okilani, 14 Kuhuma mu likabila la Gadi, ndi avili Eliasafu mwana wa Deueli, 15 Kuhuma mu likabila la Nafutali, ndi avili Ahila mwana wa Enani." 16 Venava ndi vilongosi vevahaguliwi mu vandu voha va Isilaeli, ngati vavilongosi vakulu va makabila gavi na vilongosi va lukolo za Isilaeli.

17 Hinu Musa na Aloni vakavatola vala vandu vagosi vevaluwuliwi mahina gavi, 18 mu ligono lilolo la kutumbula la mwehi wa pili vakavakemela vandu voha vevavalangiwi kila mmonga kuwanangana na vandu va munyumba yaki na lukolo lwaki. Kangi vandu voha vevavi na ntanga ya miyaka ishilini amala neju vayandikiswi mahina gavi, 19 ngati Bambu Chapanga cheamlagazi Musa. Ndi Musa avavalingi vandu venava kula kulugangatu lwa Sinai. 20 Kuhumu muuveleku wa Leubeni mwana wa kutumbula wa Yakobo, vandu voha vevavili na ntanga ya miyaka ishilini amala neju vevavili njwee kuhamba kungondo vevavalangiwi mahina gavi mmonga mmonga kuwanangana na lukolo zavi na vandu va munyumba zavi. 21 Vevavalangiwi ndi vavi vandu elufu alobaini na sita na miya muhanu.

22 Kuhuma mu likabila la Simeoni kulandana na viveleku vyavi, vagosi voha vevavili na ntanga ya miyaka ishilini amala neju vevahotwili kuhengela ku ngondo vavalangiwi na kuyandikwa kwa mahina, mmonga mmonga, kulandana na lukolo lwavi na vandu vavi.

23 Vevavalangiwi kuhuma mulikabila la Simioni vavii vandu elufu hamusini na tisa na miya zidatu.

24 Kuhuma mu likabila la Gadi, Vagosi voha vevavili na ntanga ya miyaka ishilini amala neju vevahotwili kuhengela ku ngondo vayandikwi kwa mahina, mmonga mmonga, kulandana na lukolo lwavi na vandu vavi.

25 Vandu vevavalangiwi vavi vandu elufu alubaini na muhanu miya sita na hamusini. 26 Vevalandili ndi va likabila la Yuda, Vagosi voha vevavili na ntanga ya miyaka ishilini amala neju vevahotwili kuhengela ku ngondo vavalangiwi na kuyandikwa kwa mahina, kulandana na lukolo lwavi na vandu vavi.

27 Vevavalangiwi ndi vavi vandu elufu sabini na mcheche na miya sita.

28 Vakalanda va likabila la Isakali, vagosi voha vevavili na ntanga ya miyaka ishilini amala neju vevahotwili kuhengela ku ngondo vavalangiwi na kuyandikwa kwa mahina, kulandana na lukolo lwavi na vandu vavi.

29 Vevavalangiwi vavi vandu elufu amsini na mcheche na miya mcheche. 30 Kuhuma mu likaabila la Yosefu, vagosi voha vevavili na ntanga ya miyaka ishilini amala neju vevahotwili kuhengela ku ngondo vavalangiwi na kuyandikwa kwa mahina, kulandana na lukolo lwavi na vandu vavi.

31 Vevavalangiwi vavi vandu elufu hamusini na saba na miya mcheche. 32 Kuhuma mu lukolo lwa Yosefu, mweavili mwana wa Eflaimu.

Vagosi voha vevavili na ntanga ya miyaka ishilini amala neju vevahotwili kuhengela ku ngondo vavalangiwi na kuyandikwa kwa mahina, kulandana na lukolo lwavi na vandu vavi.

33 Vevavalangiwi vavi vandu elufu alubaini na miya muhanu. 34 Vakalanda va likabila la Manase mweavili mwana wa Yusufu.

Vagosi voha vevavili na ntanga ya miyaka ishilini amala neju vevahotwili kuhengela ku ngondo vavalangiwi na kuyandikwa kwa mahina, kulandana na lukolo lwavi na vandu vavi.

35 Vevavalangiwi vavi vandu elufu selasini na hivili na miya hivili. 36 Kuhuma mu likabila la Benyamini, vagosi voha vevavili na ntanga ya miyaka ishilini amala neju vevahotwili kuhengela ku ngondo vavalangiwi na kuyandikwa kwa mahina, kulandana na lukolo lwavi na vandu vavi.

37 Vavi vandu elufu selasini na muhanu na miya mcheche. 38 Vakalanda va likabila la Dani, Vagosi voha vevavili na ntanga ya miyaka ishilini amala neju vevahotwili kuhengela ku ngondo vavalangiwi na kuyandikwa kwa mahina, kulandana na lukolo lwavi na vandu vavi.

39 Vevavalangiwi vavi vandu elufu sitini na hivili na miya saba. 40 Kuhuma mu likabila la Asheli, Vagosi voha vevavili na ntanga ya miyaka ishilini amala neju vevahotwili kuhengela ku ngondo vavalangiwi na kuyandikwa kwa mahina, kulandana na lukolo lwavi na vandu vavi.

41 Vevavalangiwi vavi vandu elufu alubaini na yimonga na miya mcheche. 42 Vakalanda va likabila la Nafutali, Vagosi voha vevavili na ntanga ya miyaka ishilini amala neju vevahotwili kuhengela ku ngondo vavalangiwi na kuyandikwa kwa mahina, kulandana na lukolo lwavi na vandu vavi.

43 Vevavalangiwi vavi vandu elufu hamusini na datu na miya mcheche. 44 Venava ndi vandu vevavalangiwi na Musa na Aloni kuni vitangatiliwa na vachilongosi kumi na vavili vala va Isilaeli, kila chilongosi avii pandu pa vandu va ukolo lwaki. 45 Hinu vagosi voha va Isilaeli vevavi na ntanga kutumbula miyaka ishilini amala neju, vevahotwili kuyingila na kuvya manjolinjoli pamulima wa Isilaeli, 46 jumula ya mvalangu wavi yavili vandu laki sita na elufu zidatu na miya muhanu na hamusini.

47 Nambu Valawi vavalangiwi lepi pamonga na vala vandu va makabila gangi, 48 Ndava Chapanga amjovili Musa, 49 "Ukoto kuvavalanga vandu va likabila la Lawi pamonga na vandu va likabila la Vaisilaeli vangi. 50 Pahali paki yati akuvahagula vavya vayangalila va Lindanda la Msopi, na vyombo vyaki vyoha na kila chindu chechivi mugati yaki, yati vigega Lindanda pamonga na vyombo vyaki vyoha. Yati vihengela mugati mula na kulitindila. 51 Kangi lukumbi lwa kuliwusa Lindanda ndava ya kuyendelela na lugendu Valawi ndi vevakuliwusa, mewa lukumbi lwa kutendekeha kavili pandu peviganikiwa kutama Valawi ndi vevihenga lihengu lenilo, mundu yungi yoyoha mweihegelela papipi na Lindanda lenilo yati ikomiwa. 52 Vaisilaeli vangi yati vivika kambi zavi chikundichikundi, kila mundu ivya pa kambi yaki pahi ya bendela yaki. 53 Nambu Valawi yati vivika kambi zavi kulitindila Lindanda la Musopi, kuni vakulikita ulonda muni mundu yeyoha akoto kulihegelela na kukita ligoga langu likayaka kwa va Isilaeli, kangi Valawi ndu ndi vevakuliyangalila na kukita mahengu goha ga mu Lindanda lenilo." 54 Ndava yeniyo Vaisilaeli vahengili ngati Bambu Chapanga cheamlagazili Musa.