1 Bambu Chapanga akamjovela Musa, 2 "Vajovela Vaisilaeli naha, Mundu akavika chilapu yati akumuwusila Bambu Chapanga mundu amuhengela Bambu ndu, nambu ngati mundu mwenuyo ihotola lepi kumuwusa mundu mwenuyo ndi alipa mashonga chechiwanangana na samani ya mundu mwenuyo ngati; 3 Mgosi wa miyaka ishilini mbaka miyaka sitini yati igombolewa kwa hipandi hamsini ya madini ga feza kuwanangana na chipimu cha pandu pamsopi. 4 Ngati ndi mdala yati igombolewa kwa hipandi selasini ya madini ga feza. 5 Ngati mundu mwenuyo avi na miyaka mhanu mbaka miyaka ishilini akavyayi mgosi yati igombolewa kwa hipandi ishilini ya madini ga feza na ngati msongolo na akavyai mdala yati igombolewa kwa hipandi kumi ya madini ga feza. 6 Ngati mwana wa ntanga wa mwehi umonga mbaka miyaka mhanu yati igombolewa kwa hipandi muhanu ya madini ga feza ngati msongolo na hipandi hidatu ya madini ga feza ngati mwana mwenuyo ndi mdala. 7 Ngati mundu mwenuyo ntanga waki neju ya miyaka sitini ndi mgosi yati igombolewa kwa hipandi kumi na muhanu vya madini ga feza na ngati mdala yati igombolewa kwa hipandi kumi ya madini ga feza."

8 Nambu ngati mundu mwenuyo mweaviki nazili ndi mngangu na ihotola lepi kulipa galama yaki, hinu mundu uyo yati ipelekwa kwa Mteta wa Chapanga. Mteta yati akumlona thamani yake kulingana na uwezo wa huyo aliyeweka nazili.

9 "Ngati nazili yene ndi yivala chinyama, vandu vawusa kwa Bambu Chapanga luteta lwa chinyama chechiyidakiliwa mukufugamila kuvya luteta kwa Bambu Chapanga, chinyama chenicho ndi ndava ya Bambu Chapanga ndu. 10 Yiyidakiliwa lepi kubadilisa chinyama chenicho kwa chingi chochoha chila, yivya chabwina kwa chihakau amala chihakau kwa chabwina. Ngati achibadilisi na chinyama chingi ndi hinyama yoha hivili yati hivya ndava ya Bambu Chapanga. 11 Ngati nazili yeniyo ndi ya chinyama changayidakiliwa kwa kufugamila, mundu mweawusili, yati ileta chinyama chila kwa mteta wa Chapanga, 12 na mteta wa Chapanga yati ihamula samani yaki kuwanangana na ubwina amala uhakau waki. Chila cheihamula Mteta wa Chapanga ndi chechivyayi. 13 Nambu ngati mkolo chinyama igana kugombola, ndi yati iyonjokesa lilundu limonga pagati ya muhanu la beyi ya chinyama chenicho."

14 "Mundu akayiwusa nyumba yaki ndava ya Bambu Chapanga, mteta wa Chapanga yati ihamula samani yaki kuwanangana na ubwina amala uhakau waki. Chila cheihamula, ndi cheyivyayi. 15 Ngati mundu mweaviki nyumba yila akagana kuyigombola, ndi yati iyonjokesa lilundu limonga pagati ya muhanu la beyi ya nyumba yila, ndi yene yivya yaki kangi."

16 "Mundu akawusa ndima ya vandu va munyumba yaki na kuyiwusa ndava ya Bambu Chapanga ndi, beyi yaki yipimwa kuwanangana na mbeyu zeimijiwa ku mgunda wenuwo, kwa kila kilo ishilini za shaili beyi yaki yati yivya hipandi hamsini ya madini ga feza. 17 Ngati mundu aviki mgunda waki kuvya ndava ya Bambu Chapanga pamwaka wa mselebuko wa miyaka hamsini, beyi yaki ndi yiganikiwa yivya yila. 18 Nambu ngati aviki mgunda waki pewamaliki mselebuko wa miyaka hamusini, mteta wa Chapanga yati ihamula beyi yaki kuwanangana na mvalangu wa miyaka yeyisigalili kuhika mwaka wa mselebuko wa miyaka hamsini yeyigelekela na beyi yaki yati yipunguzwa. 19 Ngati mwene igana kuugombola mgunda waki, ndi yikumgana ayonjokesa lilundu limonga pagati ya malundu muhanu ya beyi ya mgunda wula, kangi yati uvya waki. 20 Nambu ngati aganili lepi kuugombola mgunda wenuwo amala amgulisili mundu yungi, hinu mgunda wenuwo ukoto kugombolewa kavili. 21 Pamwaka wa mselebuko wa miyaka hamsini mgunda wenuo yati wilekewa kuvya wa Bambu Chapanga magono goha. Mteta wa Chapanga ndi mweitalalila."

22 Ngati mundu auviki kwa Bambu Chapanga mgunda weagulili, wenuwo lepi mgunda waki wa kuhala. 23 Mteta wa Chapanga yati ivika beyi kwa kuvalangila mashonga kwa miyaka yeyisigalili mbaka kuhika mwaka wa mselebuko wa miyaka hamsini na mundu mwenuyo yati iganikiwa kulipa kwa beyi yaki ngati chindu cha msopi kwa Chapanga. 24 Nambu mumwaka wa mselebuko wa miyaka hamsini, mgunda wenuwo ndi yati uwuyiswa kwa mundu yula mweagulisi.

25 Kila samani yati yipimwa kwa Chipimu cha kutopa wa madini ga feza kuwanangana na chipimu cha pandu pamsopi.

26 Yiyidakiliwa lepi kumuwusa mvelekwa wa kutumbula wa chinyama kwa Bambu Chapanga, muni chinyama chenicho chimali kuvya cha Bambu Chapanga yikavya ng'ombi amala limbelele. 27 Ngati chinyama chiyidakiliwa lepi mukumfugamila Chapanga, mwene yati akuchigula kuwanangana na beyi yeyivikiwi. Ngati igombolewa lepi, hinu yati iguliswa kuwanangana na beyi yeyivikiwi na mteta.

28 Nambu chindu chochoa cheavinachu mundu chechiwusiwi kwa Bambu Chapanga, yivya mundu amala chinyama amala ndima ya mlongo yati chiguliswa lepi amala kugombolewa. Muni chindu chenicho ndi chamusopi neju. 29 Mundu yeyoha mweawusiwi kwa Bambu Chapanga muni ayongomeswa, mundu mwenuyo, iganikiwa akomewa.

30 "Lilundu limonga pagati ya kumi la mabenu ga mulima yikavya nganu amala matunda, vyoha ndi vindu vya Bambu Chapanga, ndi vyamsopi kwa Bambu Chapanga. 31 Ngati mundu igana kugombola lilundu laki limonga pagati ya kumi yati iyonjokesa lilundu limonga pagati ya muhanu la beyi yaki. 32 Msambi wa mifuya peuvalangiwa, kila mfuya wa kumi ndi wa Bambu Chapanga. 33 Mundu yeyoha iganikiwa lepi kuhangula chinyama chenicho ndi chabwina amala chikahu, mewa hinyama yeniyo katu yati yibadilishwa lepi na hinyama yingi. Ngati yibadilishwi na hinyama yingi, hinu hinyama yoha yivili yivya ya Bambu Chapang, katu yati vigombolewa lepi."

34 Genaga ndi malagizu ga Bambu Chapanga geampelili Musa panani ya chitumbi cha Sinai muni avajovela Vaisilaeli.