1 Bambu Chapanga akamujovela Musa, 2 "Vajovela vandu va Isilaeli naha, nene ndi Bambu Chapanga, Chapanga winu. 3 Katu mkoto kukita ngati chevikita vandu va mulima wa ku Misili kwemwatamili, mewa mkoto kukita ngati chevikita vandu va mulima wa ku Kanani pandu kwenikuvapeleka. Katu mkotoka kuyiga gevikita venavo. 4 Nyenye mulanda malagizu gangu na kugakamula. Nene ndi Bambu Chapanga, Chapanga winu. 5 Mugakamula malagizu gangu na mihilu yangu, muni mundu mweikita chenicho ndi yati akuhihengela muwumi waki. Nene ndi Bambu Chapanga."

6 "Mundu yeyoha wa Isilaeli iganikiwa lepi kugonekana na mlongo waki wa papipi. Nene ndi Bambu Chapanga. 7 Katu kotoka kumdenyela utopesa dadi waku kwa kukonganeka na nyina waku mweakuveliki. Kotoka kumvevesa, mwene ndi nyina waku. 8 Katu ukotoka kumdenyela utopesa dadi waku kwa kukonganeka na mmonga wa vadala vaki. Muni venavo ndi vanyina zaku. 9 Katu kotoka kugonekana na mlumbu waku wa kuvelekana amala mlumbu weukonganiki kwa mau amala kwa dadi akavya avelikwi munyumba yeniyo amala pandu pangi. 10 Katu kotoka kugonekana na mjukulu waku, mwana wa msongolo waku amala msikana waku, ukakita chenicho ukujidenyela utopesa wamwene. 11 katu kotoka kugonekana na msikana mweavelikwi na nyina waku wa pamuhana mweagegiwi na dadi waku, msikana mweneuyo ndi mlumbu waku. 12 Katu kotoka kugonekana na hongi waku, muni hongi waku ndi mlumbu wa dadi waku wa kuvelekwa. 13 Katu kotoka kugonekana na mlumbu wa nyina waku, ndava mwenuyo ndi mlongo wa papipi wa nyina waku. 14 Katu kotoka kumpela soni dadi waku mvaha amala mdebe kwa kugonekana mdala waki, muni mwenuyo ndi nyina waku. 15 Katu kotoka kugonekana na mdala wa mwana waku, muni mwenuyo ndi mkohanu waku. 16 Katu kotoka kugonekana na mdala wa mhaja waku, muni mwenuyo ndi mlamu waku. 17 Ukagonekana na mdala, katu kotoka kugonekana na msikana waki amala vajukukulu waki. Ndava ukavahangisanayi ukita chindu chihakahu. 18 Katu kotoka kumgega mlumbu wa mdala wako lukumbi mdala waku akona mumi, chenicho yati chileta ngondo."

19 "Katu kotoka kugonekana na mdala lukumbi avi mumwehi. 20 Katu kotoka kugonekana na mdala wa muyaku, ukakita chenicho yati ukujikita wangayidakiliwa mukufugama. 21 Katu kotoka kumuwusa mwana waku kuvya luteta kwa chapanga Moleki muni kwa kukita chenicho mukulisopa soni lihina la nene Bambu Chapanga waku. 22 Katu kotoka kugonekana na mgosi muyaku ngati mdala. Chapanga iyomeswa neju na lijambu lenilo. 23 Katu kotoka kugonekana na chinyama muni ukoto kujikita uvya wangayidakiliwa, mewa mdala akotoka kujipeleka kwa chinyama ndava agonekana nachu, muni chenicho ndi kuhoka."

24 "Mkoto kujihakasa kwa kukita mambu genago muni kwa kukita mambu ago nivavingi vandu va milima yeyivi kulongolo yinu ndava vene vakita mambu ago na kujihakasa. 25 Mahengu gavi gakitili mulima uwu nikotoka kuuyidakila, na nene Bambu Chapanga navapelili mbunu ndava ya kubuda kwavi na nene nikavabela vakotoka kutama mumulima uwu. 26 Nambu nyenye mwava Isilaeli pamonga na vayehe vevitama pagati yinu ndi yikuvagana kulanda mihilu yangu na malagizu gangu na mkoto kukita gala gegakuniyomesa Bambu Chapanga. 27 Ndava muni mambu ago gahakahu gakitiwi na vandu va mulima uwu kwakona nyenye mwangabwela, vauhakisi mulima na vakitili vandu va mulima uwu vakotoka kuyidakiliwa palongolo yangu. 28 Na nyenye mukakitayi mulima uwu ukotoka kuyidakiliwa palongolo yangu yati nikuvawusa muwuka mumulima uwu ngati chenavawusili vandu va milima yingi vevavili mumulima uwu kwakona nyenye kubwela. 29 Vandu vevikita mambu genago gegiyomesa ndi yiganikiwa vabaguliwa kutali na vandu vavi.

30 Ndava yeniyo mhiyidikila mihilu yenivapeli mkotoka kulanda mivelu ya kuyomesa yevakitili vandu vevatamili kwakona nyenye, mkoto kujihakasa ndava ya genago. Nene ndi Bambu Chapanga, Chapanga winu."