1 Mundu yeyoha akaleta luteta lwa mabenu kwa Bambu Chapanga, yikumgana ayaga na kuvya uhembe nyilili. Ausopa mahuta ga zeituni na kuvika ubani panani yaki, 2 na kuvapelekela vamteta va Chapanga va lukolo lwa Aloni. Mteta wa Bambu Chapanga yati iteka chiwoko chimonga cha uhembe nyilili na mahuta, pamonga na ubani vyoha na kutinyisa panani ya pandu pa kuwusila teta uvya luteta lwa kumbukumbu kwa Bambu Chapanga. Ndi luteta lwa kutinyiswa kwa motu lwelunungalila bwina lwa kumganisa Bambu Chapanga. 3 Luteta lwelusigalili yati vitola Aloni na vana vaki. Na uhembe wula wewawusiwi kwa Bambu Chapanga ndi wamsopi neju pagati ya teta zezawusi kwa Bambu Chapanga kwa motu panani ya pandu pa kuwusila teta.

4 Ngati mundu akumuwusila Bambu Chapanga libumunda lelitendekiwi kwa lupyupu lwa motu ngati luteta lwelutendekiwi kwa uhembe nyililili, lwenulo luvya mabumunda gangali lichali ya uhembe nyilili weuhangisini na mahuta ga zeituni, amala mabumunda gegakepili gangali ngemeku na ganganyalwa mahuta.

5 Ngati mundu akumuwusila Bambu Chapanga luteta lwa mabumunda gegatendelekiwi mlumbani, mabumunda genago yati givya ga uhembe nyilili gangali ngemeku na gavya ganyaliwi mahuta ga zeituni. 6 Mabumunda genago yati gidumuliwa dumuliwa na kusopwa mahuta ga zeituni, lwenulo ndi luteta lwa uhembe nyilili.

7 Ngati luteta lwa mabumunda gatelikwi muchiviga, genago yati givya ga uhembe nyilili na kusopwa mahuta ga zeituni. 8 Umuletela Bambu Chapanga luteta lwa vyakulya vyevitelikwi kwa vindu vyeniyvo, mgotolela mteta wa Chapanga na mwene yati akulupeleka pandu pa kuwusila teta. 9 Mteta wa Chapanga yati itola pandu pa luteta lwenulo yivya luteta lwa ukumbusho na kutinywiswa panani ya pandu pa kuwusila teta. Lwenulo ndi luteta lwa kutinyiswa kwa motu lwelukumnungalila bwina na kumganisa Bambu Chapanga. 10 Pandu pa uhembe weusigalili ndi yati vitola Aloni na vana vaki. Na uhembe wenuwo wewawusiwi kwa Bambu Chapanga ndi wamsopi neju pagati ya teta zezawusiwi kwa Bambu Chapanga kwa motu panani ya pandu pa kuwusila teta.

11 Luteta lwolwoha lwa chakulya lwelupelekwa kwa Bambu Chapanga lukotoka kuvikwa ngemeku, muni yiganikiwa lepi kuhengela ngemeku amala wuchi muluteta zezipelekwa kwa Bambu Chapanga kwa motu. 12 Wihotola kumletela Bambu Chapanga mabenu gaku ga kutumbula ngati luteta, nambu mabenu genago gakotoka kuwusiwa kwa kutinyiswa papandu pa kuwusila teta ngati munungalilu wa kumganisa Bambu Chapanga. 13 Sopa mwinyu muluteta zaku zoha za mabenu. Katu ukoto kuleka kusopa mwinyu wa lilaganu la Chapanga waku muluteta lwaku lwa mabenu, sopa mwinyu muluteta zaku zoha. 14 Ukampela Bambu Chapanga luteta lwa mabenu gaku ga kutumbula umpela vyakulya vyemupondili kuhuma munjechela zivisi, na kuyanika kwa motu. 15 Kangi uyongesa mahuta ga zeituni na ubani panani yaki, lwenulo ndi yati luvya luteta lwa uhembe weuwusiwi kwa Bambu Chapanga. 16 Mteta wa Chapanga yati itinyisa pandu pa luteta lwa mabenu gegapondiwi na mahuta ga zeituni na ubani waki woha, kuvya luteta lwa ukumbusho, lwenulo ndi luteta lweluwusiwa kwa Bambu Chapanga kwa motu.