1 Bambu Chapanga akamjovela Musa, 2 "Uvajovela vandu va Isilaeli naha, mundu yeyoha pagati ya Vaisilaeli amala myehe mweitama pagati yinu, akamuwusa luteta mwana waki yeyoha kwa mchapanga weukemiwa Moleki ndi yikumgana akomiwa. Vandu va pandu penapo yati vakumkoma kwa kumtova maganga. 3 Nene namwene yati nikumyomela mundu mwenuyo na kumbagula atama kutali na vandu vaki ndava amuwusi luteta mmonga wa vana vaki kwa chapanga Moleki na alikiti Lindanda langu Lamsopi likotoka kuyidakiliwa na kulikita Liina langu lamsopi liveveswa. 4 Ngati vandu va pandu penapo yati vakumbuna lepi mundu mwenuyo mweamuwusili mumonga wa vana vaki kwa chapanga mweikemiwa Moleki, 5 nene namwene yati nikumuyomela mundu mwenuyo pamonga na vandu va munyumba yaki. na nene yati nikumvinga awuka pagati ya vandu va Isilaeli, mwene pamonga na vandu voha vevakumlanda vevangavya vasadikika kwa nene na vakumfugamila chapanga Moleki."

6 "Ngati mundu yeyoha akuvahambila valondola na kugahambila mahoka na kuleka kunisadika nene, yati nikumuyomela mundu mwenuyo na kumbagula kutali pagati ya vandu vangu. 7 Hinu mjinyambisa, na muvya Mwavamsopi, ndava nene ndi Bambu Chapanga, Chapanga winu. 8 Mkamula malagizu gangu na kugalanda. Nene ndi Bambu Chapanga mwenikuvanyambisa."

9 "Mundu yeyoha mweakumpela likoto dadi waki amala nyina waki, yikumgana akomiwa. Ampeli likoto dadi waki amala niyina waki, ndava yeniyo ngasi yaki yati yivya panani ya mutu waki mwene."

10 "Ngati mgosi akakita ukemi na mdala wa muyaki, ndi yikuvagana voha vavili vakomiwa. 11 Mgosi akagonekana na mdala wa dadi waki, mwenuyo akumpela soni dadi waki, ndi voha vavili yikuvagana vakomiwa. Ngasi yavi yati yivya panani ya mitu yavi vene. 12 Ngati mgosi yeyoha akagonekana na mkamwana waki, voha vavili ndi yikuvagana vakomiwa. Vawewiki, ngasi yavi ndi yati yivya mumitu yavi vene. 13 Ngati mgosi yeyoha akagonekana na mgosi muyaki ngati mgosi cheigonekana na mdala, hinu voha vavili ndi yikuvagana vakomiwa muni vahengili lijambu lihakahu neju, ngasi yavi ndi yivya mumitu yavi vene. 14 Ngati mgosi agegi mdala mewawa amgegili nyina waki, wenuwo ndi uhakau, voha vadatu ndi yikuvagana vatinyiswa tikitiki kwa motu muni vahengili uhakau. Mkita chenicho muni uhakau wenuwo ukoto kuvya pagati yinu. 15 Ngati mgosi yeyoha akagonekana na chinyama, ndi yikumgana mgosi mwenyo kukomiwa na chinyama chenichoa chiganikiwa chikomiwa. 16 Mewawa ngati mdala akachihegelela chinyama chigosi na kugonekana nachu, ndi yiganikiwa mdala mwenuyo akomiwa pamonga na chinyama chenicho, ngasi yaki yati yivya panani ya mutu wa mdala mwenuyo."

17 "Yikavya mgosi akamgega mlumbu waki, msikana mweavelekwi na dadi waki kuvala amala msikana mweavelikwi na nyina waki kuvala, na msikana mwenuyo ayidakilini na mgosi yula mweavi mhaja waki na kugonekana nayu chenicho ndi yomeso, ndi yikuvagana voha vavili vabaguliwa na vandu vavi muni vakitili lijambu la soni. Mgosi mwenuyo yati ibuniwa ndava ya geakitili. 18 Ngati mgosi akagonekana na mdala mweavi mumwehi, na kugubukula pa chinyepa cha peyihumila ngasi ndi voha vavili yikuvagana vabaguliwa na vandu vavi, mgosi yula akakonganeka na mdala mweavi mumwehi mewawa na mdala yula akonganiki na mgosi kuni avi kumwehi. 19 Ukotoka kugonekana na mhaja mwana wa nyina waku mvaha amala hongi waku, muni lenilo yati likuvadenyela utopesa valongo vaku va papipi. Nyenye mwavoha yati mupewa mbunu. 20 Ngati mgosi akagonekana na mdala wa dadi waki mvaha amala mdebe, akuvapela soni vadadi vaki mvaha amala mdebe. Voha vavili yati vipewa mbunu ndava ya kubuda kwavi, voha yati vifwa changali kuveleka vana. 21 Ngati mgosi akamgega mdala wa mhaja waki mweavii mumi, lijambu lenilo ndi labwina lepi, ampeli soni muhaja waki, voha vavili yati vifwa changali kuveleka vana."

22 Bambu Chapanga ijova, "Yikuvagana kukamula na kulanda mihilu na malagizu gangu, muni ndima yenikuvapeleka kutama yiganikiwa yikotoka kuvabela. 23 Katu mkoto kutama kwa kuyiga mivelu ya milima yenikuyivinga palongolo yinu. Navayomili neju kwa mambu gevakitili. 24 Nambu nimali kuvajovela, ‘Yati mukuyitola ndima yavi, na nene yati nikuvapela ndima yeniyo yivya yinu, ndima yeyiganikiwa kwa kugaba na kudimila mifuya.’ Nene ndi Bambu Chapanga, Chapanga winu, mwenivabagwili muvya kutali na vandu va milima yingi. 25 Ndava yeniyo ndi yikuvagana kulekanganisa pagati ya hinyama yeyiyidakiliwa na yangayidakiliwa na pagati ya chidege yangayidakiliwa na yangayidakiliwa kwa kufugama. Mkoto kujikita muvya mwavangayidakiliwa ndava ya hinyama amala chidege amala chiumbi chochoha chichilandala pamulima, vila vyenavajovili kuvya viyidakiliwa lepi kwa kufugama. 26 Ndava muni nene Bambu Chapanga ndi namsopi, na nene nivabagwili nyenye na vandu va milima yingi muni muvya mwavandu vangu namwene, na nyenye yati muvya mwavamsopi."

27 "Mgosi amala mdala yeyoha mweavi mlondola amala muhavi amala mweikwesa mizuka, yati mukuvakoma kwa kuvatova maganga. Na ngasi yavi yati yivya mumitu yavi vene."