1 Bambu Chapanga akamjovela Musa, 2 gegigelekela ndi malagizu kumvala mundu mweavi na utamu wa chikumba muligono la kunyambiswa kwaki, peilama yati ipelekwa kwa mteta wa Chapanga. 3 Mteta wa Chapanga yati akumlingulila kuvala ya lindanda. Ngati utamu wa chikumba wenuwo ulamili, 4 hinu, mteta wa Chapanga yati ilagiza vandu valeta hidege hivili vyevii mumi yveviyidakiliwa mukufugamila na chipandi cha mkongo wa mwelezi na litonji la langi yidung'u na lipanda la chikongo cha hisopo ndava mundu mwenuyo anyambiswa kavili. 5 Kangi mteta wa Chapanga yati ilagiza vahinja chidege chimonga muchiviga chechivi na manji gabwina ga chinyepa. 6 Mteta wa Chapanga yati itola chidege chingi chechivi mumi na chipandi cha mwelezi na litonji la langi yidung'u lila na limbanda la hisopo na kujwiga vyoha mungasi ya chidege chila chechihinjiwi. 7 Kangi, yati akumnyunyusila mundu mwenuyo mweanyambiswi ngasi yila mala saba ndi mteta yati akuvakokosela vandu kuvya mundu yula anyambiswi. Kangi yati akuchilekekesa chidege chila chihamba. 8 Mundu mwenuyo yati ichapa nyula zaki, yati iketa mayunju gaki, na kusamba, mwene ivya anyambiswi. Pegimalika genago yati iwuya kukambi, nambu yati itama kuvala ya lindanda laki kwa magono saba. 9 Ligono la saba yati iketa mayunju gaki goha na manjwemba na ngopi za mihu gaki na mayunju gaki goha gegavii muhiga. Kangi yati ichapa nyula zaki na kusamba, mwene yati ivya anyambiswi.

10 Ligono la nane yati ileta mambelele gavili magosi ga ntanga wa mwaka umonga gangali chilema, limbelele limonga lidala langali chilema, kilo zidatu za uhembe nyilili weuhangisini na mahuta ga zeituni ndava ya luteta lwa mabenu pamonga na mahuta ga zeituni selusi yimonga ya lita. 11 Mteta wa Chapanga mweakumkokosa mundu mwenuyo kuvya iyidakiliwa mukufugamila yati akumleta palongolo ya Bambu Chapanga papipi na mlyangu wa lindanda la kukonganekela pamonga na teta zaki. 12 Kangi Mteta wa Chapanga yati akumtola mwanalimbelele ligosi na kuliwusa kuvya luteta lwa kulekekesa kubuda pamonga na gala mahuta selusi yimonga ya lita, na kuyinula palongolo ya Bambu Chapanga kuvya luteta lwa kuyinuliwa. 13 Hinu yati akulihinja limbelele lenilo pandu pamsopi, pevihinjila hinyama ya luteta lwa kulekekesa kubuda na luteta lwa kutinyisa. Ngati chayivi kwa luteta lwa kulekekesa kubuda, mteta mweiwusa luteta lwenulu ndi mweitola nyofu zenizi na luteta lwenulu ndi lwamsopi neju. 14 Mteta wa Chapanga yati itola ngasi chidogo ya luteta lwa kuwusa kuhoka na kumnyala mundu mweinyambiswa kumuhana ya likutu la kulyela na mulugumba lwa chiwoko chaki cha kulyela na lugumba lwa chigendelu chaki cha kulyela. 15 Kangi, mteta wa Chapanga yati itola mahuta ga zeituni selusi yimonga ya lita chimonga na kugasopa muchigaga cha chiwoko chaki cha kumangeya. 16 Yati ijwiga lukong'nji lwaki lwa chiwoko cha kulyela mumahuta ago na kumnyunyusila mundu mwenuyo mweinyambiswa mala saba palongolo ya Bambu Chapanga. 17 Mahuta gegisigalila muchiwoko chaki yati akumnyala mundu yula mwenyambiswi mumuhana ya likutu laki la kulyela na lugumba lwa chiwoko cha kulyela na lugumba la chigendelu cha kulyela, pandu palapala peanyali ngasi ya luteta lwa kuwusa kuhoka. 18 Mahuta gala gegisigalila muchiganja chaki yati akumnyala mundu mwenuyo pamutu. Na kumkita mundu mwenuyo ayidakiliwa mukufugamila na kumtepulanisa na Bambu Chapanga.

19 Kangi mteta wa Chapanga yati iwusa luteta lwa kulekekesa kubuda na kumkitila mundu mwenoyo mweinyambiswa utepulanisu muni kumkita ayidakiliwa mukufugamila. Kangi yati ihinja limbelele la luteta lwa kutinyiswa. 20 Mteta wa Chapanga yati ivika luteta lwa kutinyiswa na luteta lwa mabenu panani ya pandu pa kuwusila teta. Hinu mteta wa Bambu Chapanga yati akumhengela mundu mwenuyo utepulanisi, na mwene yati ivya mweiyidakiliwa mukufugamila.

21 "Nambu ngati mundu mwenuyo ndi mngangu, angahotola kuleta vindu vyoha vyenivyo, ndi ampelekela mteta mwanalimbelele ligosi livya luteta lwa kuwusa kubuda, ayiyinula kunani kulangisa kuvya akumuwusila Bambu Chapanga ndava ya kumukita mundu mwenuyo alekekiswi kubuda kwaki. Mewa yati ileta kilo yimonga ya uhembe nyilili weuhangisini na mahuta ga zeituni ndava ya luteta lwa mabenu na mahuta ga zeituni selusi yimonga ya lita. 22 Mewawa aleta ngunda zivili amala mawela gavili ga lijiva ngati cheihotola mmonga ndava ya luteta lwa kulekekesa kubuda na yungi ndava ya luteta lwa kutinyiswa. 23 Ligono la nane yati akumletela mteta wa Chapanga vindu vyenivyo palongolo ya mlyangu wa lindanda la kukonganekela ndava ya unyambiso waki palongolo ya Bambu Chapanga. 24 Mteta wa Chapanga yati akulitola mwanalimbelele lenilo ligosi la luteta lwa kuwusa kuhoka pamonga na gala mahuta ga zeituni selusi yimonga ya lita na kuviyinula kunani kulangisa kuvya luteta lwa kuyinuliwa. 25 Mteta Chapanga yati akulihinja mwanalimbelele ligosi lila la luteta lwa kuwusa kuhoka. Kangi mteta mwnuyo yati itola ngasi na kumnyala mundu mwnuyo mweanyambiswi muncha ya likutu laki la kulyela na lugumba la chiwoko chaki cha kulyela na lugumba lwa chigendelu chaki cha kulyela. 26 Mteta wa Chapanga yati isopa mahuta ga zeituni muchiganja cha chiwoko chaki cha kumangeya, 27 Kangi yati akumnyunyusila mundu mwenuyo kwa lukonji lwaki lwa kulyela mahuta ago chidogo gegavi muchiganja chaki cha kumangeya mala saba palongolo ya Bambu Chapanga. 28 Mteta wa Chapanga yati akumnyala mundu yula mweanyambiswi mahuta gegasigalili mumuhana ya likutu laki la kulyela na mulugumba lwa chiwoko chaki cha kulyela na mulugumba lwa chigendelu chaki cha kulyela. Yati akumnyala pandu pala peamnyalili ngasi ya luteta lwa kuwusa kuhoka. 29 Mahuta gegasigalili muchiwoko chaki yati akumnyala mundu mwenuyo pamutu, muni amunyambisa na kumtepulanisa na Bambu Chapanga. 30 Kangi mteta wa Chapanga yati itola ngunda yimonga pagati ya zivili zila amala mawela ga majiva ngati mundu yula cheahotwili kuleta. 31 Ngunda yimonga yati ivya ndava ya luteta lwa kulekekesa kumbudila Chapanga na yungi ndava ya luteta lwa kutinyiswa. Pamonga na avo, mewa yati ileta luteta lwa mabenu, na Mteta wa Chapanga yati akumhengela mundu yula utepulanisi palongolo ya Bambu Chapanga. 32 Genaga ndi malagizu kumvala mundu mweilwala matamu ga chikumba gegiyambukiza mwangahotola kuwusa teta zezivikiwi ndava ya unyambiso."

33 Bambu Chapanga akamjovela Musa na Aloni, 34 pemwiyingila pamulima wa Kanani wenikuvapela uvya winu, nene nikavika ukungu weuyenela muluwumba lwa nyumba zinu pamulima wenuwo, 35 hinu, mkolo nyumba yeniyo yikumgana amjovela mteta wa Chapanga kuvya, chindu ngati ukungu uwonikini munyumba yangu. 36 Mteta wa Chapanga yati ilagiza vindu vyoha vya mugati ya nyumba yeniyo viwusiwa kuvala kwakona mwene kutumbula ulolakesu waki ngati ndi ukungu, muni vyoha vyalakukokoswa kuvya vyangayidakiliwa mukufugamila. Kangi mteta wa Chapanga yati iyingila kuyilola nyumba yeniyo. 37 Yati akuulingulila ukungu wenuwo, ngati uwonikini muluwumba na uletili mabala ga langi ya mahamba gavisi amala gadung'u na kuloleka kuvya uyingili mugati ya luwumba, 38 hinu, Mteta wa Chapanga yati ihuma kuvala na kudinda mlyangu wa nyumba yeniyo kwa magono saba. 39 Ligono la saba mteta wa Chapanga yati iwuya na kuyilingulila nyumba yeniyo kavili. Ngati ukungu wenuwo udandasiki muluwumba za nyumba yeniyo, 40 mteta wa Chapanga yati ilagiza maganga gegayambukizwi ukungu gawusiwa na kutagwa pandu pangayidakiliwa mukufugamila kuvala ya muji. 41 Lukilima lwa nyumba yeniyo yati lubanduliwa na ludaka lwelubanduliwi lutagwa pandu pangayidakiliwa mukufugamila kuvala ya muji. 42 Kangi yati vitola maganga gangi na kujenga pandu pevabomwili, na vene yati vakuyikilima nyumba yeniyo kavili.

43 Ngati ukungu wenuwo yati wihumila kavili munyumba yeniyo pevamali kuwusa maganga ago na kukwangula lukilima lwa muluwumba na kukilima kavili, 44 yiganikiwa Mteta wa Chapanga abwela kulingulila. Ngati ukungu udandasiki munyumba yeniyo yoha, hinu ukungu wenuwo wa kuyongomesa, nyumba yenoyo yiyidakiliwa lepi mukufugamila. 45 Nyumba yeniyo yiganikiwa yibomolewa na mganga gaki na mikongo yaki pamonga na lukilima vipelekwa pandu pangayidakiliwa mukumfugamila kuvala ya muji. 46 Mundu yeyoha mweiyingila munyumba yeniyo lukumbi nyumba yeniyo yidindiwi, yati ivya mwangayidakiliwa mukumfugamila Chapanga mbaka kimihi. 47 Mundu yeyoha mweigona amala kulya chakulya mugati ya nyumba yeniyo, yikumgana achapa nyula zaki.

48 "Nambu ngati Mteta wa Chapanga abweli kuyilingula nyumba na kulola kuvya ukungu udandasiki lepi kavili nyumba peyamali kukilimwa yati ikokosa kuvya nyumba yila yiyidakiliwa mukumfugamila Chapanga, na kuvajovela vandu kuvya ukungu umaliki. 49 Ndava ya kuyinyambisa nyumba yeniyo mkolo nyumba yati ileta hidege hivili pamonga na chipandi cha mwelezi na litonji lidung'u na limbanda la mkongo wa husopo. 50 Yati akuchihinja chidege chimonga muchiviga chechivi na manji gabwina ga chinyepa. 51 Yati itola chipandi cha mwelezi na limbanda la mkongo wa husopo pamonga na litonji lidung'u na chidege chingi chechivi mumi chila na kuvijwiga vyoha mungasi ya chidege chila chechihinjiwi na manji gala ga chinyepa. Kangi yati akuyinyunyusila nyumba yila ngasi mala saba. 52 Chenicho ndi cheinyambisa nyumba yeniyo kwa ngasi ya chidege na manji gabwina ga chinyepa na chidege mumi na chipandi cha mwelezi pamonga na limbanda la mkongo wa husopo na litonji lidung'u. 53 Chidege chila chechivi mumi yati akuchileka chihamba. Munjila yeniyo yati itakita utepulanisi ndava ya nyumba yeniyo, na yene yati yiyidakiliwa mukumfugamila Chapanga."

54 Genaga ndi malagizu kuvala aina yeyoha ya utamu wa chikumba weudandasika, na kutuguta, 55 ukungu weuvi munyula amala mugati ya nyumba, 56 kuhimba amala vipele amala libala, 57 muni kulangisa chindu choki chechiyidakiliwa mukumfugamila Chapanga na changayidakiliwa. Genago ndi malagizu ndava ya ukungu na utamu wa chikumba weudandasika.