1 Kangi Bambu Chapanga akavajovela Musa na Aloni, 2 Ngati mundu ahimbili amala upele amala libala lamsopi muhiga yaki, yikamanyikana kuvya ana utamu wa chikumba weuyambukisa, ndi yati vakumleta kwa Aloni mteta wa Chapanga amala mmonga wa vana vaki vagosi mweavii mteta. 3 Mteta wa Chapanga yati akupalingulila pandu pepavii na utamu na ngati mayunju ga pandu penapo gang'anamwiki kuvya gamsopi na utamu wene wilolekana kuvya uvi mugati neju ya higa yaki, hinu, wenuwo ndi yati uvya utamu wa chikumba, mteta wa Chapanga akamalayi kumlingulila, ndi yati ikokosa kuvya mundu mwenuyo ndi angayidakiliwa. 4 Nambu yakavyai libala lenilo, pamonga kuvya lamsopi na liyingili lepi mugati neju ya higa na wala mayunju ga pandu penapo gang'anamwiki lepi kuvya gamsopi, ndi mteta wa Chapanga yati akumbagula mundu mwenuyo kwa magono saba. 5 Ligono la saba mteta wa Chapanga yati akumlingulila kavili mundu mwenuyo, na kulandana na ulingulila wa mteta, utamu wenuwo udandasiki lepi muhiga yaki, hinu ndi mteta wa Chapanga yati akumbagula mundu mwenuyo mu magono gangi saba. 6 Kangi mteta wa Chapanga amulolayi mundu mwenuyo ligono la saba. Ngati utamu wenuwo udandasiki lepi yati akuvajovela vandu kuvya mundu mwenuyo ndi iyidakiliwa, na utamu wenuwo ndi wavii upele ndu. Mundu mwenuyo yati ichapa nyula zaki ndi yati ivya iyidakiliwa mukumfugamila Chapanga. 7 Nambu ngati upeli wenuwo udandasiki muhiga, lukumbi mundu mwenuyo amali kujilangisa kwa mteta wa Chapanga ndava ya kunyambiswa hinu yati ibwela kavili kwa mteta wa Chapanga. 8 Mteta wa Chapanga yati akumlola kavili, na ngati upele wula udandasiki higa yoha, penapo mteta yati akumkokosa mundu mwenuyo kuvya iyidakiliwa lepi, muni anautamu wa chikumba weuyambukisa.

9 Ngati mundu avii na utamu wa chikumba wa kuyambukisa, yikumgana vampeleka kwa mteta wa Chapanga. 10 Mteta wa Chapanga yati akumlingulila na ngati pepahimbili pavi pamsopi pachikumba na kukita mayunju gaki kuvya gamsopi na pepahimbili penapo pag'anamwiki kuvya chilonda, 11 wenuwo ndi utamu wa chikumba weuyambukisa wa magono gamahele. Mteta wa Chapanga yati akumkokosa mundu mwenuyo kuvya angayidakiliwa. Yati akumbagula lepi muni mundu mwenuyo amali kuvya angayidakiliwa. 12 Ngati utamu wa chikumba udandasiki higa yoha, kuhuma kuludodoso mbaka chikanyatilu ngati cheilola mteta wa Chapanga, 13 penapo ndi mteta wa Chapanga yati akumlola. Ngati amuwene utamu udandasiki higa yoha, hinu ndi yati akumkokosa mundu mwenuyo kuvya iyidakiliwa mukumfugamila Chapanga muni higa yaki yoha ying'anamwiki kuvya yamsopi, hinu mundu mwenuyo ivya mbwina. 14 Nambu yakalolekana muhiga wa mundu mwenuyu kuvii na uhimba, hinu mundu mwenuyu ndi ivya angayidakiliwa mukumfugamila Chapanga. 15 Mteta yati akuulola uhimba na kumkokosa mundu mwenuyo kuvya angayidakiliwa mukumfugamila Chapanga, ndava wenuwo ndi utamu wa chikumba weuyambukisa. 16 Nambu ngati uhimba wenuwo wakalamayi na chikumba chaki kuwuya kavili mulangi yaki ya uyovalelu ndi mundu mwenuyo yati ikiliwuka kavili kwa Mteta wa Chapanga. 17 Mteta wa Chapanga yati akumlola kavili na ngati uhimba wenuwo ulamili na kuvya mulangi yaki ya chikumba, hinu mteta yati akumkokosa mundu mwenuyo kuvya iyidakiliwa mukufugamila.

18 Ngati mundu avii na liputi muhiga yaki na lene likalamayi, 19 nambu pandu pepavii na liputi lila pahimbili na kuvya pamsopi amala padung'u nambu pamsopi chidogo, yikumgana ahamba kumlangisa mteta wa Chapanga. 20 Mteta wa Chapanga yati akupalola pandu penapo. Hinu ngati amuwene pavii na livamba lelinyoliki na mayunju ga pandu penapo gang'anamwiki kuvya gamsopi, ndi mteta wa Chapanga yati akumkokosa mundu yula kuvya iyidakiliwa lepi mukufugama, muni wenuwo ndi utamu wa chikumba weuhumili ndava ya liputi. 21 Nambu Mteta wa Chapanga apalolili pandu penapo na kuvya mayunju ga pandu pala gamsopi lepi amala kawaka ligodi, nambu patumbwi kulama, ndi yati akumbagula mundu yula mumagono saba. 22 Ngati utamu wenuwo udandasiki muhiga, mteta wa Chapanga yati akumkokosa mundu mwenuyo kuvya iyidakiliwa lepi mukufugama, utamu wenuwo ndi utamu wa chikumba weuyambukisa. 23 Nambu ngati pandu pala pangadandasika, hinu pandu pala ndi livamba la liputi ndu. Mteta wa Chapanga yati akumkokosa mundu yula kuvya iyidakiliwa mukufugama.

24 Mundu akavauka kwa motu na chikumba cha pandu pala ndi pang'anamwiki na kuvya padung'u amala pavi pamsopi, 25 mteta wa Chapanga yati akupalingulila. Ngati aloli kuvya mayunju gang'anamwiki kuvya gamsopi na panyoliki, hinu wenuwo ndi utamu wa chikumba. Utamu wenuwo uhumalili ndava ya pandu pala pepavawiki. Mteta wa Chapanga yati akumkokosela mundu yula mweangayidakiliwa, muni avi na utamu wa chikumba weuyambukisa. 26 Nambu ngati mteta wa Chapanga amlingulili na kulola mayunju ga pandu pala gamsopi lepi na kawaka ligodi na patumbwi kulama, hinu Mteta wa Chapanga yati akumbagula mundu yula kwa magono saba. 27 Ligono la saba Mteta wa Chapanga yati akumlingulila kavili. Ngati amuwene kuvya utamu wula udandasiki muhiga, ndi, mteta wa Chapanga yati akumkokosa mundu mwenuyo kuvya angayidakiliwa, muni avii na utamu wa chikumba. 28 Nambu, ngati chilonda chenicho chidandasika lepi, na chitumbwili ndu kulama apo ndi pepahimbili pahumalili ndava ya kuvauka, hinu mteta wa Chapanga yati akumkokosa mundu yula kuvya anyambili, muni lenilo ndi livamba la kuvauka.

29 Ngati mundu yeyoha mgosi amala mdala, ahimbi pamutu amala pachinjwemba, 30 penapo ndi mteta wa Chapanga yati akaulingulila uhimba wenuwo. Ngati amuwene chilonda chinyoliki na mayunju ndi ganjanu ganyolwiki, ndi yati akumkokosa mundu yula kuvya angayidakiliwa, muni wenuwo ndi upele na utamu wa chikumba wa kumutu amala wa kuchinjwemba. 31 Ngati mteta wa Chapanga peakumlingulila uhimba wenuwo ahimbili lepi neju na mayunju gatitu lepi, ndi yati akumbagula mundu mwenuyo kwa magono saba. 32 Ligono la saba Mteta wa Chapanga yati akuulingulila uhimba wenuwo. Ngati uhimba wene udandasiki lepi na kawaka mayuju ga langi ya manjanu amala kawaka langi ya manjanu amala kugimika vipele vyovyoha pandu pala, hinu, 33 mundu mwenuyo aketa mayunju amala manjwemba gaki. Nambu akotoka kuketa pandu pepavi na upele. Kangi mteta wa Chapanga yati akumbagula mundu mwenuyo kwa magono gangi saba. 34 Ligono la saba, mteta wa Chapanga yati akuvilingulila kangi vipele vila. Ngati vyangadandasika muhiga amala pandu pala pagimiki lepi, mteta wa Chapanga yati akumkokosa kuvya iyidakiliwa mukumfugamila Chapanga. Mundu mwenuyo achapa nyula zaki na mwene yati ivya mweiyidakiliwa. 35 Nambu ngati vipele vyenivyo vidandasiki kuhumila pala mteta mkulu peamujovili kuvya iyidakiliwa, 36 Mteta wa Chapanga yati akumlingulila mundu mwenuyo kavili, ngati vipele vidandasiki kangi muhiga, mteta wa Chapanga yati nakugana kulola mayunju ga njanu, muni mundu yula ndi angayidakiliwa. 37 Nambu mukulingulila kwaki mteta wa Chapanga akalola alamili lepi na mayunju gatitu gameli pandu penapo, hinu vilonda vyenivyo ndi vilamili, hinu mundu mwenuyo iyidakiliwa, mteta yati akuvakokosela vandu kuvya mundu mwenuyu iyidakiliwa kwa Bambu Chapanga.

38 Ngati mgosi yeyoha amala mdala yeyoha avi na libala lamsopi muhiga yaki, 39 Mteta wa Chapanga yati akumlingulila mundu mwenuyo. Ngati amlolili kuvya ana mabala genago gamsopi chidogo, wenuwo ndi upele weuyovaliki, mundu mwenuyo ivya mweiyidakiliwa mukumfugamila Chapanga.

40 Ngati mgosi apatili lupala, mwenuyo iyidakiliwa mukumfugamila Bambu Chapanga muni lupala ndu. 41 Ngati lupala lwenulo ludandasiki kuhuma mumbele mbaka kulongolo mundu mwenuyo avii na lupala ndu ndi yati ivya mweiyidakiliwa mukumfugamila Bambu Chapanga. 42 Nambu ngati pahimbi palupala amala pachiwungi pavi na libala lidung'u, wenuwo ndi utamu weuyambukiza, weuhumalili kumutu amala muchiwungi chaki. 43 Mteta wa Chapanga yati akumlingulila. Ndi ngati amuwene kuvya ahimbili udung'u na usopi palupala la pamihu na kulolekakana ngati mabudi pahiga yaki, 44 hinu mundu mwenuyo avi na mabudi, mwene ndi iyidakiliwa lepi. Mteta wa Chapanga yati akumkokosa mundu mwenuyo kuvya iyidakiliwa lepi mukumfugamila Chapanga. Utamu waki uvii pamutu waki.

45 "Mundu yeyoha mweavi na utamu wa chikumba yati iwala nyula zezipapwiki, yati ikwemula lepi mayunju gaki, na yati igubika kutumbula meng'elu yaki mbaka mulomo na kujova kwa lwami luvaha, ‘Nene ndi niyidakiliwa lepi mukumfugamila Chapanga, nene niyidakiliwa lepi mukumfugamila Chapanga.’ 46 Mundu mwenuyo yati iyendelela kuvya angayidakiliwa mukumfugamila Chapanga, yikumgana atama mwene kuvala ya kambi."

47 Ngati upele wa chikumba ung'ang'anili munyula, yikavya ya litonji amala munyula yamusopi, 48 nyula yeniyo yivya ya kutota amala kubota kwa chitambala chamusopi amala litonji amala nyula ya chikumba cha namuna yoyoha yila, 49 ngati ukungu wenuwo uvi mu nyula amala chikumbawa amala lalitotiwi amala kuluka, amala chindu chochoha cha chikumba, ndi langi ya mahamba gavisi amala yidung'u munyula yeniyo, ndi, nyula yeniyo yivi na upele. Ndava yeniyo yiganikiwa kumlangisa Mteta wa Chapanga. 50 Mteta wa Chapanga yati akuulingulila ukungu wenuwo na kuyivika pamuhana chindu chenicho mumagono saba. 51 Ligono la saba yati akuulingulila ukungu wenuwo. Ngati ukungu wenuwo udandasiki munyula yeniyo, yikavya ya kutota amala kubota amala chindu cha chikumba cha namuna yoyoha yila, chindu chenicho chivi na ukungu weukoma. Hinu chiyidakiliwa lepi mukumfugamila Chapanga. 52 Mteta wa Chapanga yati akuyiyocha motu nyula yeniyo amala chindu chachitotiwi amala chachilukiwi chivya cha matonji amala chitambala cha msopi amala chindu chochoha cha chikumba chechivi na ukungu, muni ukungu ukomakesa, chindu chenicho yiganikiwa chiyochwa na motu.

53 Nambu ngati Mteta wa Chapanga akayilingula kuvya ukungu wangadandasika munyula yayitotiwi amala kulukwa, amala chindu cha chikumba, 54 amulagiza mkolo nyula ayichapai na kuvika pamuhana mulukumbi lwa magono gangi saba. 55 Mteta wa Chapanga yati akuyilingulila nyula yeniyo kavili peyimali kuchapwa. Ngati libala lila ling'anamwiki lepi langi yaki pamonga kuvya ukungu waki udandasiki lepi, ndi nyula yeniyo yiyidakiliwa lepi mukumfugamila Chapanga. Nyula yeniyo ukuyiyocha motu, hati ngati libala la upele likavya kumbele amala kulongolo ya nyula. 56 "Nambu ngati Mteta wa Chapanga akalingulila kavili kuvya libala lila lipungwiki peamali kuchapa, ndi yati ipapula pandu pala pepavi na namuna ya ukungu. 57 Kangi, yikavyai libala lenilo likahumila kavili mwanakandahi munyula yeyitotiwi amala kubota amala muchindu chochoa cha chikumba, ndi upele udandasiki. Penapo nyula yeniyo uyiyocha motu. 58 Nambu ngati nyula amala chindu chochoha chachitotiwi amala kulukwa amala chindu chochoha cha chikumba chechimali kusanjwa na kuwusiwa ukungu, ndi chiganikiwa chisanjwa kangi, na chene yati chiyidakiliwa mukufugamila."

59 Aga ndi malagizu kuvala namuna ya ukungu weuyambukisa wewihumila munyula ya litonji amala yamusopi yeyitotiwi amala kubota amala chindu cha chikumba. Kwa kulanda malagizu aga muhotola kuyimanya nyula yeyivii yeyiganikiwa na yangaganikiwa mukumfugamila Chapanga.