1 Chapanga akamjovela Musa, 2 ngati mundu yoyoha akitili mabudili na avii lepi msadikika kwa Bambu Chapanga kwa kumkonga muyaki wa papipi ndava ya chindu cheagotoliwi amala cheapewili achiyunga na chene chikayiviwa amala akamukonga, 3 amala akanonga chindu cha mashonga gamahele cha muyaki cheachiyagisi, na akajova udesi kuvya anongi lepi na akalapa kwa udesi kuvya achiweni lepi amala alapili kwa udesi ndava ya chochoha chevihotola kukita vandu, ndi mundu mwenuyo ivya ahokili, 4 mundu mwenuyu akajiwonayi kuvya abudili na kuvya ahokili, yikumgana awuyisa cheapatili kwa kunyaga, amala chila cheagotoliwi, amala chindu cha muyaki chechayagili akachinonga, 5 amala chochoa cheachilapili kwa udesi, vindu vyenivyo vyoha awuyisa kwa mwene na kuyongesa lilundu limonga pagati ya muhanu ya bei ya chindu chenicho penapo peimanya kuvya ahokili. 6 Kangi amletela mteta wa Chapanga, limbelele ligosi amala lipongo langali dosali kuvya luteta lwa kuhoka kwaki, na mwene mteta akulipeleka palongolo ya Bambu Chapanga limbelele lenilo kuvya luteta lwa kuhoka kwaki, utopesa wa chinyama chenicho uwanangana na chipimu chechiyidakiliwa pandu pa kumufugamila Chapanga. 7 Mteta yati akumkitila utepulaniso mundu mwenuyo palongolo ya Bambu Chapanga, na mwene yati ilekekeswa kuhoka kweakitili.

8 Kangi Bambu Chapanga akamjovela Musa, 9 mpela Aluni na vana vaki lilagizu ili chenichi ndi cheiganikiwa kuwusa teta ya kutinyiswa pandu pa kuwusila teta. Teta ya kutinyiswa yati yivya pamoto panani ya pandu pa kuwusila teta kilu yoha mbaka lukela na motu waki ukotoka kujimika. 10 Kangi mteta wa Chapanga yati iwala ligwanda laki lamsopi na chibudula chakuwalila mugati, yati iwusa malyenge ga luteta lula kuhuma pandu pa kutinyisila luteta na kugavika pamuhana ya pandu pa kuwusila teta. 11 Hinu yati ihula nyula zaki na yati iwala nyula zingi na yati akugatola malyenge gala na agapeleka kuvala ya lindanda lavi pandu pepiyidakiliwa kwa kumfugamila Bambu Chapanga. 12 Motu weuvii panani ya pandu pa kutinyisila luteta uganikiwa uyendelela kuyaka, katu ukotoka kujimiswa. Kila ligono lukela mteta wa Chapanga yati iyonjokesa sagala na kupanga luteta lwa kutinyiswa panani ya motu na kutinyisa mahuta ga hinyama ya luteta lwa uteke. 13 Moto yati uyendelela kuyaka magono goha pandu pa kuwusila teta changajimika.

14 Chenichi ndi cheyiganikiwa kukita pemwiwusa luteta lwa mabenu; Vana va Aloni ndi yati vileta luteta palongolo ya Bambu Chapanga, palongolo ya pandu pa kuwusila teta. 15 Mmonga wa vamteta va Chapanga pagati ya vana va Aluni yati inega chiwoko chimonga uhembe nyililili weuhangisinwi na mahuta ga zeituni na kuvika ubani panani yaki na kutinyisa panani ya pandu pa kuwusila teta kuvya ukumbusho na mnungalilu waki yati ukumganisa Bambu Chapanga. 16 Uhembe weusigalili yati ilya Aloni na vana vaki nambu peviteleka mabumunda gaki ndi vakotoka kusopa ngemeku. Yati vilyelela pandu pepabaguliwi ndava ya Chapanga mu Lindanda la Kukonganekela. 17 Katu ukotoka kuyocha kuni usopili ngemeku. Nivapelili uhembe wenuwo kuhuma mu luteta lwevamuwusili Bambu Chapanga kwa motu. Teta zenizi ndi Zamosopi neju ngati chezivili teta za kubuda na teta za kuhoka. 18 Mgosi yeyoha chiveleku cha Aloni ihotola kulya. Ndi lilundu laki la uyovelu la luteta zezivikiwi kwa Chapanga kwa motu kwa viveleku vyevibwela. Mundu yeyoha mweipamisa yati ivya Msopi.

19 Mewawa Bambu Chapanga akamjovela Musa, 20 lwenulu ndi luteta Aloni na vana vaki viganikiwa kuleta kwa Bambu Chapanga ligono leisopiwa kwa mahuta, kilo yimonga ya uhembe nyilinyili ngati luteta lwa uyovalelu wa mabenu, yapinga yati yiwusiwa lukela na yapinga yingi yati yiwusiwa kimihi. 21 Uhembe wenuwo yati uhangisanwa na mahuta ga zeituni na kuyocha, kangi libumunda lenilo yati umetuliwa hipandi hipandi na kuvikwa panani ya pandu pa kuwusila teta, na kuvya mnungalilu wabwina wa kumganisa Bambu Chapanga. 22 Mteta wa Chapanga mweavi mwana wa Aloni mweanyaliwi mahuta kukamula fwasi yaki yati akumuwusila Bambu Chapanga luteta lwenulo ndi lilundu la uyovalelu la Bambu, na lwenulo ndi yati lutinyiswa lwoha. 23 Luteta lwolwoha lwa mabenu lweluwusiwi na mteta wa Chapanga yati lutinyiswa lwoha, katu lukotoka kuliwa.

24 Kanga Bambu Chapanga akamjovela Musa, 25 vajovela Aloni na vana vaki kuvya, wewigelekela ndi mpangu wa kumyupa Chapanga kuvala luteta lwa kulekekesa kubuda, pandu pala pa kuhinjila chinyama chechiwusiwa kwa nene Bambu Chapanga muni mundu alekekeswa kubuda, lwenulo ndi luteta lwamsopi neju. 26 Mteta mwenuyo peiwusa chinyama chenicho chihinjiwa ndi mweilya nyofu yaki. Yati yiliwa pandu Pamsopi, mugati ya Lindanda la Kukonganekela. 27 Mundu yeyoha mweipamisa nyama yeniyo yati ivya msopi na ngasi yikagwilila munyula ndi nyula yeniyo yiganikiwa yichapiwa pandu pamusopi. 28 Nyofu yeniyo yikatelekewa muviviga, ndi viviga vyenivyo vibayuliwa. Nambu ngati yikatelekewayi mu hyombo ya shaba, ndi hyombo hyeniyo vikehewa na kuyeleswa kwa manji. 29 Mgosi yeyoha mulukolo lwa chimteta ndi ihotola kuyilya nyofu yeniyo muni luteta lwa msopi neju. 30 Nambu ngati ngasi ya chinyama chenicho yiletiwi mugati ya Lindanda la Kukonganekela, ndi nyofu yaki yikotoka kuliwa nambu yitinyiswa kwa motu.