1 Bambu Chapanga akamjovela Musa, 2 uvajovela vandu va Isilaeli aga, mdala akavya na ndumbu, akaveleka mwana wa chigosi, yati ivya angayidakiliwa kumfugamila Chapanga mu lukumbi lwa magono saba kuwanangana na magono gaki ga kuselula ngasi. 3 Mwana mwenuyo yati idumuliwa jandu pa ligono la nane. 4 Kangi nyina wa mwana yati iyendelela kuvya angayidakiliwa kwa magono selasini na datu. Lukumbi lwenulo, katu akotoka kupamisa chindu chamsopi amala kuyingila pandu pamsopi mbaka magono gaki ga kumkita ayidakiwa gatimila.

5 Ngati mdala mwenuyo aveliki mwana wa chidala yati ivya angayidakiliwa kwa majuma gavili, ngati cheivya mumagono gaki ga kuselula ngasi. Kangi yati itama kwa magono sitini na sita ndi yati iyidakiliwa kwa kumfugamila Chapanga.

6 Magono ga kunyambiswa kwaki pegitimila, yikavya aveliki mwana wa chigosi amala mdala, yati akumletela mteta wa Chapanga pamlyangu wa lindanda la kukonganekela mwanalimbelele wa mwaka umonga ndava ya luteta lwa kutinyiswa na liwela la ngunda amala lijiva, ndava ya luteta lwa kulekekesa kubuda. 7 Mteta mwenuyo yati akumuwusila Bambu Chapanga na kumhengela mau yula luyupu lwa utepulanisi palongolo ya Bambu Chapanga ndava ya ngasi yaki yeyiselwiki. Hinu mdala mwenuyu yati ivya anyambiswi. Yeniyo ndi mihilu kumvala mdala yeyoha mweababili mwana wa chigosi amala wa chidala.

8 "Ngati ihotola lepi kuleta mwanalimbelele, ndi aleta hua vavili amala mawela gavili ga ngunda, yimonga ndava ya luteta lwa kutinyisa na yingi ndava ya luteta lwa kulekekesa kubuda kwaki. Kwa kukita chenichi mteta wa Chapanga yati akumhengela mau yula utepulanisi, namwene yati iyidakiliwa kwa kumfugamila Chapanga."