1 Bambu Chapanga akamjovela Musa, 2 vajovela vandu va Isilaeli naha; Mundu akambudilayi Chapanga changa manya, akakita chindu chechibesiwi na mihilu ya Bambu Chapanga, mwenuyo ikita genaga.

3 Yikavya Mteta mkulu wa Chapanga abudili na kuvaletela vandu kuhoka, yikumgana amuwusila Bambu Chapanga mpapakasi wa ng'ombi yigosi wangali chilema, kuvya luteta lwa kuwusa kubuda kweahengili. 4 Yati akuuleta mpapakasi wenuwo pamlyangu wa lindanda la kukonganekela, palongolo ya Bambu Chapanga. Yati ivika chiwoko chaki panani ya mutu wa ng'ombi yigosi yeniyo na kuyihinja palongolo ya Bambu Chapanga. 5 Kangi yula Mteta mkulu wa Chapanga yati itola pandu pa ngasi ya ng'ombi yigosi yeniyo na kuyileta mulindanda la kukonganekela. 6 Yati ijwiga lung'onji lwaki mu ngasi yeniyo na kunyunyusila mala saba palongolo ya Bambu Chapanga upandi wa kulongolo wa lipazia lelilekenganisa pandu Pamsopi na Pamsopi neju. 7 Mteta wa Chapanga yati itola pandu pa ngasi na kubakala mupembe za pandu pa kuwusila teta lwa kuhukisa ubani wewinungalila bwina, palongolo ya Bambu Chapanga mulindanda la kukonganekela. Ngasi yeyisigalila akuyiyitila pahi papandu pa kuwusila teta lwa kutinyiswa, pandu pakuyingila mulindanda la kukonganekela. 8 Kangi yati akugawusa mahuta goha gegigubika maleme ga ng'ombi yeniyo ya luteta lwa kubuda, na mahuta goha gegigubika pandu pa mugati na mahuta goha gegiwungana nagu pandu pa mugati. 9 Figu zivili na mahuta gegavii kunani yaki na gegavii muchiwunu pamonga na gala gegakamulini na figu na chibindi, genago goha yati akugawusa muchinyama chenicho. 10 Mteta yati akuvitola vindu vyenivyo na kuvitinyisa ngati cheikita kwa chinyama cha luteta lwa uteke. Kangi Mteta wa Chapanga yati akuvitinyisa panani ya pandu pa kuwusila teta ya kutinyisila luteta. 11 Nambu chikumba cha ng'ombi yeniyo na nyofu na mutu na magendelu na maleme pamonga na mahi gaki, 12 ndi pandi zingi zoha zezisigalili za ng'ombi yila, yikumgana aziwusayi kuvala ya kambi mbaka pandu pepavii bwina peigana Chapanga, pandu pevitaga lyenge, mwene yati akuviyocha vyenivyo kwa motu panani ya sagala zezivi palilundu la malyenge.

13 Yikavya vandu voha va Islaeli vambudili Chapanga changali kumanya kwa kuhenga chindu chechibesiwi na mihilu ya Bambu Chapanga, venavo voha vabudili hati ngati vamanyili lepi kuvya vabudili. 14 Pevimanya kuvya chavahengili ndi vabudili, vandu voha vamuwusila Bambu Chapanga ng'ombi yigosi kuvya luteta lwa kubuda na kugotola palongolo ya Lindanda la kukonganekela. 15 Vachilongosi va vandu va ku Isilaeli yati vivika mawoko gavi panani ya mutu wa ng'ombi yeniyo, kangi ng'ombi yeniyo yati yihinjwa palongolo ya Bambu Chapanga. 16 Kangi mteta mkulu wa Bambu Chapanga atola ngasi ya ng'ombi yigosi na kupeleka mugati ya Lindanda la Kukonganekela. 17 Yati ijwiga lukonji lwaki mu ngasi na kunyunyusila mala saba palongolo ya Bambu Chapanga na palongolo ya lipazia lelilekenganisa pandu Pamsopi na Pamsopi neju. 18 Kangi, mteta mkulu mwenuyo yati inyala ngasi mupembe za pandu pa kuhukisila ubani weunungalila bwina lweluvi mulindanda la kukonganekela yeyivi palongolo ya Bambu Chapanga. Ngasi yeyisigalila akuyiyitila pahi ya pandu pa kutinyisila luteta yeyivi papipi na mlyangu wa Lindanda la Kukonganekela. 19 Kangi yati akugawusa mahuta goha ga ng'ombi yeniyo na kugatinyisa panani ya pandu pa kuwusila teta. 20 Ndava yeniyo akuyihengela ng'ombi yigosi yeniyo, ngati yingi yila ya luteta lwa kulekekesa kubuda. Hinu, mteta wa Chapanga akuvahengela vandu kumuyupa Chapanga kwa utepulaniso ndava ya kumbudila Chapanga, na vene yati vilekekeswa kubuda kwavi. 21 Kangi yati itola nyofu ya ng'ombi yigosi yeniyo na kupeleka kuvala ya kambi na kuyitinyisa ngati cheayitinyisi yila ya kutumbula. Lwenulo ndi luteta lwa kulekekesa kubuda kwa vandu voha va Isilaeli.

22 Yikavya chilongosi wa vandu va Isilaeli abudili changali kumanya, kwa kuhenga chindu chechibesiwi na mihilu ya Bambu Chapanga, Chapanga waki, ndi chakaka ahokili. 23 Lukumbi peimanya kuvya abudili, yati ileta luteta lwaki lwa lipongo langali dosali. 24 Yati ivika chiwoko chaki panani ya mutu wa lipongo na kulihinja pandu pevihinjila hinyama ya luteta za kutinyiswa palongolo ya Bambu Chapanga. Lwenulu ndi luteta lwa kumbudila Chapanga. 25 Mteta wa Chapanga yati ijwiga lung'onji lwaki mu ngasi yeakingili yila ya luteta lwa kumbudila Chapanga na kunyala mumang'elu ga pandu pa kuwusila teta na kutinyisa. Ngasi yeyisigalila yati akuyiyita pahi papandu pa kuwusila teta. 26 Mahuta goha ga lipongo lenilo yati akugatinyisa papandu pa kuwusila teta, ngati cheagahengili mahuta ga chinyama ya luteta lwa uteke. Ndava yeniyo mteta wa Chapanga yati akumhengela mundu mwenuyo utepulanisi na Chapanga ndava ya kubuda kwaki, namwene yati ilekekeswa.

27 Mundu yoyoha akabuda changali kumanya kuvya abudili, kwa kuhenga chindu chechibesiwi na malagizu ga Bambu Chapanga, mundu mwenuyo ivya ahokili. 28 Penapo peimanya kuvya abudili, yati ileta mene mbuguma yangali dosali amuwusila Bambu Chapanga ndava ya kubuda kweahengili. 29 Yati ivika chiwoko chaki panani ya mutu wa mene yeniyo ya luteta lwa kubuda, na kumhinja pandu pa kuhinjila hinyama ya luteta lwa kutinyiswa. 30 Mteta wa Chapanga yati ijwiga lungonji lwaki mu ngasi ya luteta lwa kubuda na kunyala mumang'elu ga pandu pa kuwusila teta ya kutinyisa luteta. Ngasi yeyisigalila akuyiyita pahi ya pandu pa kuwusila teta. 31 Mahuta goha ga mene akugawusa ngati cheiwusa mahuta ga luteta lwa uteke, mteta wa Chapanga na yati akuyitinyisa papandu pa kuwusila teta na kuvya unungalilu wa kumganisa Bambu Chapanga. Hinu, Mteta wa Chapanga akumhengela mundu mwenuyo utepulanisu kwa Chapanga, na mundu mwenuyo yati ilekekeswa.

32 Ngati mundu mwenuyo yati ileta mwanalimbelele ndava ya luteta lwa kubuda, ndi, aleta mwanalimbelele lidala langali dosali. 33 Yati ivika chiwoko chaki panani ya mutu wa mwanalimbelele wa luteta lwa kulekekesa kubuda na kumhinjila pandu pakuhinjila hinyama ya luteta za kutinyisa. 34 Kangi Mteta wa Chapanga yati ijwiga lungonji lwaki mu ngasi yila ya luteta lwa kulekekesa kubuda yeakingili na kunyala mumang'elu ga pandu pa kuwusila teta. Ngasi yeyisigalila yati akuyiyita pahi pandu pa kutinyisila luteta. 35 Kangi yati akugawusa mahuta goha ngati cheiwusa mahuta ga mwanaimbelele wa luteta ya uteke, na Mteta wa Chapanga akugatinyisa panani ya pandu pa kuwusila luteta, panani ya teta zeziwusiwa kwa Bambu Chapanga kwa motu. Mteta wa Chapanga akakita utepulanisi kwa Bambu Chapanga ndava ya kubuda kwaki, mundu mwenuyo yati ilekekeswa.