1 Ngati mundu igana kuwusa luteta lwa kuvya na uteke na Bambu Chapanga, luteta lwaki ndi luvya ng'ombi yigosi amala mbuguma kuhuma mumifuya yaki, hinu, hinyama yeniyo hikoto kuvya na chilema palongolo ya Chapanga. 2 Mundu mwenuyo yati ivika chiwoko chaki pamutu wa chinyama chenicho na kumuhinja pandu pakuyingila mulindanda la kukonganekela. Kangi vamteta va Chapanga vana va Aloni yati vinyunyusila ngasi ya chinyama chenicho pandi zoha za pandu pa kuwusila teta. 3 Kuhuma mu luteta lwa kuvya na uteke na Chapanga, yati ileta luteta lweluwusiwa kwa Bambu Chapanga kwa motu, mahuta gegigubika vindu vya mugati amala gegiwungana na vindu vya mugati vya chinyama chenicho. 4 Mewawa mundu mwenuyo yati iwusa figu zoha na mahuta goha ga chinyama gegavili papipi na chiwunu pamonga na pandu zabwina za vibindi. 5 Kangi vana va Aloni yati vitinyisa panani ya pandu pa kuwusila teta, pamonga na luteta lwa kutinyiswa lweluvii panani ya sagala zeziyaka, lwenulo ndi luteta lwa kutinyiswa kwa motu, yeyinungalila bwina ya kumganisa Bambu Chapanga.

6 Ngati mundu akawusa luteta lwa kukita uteke na Bambu Chapanga atola kuhuma mumsambi wa mambelele amala mene, ndi ahagula lipongo amala mbuguma angali chilema. 7 Ngati mundu yati iwusa mpapakasi wa limbelele ligosi, hinu yati iwusa palongolo ya Bambu Chapanga. 8 Yati ivika chiwoko chaki panani ya mutu wa hinyama yeniyo na yati amuhinja palongolo ya Lindanda la Kukonganekela. Kangi vana va Aloni yati vinyunyusila ngasi pandi zoha za pandu pa kuwusila teta. 9 Kuhuma kuluteta ulo lwa uteke lweluwusiwa kwa Bambu Chapanga kwa motu, yati akumpela pandi zenizi, mahuta gaki na mkila weuvii na mahuta woha weudumuliwi papipi neju na chiwunu pamonga na mhuta goha gegigubika pandu pa mugati amala gala gegiwungana nagu. 10 Mewawa mundu mwenuyo yati iwusa figu zoha zaki zivili na mahuta gegikamulana nazu gegavili papipi na chiwunu cha chinyama chenicho pamonga na gala gegigubika vibindi. Vyenivyo vyoha yati akuviwusa muchinyama chenicho. 11 Mteta wa Chapanga yati akuvitinyisa vyoha panani ya pandu pa kuwusila teta ngati chakulya chechiwusiwa kwa Bambu Chapanga kwa motu.

12 Ngati mundu iwusa luteta lwaki lwa mene ndi apeleka palongolo ya Bambu Chapanga. 13 Yati ivika chiwoko chaki pamutu wa mene yeniyo na kuyihinja palongolo ya lindanda la kukonganekela. Kangi vana va Aloni yati vinyunyusila ngasi yaki pandi zoha za pandu pa kuwusila teta. 14 Kuhumila muluteta lula lwa mene lweluwusiwa kwa Bambu chapanga kwa motu, awusa mahuta goha gegagubiki pandi za mugati na gala gegiwungana nagu, 15 pamonga na figu zivili zila na mahuta gaki na mahuta gegigubika chibindi, yati akumuwusila Bambu Chapanga. 16 Mteta wa Chapanga yati akuvitinyisa panani ya pandu pa kuwusila teta kuvya luteta lwa chakulya, luteta lweluwusiwa kwa Bambu Chapanga kwa motu, luteta lwelunungalila bwina na kumganisa Bambu Chapanga, mahuta goha ga chinyama chenicho ndi ga Chapanga. 17 Wenuwu ndi yati uvya muhilu wa magono goha muviveleku vinu vyoha popoha pemwitama. Mkoto kulya mahuta gogoha gegavi muchinyama chenicho amala ngasi.