1 Bambu Chapanga akavajovela Musa na Aloni. 2 Mvajovela vandu va Isilaeli, hinyama ihi ndi yemuhotola kulya pagati ya hinyama yoha yeyitama pamulima. 3 Mwihotola kulya chinyama chochoha mweavii na kwatu zezilekangini njwee pandi zivili na chechilukula. 4 Nambu mkotoka kulya chinyama chochoha chechilukula nambu kwatu zaki zilekangingi lepi pandi zivili, amala kwatu zaki zilekini nambu chilukula lepi. Mkoto kulya ngamiya, muni yilukula nambu kwatu zaki zilekangini lepi. Kwinu nyenye chenicho mkotoka kulya muni chiganikiwa lepi kwa kumfugamila Bambu Chapanga. 5 Mleka kulya lingwichili muni lene lilukula ndava muni anakwatu lepi, kwinu nyenye chenicho chiganikiwa lepi. 6 Mkotoka kulya kapecha, muni chenicho chilukula nambu kwatu zaki zilekangini lepi, chenicho mkotoka kulya muni kwa nyenye chiganikiwa lepi. 7 Mkotoka kulya liguluvi, hati ngati kwatu zaki zilekini nambu lenili lilukula lepi, lenilo mkotoka kulya muni kwa nyenye liganikiwa lepi. 8 Katu mkotoka kulya nyofu zaki wala kupamisa mituhi yaki, muni vyenivi viganikiwa lepi kwinu.

9 Mwihotola kulya viumbi vyovyoha vyevitama munyanja amala mumifuleni vyevivii na magwaba amala magaugau. 10 Nambu viumbi vyoha vyevitama munyanja amala mumfuleni, vyangali na magwaba amala magaugau, vyenivyo mukotoka kulya muni ndi yomeso. 11 Lukumbi lwoha viumbi vyenivyo yati vivya vihakau kwinu. Mkoto kulya nyofu zaki amala kupamisa mituhi yavi muni vyenivyo ndi yomeso kwinu. 12 Mkoto kulya chochoa chechitama mumanji changali mapezi amala magaugau muni chenicho ndi yomeso.

13 Videge vyoha vyevigelekela ndi yomeso, ndi mkoto kulya, namanyanga na lituhi na kapungu, 14 na mambanga, na aina zoha za mambanga. 15 Makungulu goha, 16 na mbuni na ligulugulu amala chechengu na aina zoha za mambanga, 17 lituhi lidebe, ndiu na lituhi livaha, 18 lituhi lamsopi na lituhi la kulugangatu na kamchechengu amala mchechengu, 19 limalasomba na aina zoha za lilovasomba amala libwibwi na chinimanima.

20 Vingokoko vyoha vyevivi na magwaba na vyevigenda kwa magendelu mcheche. vyenivyo mkotoka kulya muni vyenivyo ndi yomeso. 21 Nambu, pagati ya viumbi vyevivi na magwaba na vyevigenda pandima kwa magendelu mcheche vyenivyo mwihotola kuvilya. 22 Kuhumila muviumbi vyenivyo ndi mwihotola kulya nzige na mambalanguli na makululu na aina ndalindali za mambalanguli. 23 Nambu vinkoko vingi vyoha vyevivi na magwaba na magendelu mcheche vyenivyo mkotoka kulya muni ndi yomeso.

24 Mundu yeyoha mweipamisa mituhi yavi yati ivya yomeso mbaka kimihi. 25 Mundu akatola pandu pa mituhi yaki yati iyidakiliwa lepi mbaka kimihi, na nyula zaki yikumgana achapa. 26 Ngati mundu akapamisa mtuhi wa chinyama chochoha chechivii na kwatu zezigavaniki nambu hinyama yeniyo yilukula lepi, mundu mwenuyo yati iyidakiliwa lepi kwa kumfugamila Chapanga. 27 Chinyama chochoha chechigenda kwa higanja yaki hati ngati china magendelu mcheche, chenicho mkotoka kulya, na yeyoha mweipamisa mituhi ya hinyama yeniyo yikumgana achapa nyula zaki, yoyoha mweipamisa ndi yati ivya angaganikiwa mu kumfugamila Chapanga. 28 Mundu yeyoha mweigega mtuhi wenuwo yati iyidakiliwa lepi mukumfugamila Chapanga mbaka kimihi, nambu yati yikumgana achapa nyula zaki.

29 Vinyama vyevigenda panani ya ndima vyangayidakiliwa kwa kumfugamila Chapanga ndi ivii, lingwichili na mbeva aina ndalindali za mamkwakwa, 30 liwuluwundu na liwulu na mjusi na mijusi na lwiha. 31 Venavo vyoha vyevikwava panani ya ndima ndi viganikiwa lepi kwinu na mundu yeyoha mweipamisa mituhi yaki, yati iyidakiliwa lepi mukumfugamila Chapanga mbaka kimihi. 32 Yikavya mtuhi wa viumbi veniavo ukagwilila chindu chochoa, chivya cha mbawu amala nyula ya chikumba amala ligunila amala chombo chochoha cha kuhengela lihengu loloha lila, chindu chenicho yati chiyidakila lepi mbaka kimihi. Chiganikiwa chitumbikwa mumanji muni chivya kangi chabwina. 33 Yikavya mtuhi umonga ugwilili mugati ya chiviga, hinu kila chechivii muchiviga chenicho ndi chiganikiwa lepi kwa kumfugamila Chapanga, na veve yikugana uchibayula chiviga chenicho. 34 Chakulya amala mnyweso wowoha weuvii mugati ya chiviga chila yati chivya changayidakiliwa. 35 Chindu chochoa chechigwiliwi na pandu pa mtuhi, yati chivya changayidakiliwa. Yikavya litanulu la chihinja amala chihinja, ndi chiganikiwa chidenyewa. Hinu yati vivya viganikiwa lepi kwinu. 36 chimonga pagati ya mituhi yeniyo, chikagwilila muchiliva amala chinyepa cha manji gaki gihotola kuvya gabwina. Nambu chindu chochoha chikapamisayi chimonga pagati ya mituhi yeniyo ndi yati chivya changaganikiwa kwa kumfugamila Chapanga. 37 Ngati pandu pa mtuhi yati yigwilila mbeyu za kumija, mbeyu zenizo yati zisigalila bwina. 38 Nambu ngati mbeyu zitumbikwi na mtuhi umonga ugwilili mwenumo, mbeyu zenizo zivya zangaganikiwa.

39 Ngati chinyama chochoha chechiyidakiliwi kulya chikafwayi, mundu yeyoha mweipamisa mtuhi waki, yati ivya angayidakiliwa kwa kumfugamila Chapanga mbaka kimihi. 40 Mundu yeyoha akalyayi nyama ya mtuhi wenuwo yati ichapa nyula zaki na yati ivya angayidakiliwa mbaka kimihi. Na mundu yeyoha mweigega mtuhi wenuwo, yati ichapa nyula zaki, na mwene yati ivya angayidakiliwa mbaka kimihi.

41 "Katu mkoto kulya chiumbi chochoa chechikwava pandima muni ndi yomeso. 42 Chiumbi chochoha chechikwava, na chochoa chechigenda kwa magendelu goha mcheche amala magendelu gamahele, vyoha vyevilandala katu mkotoka kulya ndava muni ndi yomeso kwinu. 43 Mkoto kujihakasa mwavene kwa kulya chochoa kuhuma muviumbi vyenivyo. 44 Ndava muni nene Bambu Chapanga ndi Chapanga winu, mjinyambisa na kuvya vamsopi ndava nene ndi namsopi. Mkoto kujihakasa mwavene kwa kulya chiumbe chochoa chila chechihamba panani ya ndima. 45 Ndava muni nene ndi Bambu Chapanga mwenivawusili kuhuma ku mulima wa Misili muni nivya Chapanga winu, ndava yeniyo muvya vamsopi muni nene namsopi."

46 Wenuwo ndi, mhilu kuvala hinyama na videge na viumbi vyoha vya pandumba na vya mumanji, 47 Yikuvagana mumanya pagati ya viumbi vyeviyidakiliwa na vyangayidakiliwa kwa kumfugamila Chapanga na vyevivi mumi vyeviganikiwa kuliwa na vyangaganikiwa kuliwa ndava ya kumfugamila Chapanga.