1 Bambu Chapanga akamjovela Musa, 2 "Valeta Aloni na vana vaki vakonganika palongolo ya mlyangu wa lindanda la kukonganekela, tola nyula za Msopi na mahuta ga unyambisu na ngo'mbi za kuvalekekesa kubuda kwavi na mambelele gagosi gavili na chidengu cha mabumunda gangali ngemeku. 3 Kangi vakemela pamonga vandu voha va Isalaeli palongolo ya mlyangu wa lindanda la kukonganekela."

4 Musa akakita ngati chealagaziwi na Bambu Chapanga, akavakemela vandu va Isilaeli voha palongolo ya mlyangu wa lindanda la kukonganekela. 5 Musa akavajovela mngonganu, "Genaga ndi malovi gealagizi Bambu Chapanga kuvya gakitikayi."

6 Penapo Musa akavaleta Aloni na vana vaki vagosi akavasambisa kwa manji. 7 Kangi akamuwalika Aloni kanzu na kumkunga kwa mukungi mewa akamuwalika na kanzu yingi na kizibau na kumkunga muchiwunu chaki mkungi weutotiwi bwina. 8 Kangi akavika kahaku panganga ya Aloni na mugati ya kahaku kala akasopa maganga gegikemiwa Ulimu na Sumimu, gegakumkita amanya geigana Bambu Chapanga akita. 9 Kangi akamuwalika Aloni chilemba na upandi wa kulongolo wa chilemba chenicho akavika lipambu la zahabu, kulangisa kuvya mwene ahaguliwi na Bambu Chapanga, ngati Bambu Chapanga heamulagazili Musa.

10 Hinu Musa akatola mahuta ga unyambisu, akamichila Lindanda lila la Kukonganekela na vindu vyoha vyevivi mugati yaki na akaviwusa vindu vyenivyo vyoha vihengewa na Bambu Chapanga ndu. 11 Kangi akamicha pandu pa mahuta ago panani ya pandu pa kuwusila teta mala saba, mewa akamicha panani ya vindu vyaki vyoha pamonga na chihulu na chitamilu chaki, na akavikita vindu vyenivyo vyoha vihengewa ndava ya Bambu Chapanga ndu. 12 Mewawa Musa akamnyunyisila Aloni mahuta pamutu muni amuwusa avya ndava ya Bambu Chapanga. 13 Kangi Musa akavaleta vana va Aloni akavawalika kanzu na kuvakunga mikungi muhiwunu, na kuvawalika chilemba ngati Bambu Chapanga cheamlagizi Musa.

14 Hinu Musa amletili ngo'mbi mpapakasi wa luteta lwa kulekekesa kubuda, mwene Aloni na vana vaki vakavika mawoko gavi panani ya mutu wa ngo'mbi yeniyo. 15 Musa akayihinja ng'ombi yeniyo, akatola pandu pa ngasi kwa lung'onji lwaki akayinyala mumang'elu ga pandu pa kuwusila teta muni alunyambisa. Kangi akatola ngasi yeyasigalili akayiyita pahi ya pandu pa kuwusila teta. Ndava yeniyo akapavika pandu pa kuwusila teta penapo ndava ya Bambu Chapanga muni kulukitila utepulanisa. 16 Mewa Musa akatola mahuta goha gegavii mulutumbu, pandu pabwina pa chibindi pamonga na figu zoha zivili na mahuta gaki na kutinyisa panani papandu pa kuwusila teta. 17 Nambu nyofu ya ng'ombi yila pamonga na chikumba chaki na mahi gaki akavitinyisa kwa motu kutali ya lindanda lavi ngati Musa chealagaziwi na Chapanga.

18 Kangi, Musa akalileta limbelele ligosi la luteta lwa kutinyiswa. Aloni na vana vaki vakavika mawoko gavi panani ya mutu wa limbelele lenilo. 19 Musa akalihinja limbelele lenilo ligosi na ngasi yaki akanyunyusila pandi zoha za pandu pa kuwusila teta. 20 Adumulini nyofu ya limbelele lenilo hipandi hipandi, akavitinyisa pamonga na mutu waki na mahuta gaki. 21 Peamali kusanja vindu vya mugati na mabodo kwa manji. Musa akavitinyisa vyoha panani ya pandu pa kuwusila teta pamonga na nyofu yingi ya limbelele kuvya luteta lwa kutinyiswa. Lwenulu ndi luteta lweluwusiwa kwa motu, lwelunungalila bwina lwa kumganisa Bambu Chapanga. Musa ahengili ngati chealagaziwi na Bambu Chapanga.

22 Kangi aliletili limbelele ligosi lingi, muni kuvavika Aloni na vana vaki va chigosi vavyai ndava ya Bambu Chapanga. 23 Musa akalihinja limbelele lenilo na akatola ngasi yaki na kumnyala Aloni palikutu laki la kulyela, na lugumba lwa chiwoko chaki cha kulyela na lugumba lwa chigendelu cha kulyela. 24 Kangi Musa akavaleta vana vagosi va Aloni palongolo ya mngonganu, na mwene Musa akavanyala ngasi yeniyo mupandi za makutu gavi ga kulyela na mugumba za mawoko gavi gakulyela na mugumba za magendelu ga kulyela. Ngasi yingi amichalili mupandu pa kuwusila teta pandi zoha. 25 Mewa akatola mahuta goha, mahuta ga mkila na mahuta goha gegigubika vindu vya mugati na mahuta gegigubika chibindi na figu zoha zivili pamonga na mahuta ga liwondo la chigendelu cha kulyela cha kumbele. 26 Hinu mulidengu la mabumunda gangali ngemeku lelavikiwi palongolo ya Bambu Chapanga akatola libumunda limonga na libumunda limonga lelitendekiwa kwa mahuta na libumunda limonga lidebe, akagavika panani ya hipandi yabwina ya nyofu na panani ya liwondo la mumbele la upandi kulyelela. 27 Musa akavivika vyoha mumawoko ga Aloni na vana vaki, vene vakaviyinula kunani kulangisa kuvya viwusiwi kwa Bambu Chapanga. 28 Kangi Musa akavitola vindu vyoha kuhuma mumawoko gavi na kuvitinyisa panani ya pandu pa kuwusila teta pamonga na luteta lwa kutinyiswa. Lwenulo ndi luteta lwa kuvawusa vandu kwa Bambu Chapanga vavya vamteta, lwelunungalila kwa kumganisa Bambu Chapanga, luteta lweluwusiwi kwa motu. 29 Kangi Musa akatola nganga yila ya limbelele ligosi yeyavii pandu pa Musa ya kuvavika vandu vavya vahengaji va Bambu Chapanga, akayinula na kuyinyugusa palongolo ya Bambu Chapanga kuvya luteta lwa kuyinuliwa, ngati Bambu Chapanga cheamulagizi Musa.

30 Hinu Musa akatola mahuta ga unyambisu na ngasi kuhuma papandu pa kuwusila teta akavanyunyusila Aloni na vana vaki mewa na nyula zavi. Ndi Musa akavawusa Aloni na vana vaki vamuhengela Bambu Chapanga.

31 Musa akamjovela Aloni pamonga na vana vaki vagosi, "Mteleka nyofu yeniyo palongolo ya mlyangu wa lindanda la kukonganekela, mlyai penapo pamlyangu pamonga na libumunda kuhuma mulidengu lelivii na luteta lwa kuvanyambisa vandu ndava ya kumuhengela Bambu Chapanga. Mkitayi ngati cheanilagisi Bambu Chapanga kuvya nyofu yeniyo na mabumunda yati vilya Aloni na vana vaki. 32 Tinyisa nyofo yoyoha amala libumunda loloha lelisigalila. 33 Mkoto kuhuma kuvala ya mlyangu wa Lindanda la Kukonganekela lukumbi lwa magono saba, mbaka magono ginu ga kunyambiswa gatimila, ndava magono ginu ga kunyambiswa yati givya magono saba. 34 Bambu Chapanga atilagizi tikita chenichi chetikitili lelu, muni kukita utepulanisu ndava yinu. 35 Yikuvagana mtama pandu pakuyingilila mu Lindanda muhi na kilu kwa magono goha saba, kuni mukita chila cheakuchigana Bambu Chapanga, muni mkakotoka kukita chenicho yati mwifwa, chenichi ndi cheanilagisi Bambu Chapanga." 36 Aloni na vana vaki vakitili kila chindu ngati Bambu Chapanga cheamlagizi Musa.