1 Pegamaliki magono saba ga kukitwa kuvya vamteta Aloni na vana vaki vagosi, ligono la nane Musa akavakemela Aloni na vana vaki pamonga na vagogo va Isilaeli. 2 Musa akamjovela Aloni, "Utola mpakakasi wa ngo'mbi yigosi ndava ya luteta lwa kuwusa kwa Bambu Chapanga ndava ya kulekekesa kubuda kwaku na mpapakasi wa limbelele ligosi ndava ya luteta lwa kutinyiswa, hinyama yoha yikoto kuvya na dosali. Kangi uvawusa luteta palongolo ya Bambu Chapanga. 3 Kangi uvajovela Vaisilaeli vatola lipongo ndava ya luteta lwa kulekekesa kubuda, mpapakasi wa ng'ombi umonga na mwana wa limbelele limonga, zoha zivili zivya na ntanga ya mwaka umonga, vangali dosali ndava ya luteta lwa kutinyiswa. 4 Kangi utola ng'ombi yigosi yimonga na limbelele limonga ligosi ndava ya luteta lwa uteke, hinyama yeniyo yati yihinjwa palongolo ya Bambu Chapanga, pamonga na luteta lwa uhembe wevahangasini na mahuta ga zeituni viganikiwa vakitayi chenicho muni Bambu Chapanga yati akuvahumila lelu."

5 Valetili vindu vyoha palongolo ya lindanda la kukonganekela ngati cheavalagazili Musa, na Vaisilaeli voha vakakonganeka penapo kumfugamila Bambu Chapanga. 6 Musa akavajovela, "Lenili ndi lijambu leavalagizi Bambu Chapanga mukitayi muni ukulu waki ulolekana kwinu." 7 Penapo Musa akamjovela Aloni, "Hamba ku pandu pa kuwusila teta umuwusila Bambu Chapanga luteta lwa kulekekeswa kubuda na luteta lwa kutinyiswa muni kujikitila utepulanisu veve ndava ya vandu. Wusa luteta lwenulo ndava ya vandu na kukita utepulanisa ndava yavi ngati chealagisi Bambu Chapanga."

8 Hinu, Aloni akahamba papandu pa kuwusila teta, akaihinja mpapakasi wa ng'ombi yigosi yila kuvya luteta lwa kulekekeswa kubuda kwaki mwene. 9 Vana vaki vagosi vamletili ngasi yevakingili yila, na mwene akajwiga lung'onji lwaki mu ngasi yila na kunyala mumang'elu ga pandu pa kuwusila teta. Ngasi yeyasigalili akayiyita pahi ya chitamilu cha pandu pa kuwusila teta. 10 Nambu mahuta na figu na hibindi vya chinyama chenicho cha kulekekesa kubuda akavitinyisa vyoha panani ya pandu pa kuwusila teta ngati Bambu Chapanga cheamulagisi Musa. 11 Hinu nyofu na chikumba akavitinyisa kuvala kutali na kambi yavi.

12 Kangi Aloni akahinja limbelele ligosi la luteta lwa kutinyiswa. Vana vaki vagosi vamletili ngasi yevakingili, na mwene akayinyunyusila pandi zoha za pandu pa kuwusila teta. 13 Kangi vana vaki va chigosi vamletili nyofu yeniyo yeyidumuliwi hipandi hipandi pamonga na mutu, akavitinyisa panani ya pandu pa kuwusila teta. 14 Akasanja vindu vya mugati na magendelu na kuvitinyisa pamonga na luteta lula lwa kutinyisa panani ya pandu pa kuwusila teta.

15 Kangi Aloni akaleta mene ya luteta lwa kuvalekekesa vandu kubuda, akayihinja na kuyiwusa kuvya luteta lwa kuvalekekesa vandu kubuda, ngati cheakitili kwa chinyama chila chechalongolili. 16 Hinu Aloni akaleta pandu pa kutinyisila luteta lula lwa kutinyiswa na akaluwusa luteta lwenulo ngati chealagizi Bambu Chapanga. 17 Mewa akaleta luteta lwa mabenu, akanega mabenu chiwoko chimonga na kutinyisa panani ya pandu pa kuwusila teta pamonga na luteta lwa kutinyiswa lwa kila lukela. 18 Akahinja ngo'mbi yigosi na limbelele ligosi ngati luteta lwa uteke ndava ya vandu. Vana vaki vagosi vakampela ngasi yevakingili, mwene akanyunyusila mupandi zoha za pandu pa kuwusila teta. 19 Mahuta ga ngo'mbi yeniyo na limbelele ligosi na mahuta gegigubika mkila na mahuta gegigubika maleme na figu na chibindi, 20 vyoha vyenivi vavivikili panani ya nganga zenizo na Aloni akatinyisa mahuta ago ga hinyama panani ya pandu pa kuwusila teta. 21 Aloni akayinula nganga zenizo na liwondo lila palongolo ya Bambu Chapanga kuvya luteta lwa kuyinuliwa, ngati ulangisu wa kumuwusila Bambu Chapanga, ngati chealagiswi Musa.

22 Aloni peamali kuwusa teta zoha, teta za kulekekesa kubuda na teta za kutinyiswa na luteta lwa uteke, kangi akayinula mawoko gaki akavamotisa, kangi akahuluka pahi. 23 Hinu Musa na Aloni vakayingila mugati ya lindanda la kukonganekela, pevahumili kuvala vavamotisi vandu, na ukulu wa Bambu Chapanga wawonakini kwa vandu voha. 24 Chigafula Bambu Chapanga akahelesa motu, na wene ukayitinyisa teta ya kutinyiswa na mahuta gegavi panani ya pandu pa kuwusila teta. Vandu voha pevauwene motu wula vakaluluta na vakagundama kumfugamila Bambu Chapanga.