1 Ngati mundu yeyoha akaganikiwa kujova mulibanji ndava ya lijambu lealiwene amala kuliyuwana, mwene akabela kujova chindu cheachiweni na kuchiyuwana, ivya ahokili ndi iganikiwa abuniwa.

2 Ngati mundu yeyoha pagati yinu apatili uhakau changali kumanya kwa kupamisa chindu chochoa changayidakiliwa mukumfugamila Chapanga, yikavya mtuhi wa chinyama cha kudahi amala chinyama cha kufuya amala vingokoko, ndi ivya ahokili.

3 Amala mundu akapamisa chindu chochoha chihakau chechihumila kwa vandu, chindu chochoa chechihotola kumkita akoto kuyidakiliwa mukumfugamila Chapanga, hati ngati mwene achimanyi lepi, hinu, pala peimanya ndi ivya ahokili.

4 Amala, ngati mundu akalapa kukita chindu chochoa chila, chabwina amala chihakau changahololela, pala peakuchimanya ndi ivya abudili.

5 Hinu, mundu peihoka ndava ya kukita chenicho yikumgana awungama kwa kujova kubuda kwaki kweahengili, 6 kangi amletela Bambu Chapanga luteta lwaki lwa kulekekeswa kubuda kwaki. Ndava ya kubuda kweahangili, yati ileta limbelele lidala amala mene mbuguma kuhuma mumifuya yaki kuvya luteta lwa kubuda. Mteta wa Chapanga akumhengela utepulanisi ndava ya kubuda kwaki kweakitili.

7 Nambu mundu mwenuyo ngati ihotola lepi kuleta mwanalimbelele amala mene, yati ileta ngunda zivili amala mawela gavili ga ngunda kwa Bambu Chapanga kuvya mbunu ndava yakubuda kweahengili, na ngunda yimonga ndava ya luteta lwa kubuda na lijiva limonga ndava ya luteta lwa kutinyiswa. 8 Yati akuvileta kwa mteta wa Chapanga, mwene yati akuchiwusa chimonga kuvya luteta lwa kulekekesa kubuda kwa kudenya hingu yaki na kuleka mutu uyinjila, 9 kangi atola ngasi na kumicha mumihana ya pandu pa kuwusila teta, na ngasi yeyisigalila yiganikiwa asopa pahi ya chitamilu cha pandu pa kuwusila teta. Lwenulu ndi luteta lwa kulekekesa kubuda. 10 Kangi akuyiwusa yingi yila kuvya luteta lwa kutinyiswa kwa kulanda cheyilagizwi. Mteta wa Chapanga yati akumkitila utepulanisi mundu mwenuyo ndava ya kubuda kwaki, na mwene yati ilekekeswa.

11 Yikavya ihotola lepi kupata majiva gavili amala ngunda zivili, ndi aleta uhembe kilo yimonga. Nambu akotoka kusopa mahuta ga zeituni amala ubani muni lwenulo ndi luteta lwa kulekekesa kubuda. 12 Yati akumletela Mteta wa Chapanga, na mwene yati inega uhembe wenuwo chiwoko chomonga na kutinyisa panani ya pandu pa kuwusila teta ngati pandu pa ukumbusho, yati yitinyiswa panani ya luteta zeziwusiwa kwa Bambu Chapanga kwa motu. Lwenulo ndi luteta lwa kulekekesa kubuda. 13 Kwa njila yeniyi mteta wa Chapanga yati akutepulanisa na Chapanga ndava ya kubuda kwaki, ndi yati ivya alekekekiswi kubuda kwaki. Uhembe weusigalili yati wivya wa mteta, ngati cheyavili kwa luteta lwa mabenu.

14 Bambu Chapanga akamjovela Musa, 15 ngati mundu yeyoha akasindwa kukita gegiganikiwa na Chapanga changali kumanya ndi ivya ahokili. Mundu mwenuyo yati ileta limbelele limonga ligosi kuhuma mumifuya yaki langali dosali, na samani yaki yati yipimwa kuwanangana na Lindanda la Msopi. Lwenulo ndi luteta lwa kulipisa lideni. 16 Ndi yikumgana alipila ndava ya kusindwa kukita mambu geaganikiwi kukita kwa Chapanga, yati iyongesa lilundu limonga pagati ya muhanu kuhuma muluhuna lwaki na kumupela mteta wa Chapanga. Na mwene yati akumhengela utepulanisi kwa limbelele ligosi lila kuvya luteta lwa kuhoka, na mwene yati ilekekeswa.

17 Ngati mundu yeyoha akabuda na kukita lijambu lelibesiwi mumalagizu gogoha ga Bambu Chapanga hati ngati mwene amanyili lepi ndi yati ivya ahokili, na yati iganikiwa alipa ndava ya kubuda kwaki. 18 Mundu mwenuyo yati akumletela Mteta wa Chapanga limbelele ligosi langali dosali kuhuma mumsambi waki, limbelele lenilo livya na samani ya mashonga gegiganikiwa kulipiswa. Mteta wa Chapanga yati akumhengela utepulanisi kwa kuhoka kweakitili changali kumanya, na mwene yati ilekekeswa. 19 Lwenulo ndi luteta lwa kulipa lideni la kuhoka kweamukitili Bambu Chapanga.