1 Bambu Chapanga alongili na Musa pevamali kufwa vana vavili vagosi va Aloni pala pevahambili palongolo ya Bambu Chapanga na kuwusa moto wangayidakiliwa na Bambu. 2 Bambu Chapanga akamjovela Musa, "Mjovela mlongo waku Aloni akoto ako kubwela pandu popoha peigana pagati ya pandu pamsopi pa pamsopi neju pepavi mumbele ya lipazia palongolo ya chigubiku cha pandu pa utepulanisa chechivi panani ya Lisanduku la Lilaganu. Akotoka kuyingila pandu penapo muni penapo ndi nene penihumila mulihundi panani ya chigoda cha utepulanisa. Ngati iyidakila lepi yati ifwa. 3 Aloni yati iyingila pandu pamsopi kuni agegili mpapakasi wa ng'ombi yigosi ndava ya luteta lwa kulekekesa kubuda na limbelele ligosi ndava ya luteta lwa kutinyiswa."

4 Yati isamba higa yoha kwa manji, kangi yati iwala nyula za msopi na kanzu na chibudula na kukunga mkungi muchiwunu na chinyemba. Zenizi ndi nyula zeziwaliwa lukumbi lwa kumuhengela Bambu Chapanga.

5 Yati itola kuhuma kwa vandu va Isilaeli mapongo gavili ndava ya luteta lwa kulekekesa kubuda na limbelele ligosi limonga ndava ya luteta lwa kutinyiswa. 6 "Aloni yati akuyiwusa ng'ombi yigosi ndava luteta lwa kulekekesa kumbudila kwaki mwene na kukita utepulanisi ndava yaki mwene na vandu va munyumba yaki. 7 Kangi mapongo gala gavili yati akugaleta kwa Bambu Chapanga ku mlyangu wa lindanda la kukonganekela. 8 Yati akuvahagula kwa kukina gudugudu ndava ya mapongo gavili gala, lipongo limonga ndava ya Bambu Chapanga na lingi ndava ya kulekekeswa lihamba kweligana. 9 Aloni yati ileta lipongo lelihaguliwi na gudugudu ndava ya Chapanga na kumvikila luteta lwa kulekekesa kubuda. 10 Nambu lipongo lila lelihaguliwi kwa gudugudu ndava ya kugegeswa kubuda yati ivikiwa palongolo ya Chapanga kuni akona mumi ndava ya kukita utepulanisi, kwa kulilekekesa lihamba kulugangatu kuni ligegili kubuda kwa vandu."

11 "Aloni yati akumuwusa mpapakasi ndava luteta lwa kulekekesa kubuda kwaki muni kukita utepulanisa ndava yaki mwene pamonga na vandu va munyumba yaki, na mwene yati akuuhinja mpapakasi wenuwo ndava ya kulekekesa kubuda kwaki. 12 Mewa yati itola chiyokolelu cha motu na kutola makalakala ga motu papandu pa kuwusila teta palongolo ya Bambu Chapanga na kunega ubani mawoko gavili weuyagiwi bwina. Kangi ayingisayi ubani wenuwo na lumbani lwenulo pandu pamsopi neju. 13 Muni akotoka kufwa yati ileta ubani palongolo ya Bambu Chapanga na kusopa pamoto muni lyohi la ubani ugubika chigubiku cha Lisanduku cha Lilaganu. 14 Yati itola ngasi chidogo ya ng'ombi yigosi yila na kunyunyusila kwa lukonji lwaki upandi wewihumila lilanga panani ya chigubiku cha utepulanisa kangi yati inyunyusila palongolo ya lisanduku la lilaganu mala saba kwa lukonji lulolo."

15 "Kangi yati akulihinja lipongo lila la luteta la kulekekesa kubuda za vandu voha. Ngasi ya lipongo lila yati akuyipeleka kuyetu ya lipanzia ayikitila ngati cheayikitili ngasi ya ng'ombi yigosi yila, yati akuyinyunyusila panani ya chigubiku cha utepulanisa upandi waki wa kulongolo. 16 Kwa kukita chenicho yati ikita utepulanisa ndava ya pandu pamusopi neju nava ya uhakahu wevakitili Vaisilaeli na ndava ya kubuda kwavi. Na mwene yati ikita chichocho ndava ya Lindanda la Kukonganekela lelivii pagati yavi vandu avo vangayidakiliwa mukufugama. 17 Lukumbi Aloni peikita utepulanisa ndava yaki mwene na kwa ndava ya vandu va munyumba yaki na ndava ya msambi wa vandu voha va Isilaeli mundu yoyoha akotoka kuyingila mugati ya Lindanda la kukonganekela mbaka peimala na kuhuma kuvala. 18 Kangi yati ihuma na kuhamba ku pandu pa kuwusila teta palongolo ya Chapanga na kukita utepulanisa ndava ya pandu apo pa kuwusila teta. Yati itola ngasi chidogo ya ng'ombi yila na ya lipongo la mene na kubakala mupandi zoha za pandu pa kuwusila teta. 19 Yati inyunyusila pandu pa kuwusila teta, ngasi yila kwa lukonji mala saba ndava ya kuyivika bwina na kuyivika yihengeka ndava ya Bambu ndu kulandana na uhakasa wa Vaisilaeli."

20 "Aloni peimala kukita utepulanisa ndava ya pandu pamsopi pa Pamsopi neju na lindanda la kukonganekela na pandu pa kuwusila teta, penapo yati iwusa lipongo lakona mumi ndava kulilekekesa leligega uhakasa wa vandu. 21 Aloni yati ivika mawoko gaki panani ya mutu wa lipongo mumi ilo na kuwungama ndava ya kubuda kwa vandu va Isilaeli, kuhoka kwaki kwoha pamonga na kumbudila Chapanga kwavi kwoha, vavika panani ya mutu wa mene yeniyo. Kangi yati akulivinga lipongo lenilo lihamba kulukongolo kuni lipelekwa na mundu yeyoha mweahaguliwi. 22 Yati akulileka lipongo lila lihamba kulukongolo, pandu pangali na vandu, kuni ligegili kubuda kwoha kwa vandu."

23 "Kangi Aloni yati iwuya mugati ya lindanda la kukonganekela, yati ihula nyula zila zeawali lukumbi peayingili pandu pamsopi neju na kuzileka mumwo. 24 Yati isamba mugati mula pandu pamsopi na kuwala nyula zaki za kunyumba. Ndi yati ihuma na kuvika luteta lwaki lwa kutinyiswa limonga ndava ya kubuda kwaki mwene na lingi ndava ya kuwusa kubuda kwa Vaisilaeli, muni kukita utepulanisu ndava yaki mwene na ndava ya vandu voha. 25 Mahuta ga luteta lwa kulekekesa kumbudila Chapanga yati akugatinyisa panani ya pandu pa kuwusila teta. 26 Mundu yula mweahaguliwi kulipeleka lipongo leligegiswi kubuda kulukongolo ndi yikumgana achapa nyula zaki na kusamba ndi peihotola kuyingili mulindanda la kukonganekela. 27 Ng'ombi yigosi yila na lipongo lila zezavikiwi luteta lwa kulekekesa kumbudila Chapanga ngasi yavi yapelikwi pandu pamsopi neju ndava ya kulekekesa kubuda kwa vandu voha, yati zipelekwa kuvala ya lindanda, vikumba vyavi na nyama zavi na mahi gavi vyoha yati vitinyiswa kuvala ya Lindanda. 28 Mundu yula mweakuvitinisa yikumgana achapa nyula na kusamba kwa manji, ndi mwanakandahi yati ihotola kuyingila mukambi."

29 "Lenili ndi lilagizu lemganikiwa kulanda magono goha gangali mwishu. Ligono la kumi la mwehi wa saba, mwavene pamonga na vayehe vevitama pagati yinu, yikuvagana mujihinisa chakulya ligono lenilo na kuleka kuhenga lihengu. 30 Yati mwikita chenicho ndava ligono lenilo nyenye yati mwipatana na nene Bambu Chapanga na yati muvya mwavabwina kuhuma mukubuda kwinu na nyenye yati mwivya mwemuyidakiliwa palongolo ya Bambu Chapanga. 31 Ligolo lenilo ndi ligono la kupumulila na nyenye yati mkujihisa chakulya. Lilagizu lenili ndi la magono goha gangali mwishu. 32 Mteta wa Chapanga mweanyaliwi mahuta na kuhaguliwa ndi mweakumuhala dadi waki kuvya mteta mkulu, ndi mweihenga utepulanisi kuni awalili nyula za msopi zeziyidakiliwa kuwaliwa mukumuhengela Bambu Chapanga. 33 Yati ikita utepulanisi ndava ya pandu pamusopi neju na ndava ya lindanda la kukonganekela na ndava ya pandu pa kuwusila teta pavya bwina na vamteta va Chapanga na ndava ya vandu voha Vaislae 34 Lenili ndi lilagizu aa kusindimala magono goha gangali mwishu kwinu, utepulanisi yati ukitiwa ligono limonga ndu mwaka ndava ya mabudilu goha ga Vaisilaeli." Musa akitili goha ngati Bambu Chapanga cheamlagizi.