1 Bambu Chapanga peavii Palindanda la kukonganekela amkemili Musa na kulongela nayu, akamjovela, 2 uvajovela vandu va Islaeli kuvya ngati mundu akumuwusila Chapanga luteta lwa hinyama, ndi ahagula kuhuma mumsambi waki wa ng'ombi na mambelele amala mene.

3 Ngati mundu yeyoha akawusa luteta lwa kutinyiswa, ahagula ng'ombi yigosi yangali dosali kuhuma mumsambi wa mifuya yaki, ayiwusa pandu pakuyingila mulindanda la kukonganekela muni luteta lwenulo luyidakiliwa na Bambu Chapanga. 4 Mundu mwenuyo avika chiwoko chaki pamutu wa chinyama chenicho cha luteta lwa kutinyiswa, na luteta lwenulo yati luyidakiliwa nadava yaki muni kumkitila mundu mwenuyo utapulanisu na Chapanga. 5 Kangi ayihinja ngombi yeniyo palongolo ya Bambu. Na Vamteta va Chapanga va chiveleku cha Aloni, yati vakuyitola ngasi na kunyunyusila pandi zoha za pandu pa kuwusila teta pamulyangu wa Lindanda la kukonganekela. 6 Mundu mwenuyo yati akuchiyuwula chinyama chenicho chechiwusiwi luteta lwa kutinyiswa na kuchidumulana hipandi hipandi. 7 Na vamteta venavo vana va Aloni yati vipanga sagala panani ya pandu pa kuwusila teta na kupambika motu. 8 Kangi vamteta venavo vana va Aloni yati vitola hipandi ya nyama na mutu pamonga na mahuta ga chinyama chenicho na kuvika bwina panani ya sagala zeziyaka zezivi pandu pa kuwusila teta. 9 Kangi mundu mwenuyo asanja vindu vya mugati na magendelu ga hinyama kwa manji. Mteta wa Chapanga yati akuvitinisa vyoha panani ya pandu pa kuwusila teta. Lwenulu ndi luteta lwa kutinyiswa kwa motu, yeyinungalila bwina yakumganisa Bambu Chapanga.

10 Ngati luteta lwaki lwa kutinyiswa akalutola mumsambi wa mambelele amala mene, yikumgana kuhagula limbelele ligosi amala lipongo langali chilema. 11 Yati akuchihinjila upandi wa kasikazini wa pandu pa kuwusila teta, palongolo ya Bambu Chapanga, vamteta vachiveleku cha Aloni vatola ngasi na vanyunyusila pandi zoha za pandu pa kuwusila teta. 12 Kangi mundu mwenuyu yati akuchidumula hipandi hipandi, akuvibagula mutu pamonga mahuta, hinu Mteta wa Chapanga na kuvivika bwina pamotu panani ya pandu pa kuwusila teta. 13 Yikumgana mundu mwenuyo asanja vindu vya mugati na magendelu kwa manji. Mteta wa Chapanga yati akuvitinisa vyoha panani ya pandu pa kuwusila teta. Lwenulo ndi luteta lwa kutinyiswa na motu lwelunungalila bwina lwa kumganisa Bambu Chapanga.

14 "Ngati akumuwusila Bambu Chapanga luteta lwa kutinyisa lwa chidege, ndi awusa luteta lwa lijiva amala ngunda. 15 Mteta wa Chapanga yati akuchileta chidege chenicho pandu pa kuwusila teta, akuchidodoyola singu na kunyofola mutu na kuvika panani ya pandu pa kuwusila teta. Ngasi yaki yati akuyinyunyusila mumuhana lwa pandu pa kuwusila teta. 16 Litolokoo laki pamonga na uhakau waki akuviwusa na kutaga upandi wa kwelihula lilanga wa pandu pa kuwusila teta kwekuvii na malyenge. 17 Kangi achikamula magwaba na achipapula, nambu akotoka kuchidumula hipandi hivili. Kangi, mteta akuchitinyisa pa sagala zeziyaka motu panani ya pandu pa kuwusila teta. Lwenulo ndi luteta lwa kutinyiswa kwa motu yeyinungalila bwina ya kumganisa Bambu Chapanga."