1 Bambu amjovili Musa, 2 "Ligono la kutumbula la mwehi wa kutumbula, yati ukulivika Lindanda la kukonganekela na Bambu. 3 Mugati ya Lindanda lenilo yati uvika Lisanduku lelina vibau vya malagizu kumi, kangi vika lipazia palongolo yaki. 4 Yati uyingisa meza na kuvika vindu panani yaki. Mewa yingisa na chindu pa kuvikila hahi na uvika panani yaki. 5 Pandu kwa zahabu pa kuhukisila ubani yati ukuyivika palongolo ya Lisanduku la Lilaganu, kangi koveka lipazia pandu pa kuyigilila wa Lindanda la Bambu. 6 Mazabahu yati ukuyivika palongolo ya pandu pakuyingila mu Lindanda la kukonganekela na Bambu. 7 Vika nkeve uvaha wa kusambila pagati ya Lindanda la kukonganekela na Bambu na mazabahu kuwusila luteta na kumemesa manji. 8 Yati utindisila uwa na kukoveka lipazia pandu pa kuyingila."

9 "Kangi tola mahuta ago gamsopi na kuyitalila Lindanda lenilo na vindu vyaki vyoha na vyene yati vivya vyamsopi. 10 Kangi yitila mahuta ga kuvika vandu na vindu palongolo ya Bambu mazabahu ya kutinyisila luteta na vindu vyaki vyoha, ndi yati yivya yamsopi neju. 11 Nkeve uvaha wa kusambila na chitamilu chaki mewa yati ukuliyitali mahuta ga kuvabagula vandu na vindu ndava ya Bambu."

12 "Mkemela Haloni na vana vaki vagosi vabwela pamlyangu wa Lindanda la kukonganekela na Bambu uvasambisa. 13 Muwalika Haloni nyula za chimteta zila, myitila mahuta na kumvagula ndava ya lihengu la Bambu muni ahotola kunihengela ngati mteta. 14 Vakemela vana vaki na kuvawalika ligwanda litali lila. 15 Kangi uvayitila mahuta ngati chawamuyitili dadi wavi, muni na vene mewa vanihengela ngati vamteta. Kuvanyala mahuta kwenuko ndi kuvayingisa muuteta wa magono goha muviveleku vyavi vyoha."

16 Ndi Musa akakita goha ngati gealagizwi na Bambu. 17 Pelahikili ligono la kutumbula la mwehi wa kutumbula mwaka wa pili tangu pavawukili ku Misili, Lindanda la kukonganekela na Bambu layimikwi. 18 Musa atenganizi Lindanda kwa kuvika vitamilu vyaki, akayinula mbawu zaki, akawunganisa felemu zaki na kuyimamisa mapanda gaki. 19 Avikili chigubiku kunani ya Lindanda la kukonganekela na Bambu kangi vikili chigubiku cha chikumba nyilili kunani yaki, ngati chealagizwi na Bambu. 20 Kangi akatola vibawu vivili vya vila vya maganga vyeviyandikwi malagizu na kuvika mulisanduku la Lilaganu. Akayingisa mikamulilu mupete ya Lisanduku na kuvika chigubiku panani yaki. 21 Kangi akalileta Lisanduku mugati ya Lindanda la kukonganekela na Bambu na kukoveka lipazia, na kulidivalila Lisanduku la Lilaganu ngati chealagizwi na Chapanga.

22 Kuvala ya lipazia lenilo, Musa akavika meza mugati ya Lindanda la kukonganekela upandi wa kasikazini, 23 na panani ya meza yeniyo akavika mabumunda gegavikiwi palongolo ya Bambu, ngati chealagizwi na Bambu. 24 Akavika chindu cha kuvikila hahi mugati ya Lindanda la kukonganekela na Bambu, upandi wa kusini chilolisana na meza. 25 Na mu Lindanda mula, akapambika hahi palongolo ya Bambu, ngati chealagizwi na Bambu. 26 Akavika mazabahu ya zahabu mu Lindanda palongolo ya lipazia, 27 na kuhukisila ubani weunungalila bwina panani mazabahu yeniyo, ngati chealagizwi na Bambu. 28 Akoviki lipazia pamlyangu wa Lindanda la kukonganekela na Bambu, 29 Akavika papipi na mlyangu wa Lindanda la kukonganekela na Bambu mazabahu ya kuwusila luteta lwa kutinyisa, akawusila luteta lwa kutinyisa na luteta lwa mabenu, ngati chalagizi Bambu. 30 Avikili nkeve uvaha wa kusambila pagati ya Lindanda la kukonganekela na Bambu na mazabahu ya kuwusila luteta na kusopa manji ga kusamba. 31 Musa na Haloni na vana vaki vagosi, voha vakasamba mawoko na magendelu gavi munkeve uvaha wenuwo. 32 Kila pavayingila mugati ya Lindanda amala kuhika papipi na mazabahu ya kuwusila luteta, vasambili ngati Musa chealagizwi na Bambu. 33 Pamwishu Musa atenganizi uwa kutindila Lindanda la kukonganekela na Bambu na mazabahu ya kuwusila luteta, na kuvika lipazia pamlyangu wa uwa. Hinu Musa amalili lihengu loha.

34 Kangi lihundi lila lagubiki Lindanda la kukonganekela na Bambu, na ung'asima wa ukulu wa Bambu walimemisi Lindanda. 35 Musa ahotwili lepi kuyingila mugati ya Lindanda la kukonganekela na Bambu ndava ya lihundi latamili panani yaki, na ung'asima wa ukulu wa Bambu wamemili mwenumo. 36 Mulugendu lwavi lwoha Vaisilaeli katu vatumbwili lepi lugendu ndi lukumbi lwoha lihundi lenilo pelayinuliwi kunani ya Lindanda lenilo. 37 Changali kuyinuliwa lihundi lenilo vene vatumbwili lepi lugendu, nambu valindili mbaka pelayinuliwi. 38 Mulugendu lwavi lwoha Vaisilaeli vahotwili kuliwona lihundi lelilangisa kuvya kwa Bambu panani ya Lindanda lukumbi lwa muhi na lukumbi lwa kilu vauwene motu mulihundi lenilo.