1 Kangi, Bambu akamjovela Musa, "Hamba kwa nkosi wa ku Misili ukamjovela Bambu ijova, ‘Valeka vandu vangu vahamba muni vakanigundamila. 2 Nambu ukabelayi kuvaleka vawukayi yati nikuutova mulima woha kwa kuwuletela manyoto. 3 Mfuleni Naili yati umema manyoto, na manyoto genago yati giyingila mbaka munyumba yaku, muchumba chewigona na pachitanda chaku na munyumba za vatangatila vaku na vandu vaku, genago yati giyingila muvihinja vinu na muvindu vya kuhanganisila uhembe. 4 Manyoto yati gihumbila muhiga yaku na muhiga za vandu vaku na vatangatila vaku.’ "

5 Bambu akamjovela Musa, "Mjovela Haloni ayinula ndonga yaki panani ya mifuleni na kapela na mikingisu na matanda, na manyoto yati gihumila na kudandasika kila pahali pamulima wa Misili." 6 Ndi Haloni akayinula yaki panani ya manji goha, na manyoto gakahumila na kugubika mulima woha wa Misili. 7 Nambu vahavi va ku Misili kwa uhavi wavi mewa vakaleta manyoto pamulima wa Misili.

8 Kangi nkosi wa ku Misili akamkemela Musa na Haloni akavajovela, "Mumyupa Bambu, muni aniwusila nene na vandu vangu manyoto aga, ni nene yati nikuvaleka Vaisilaeli vahamba na kumtendekela luteta Bambu."

9 Musa kamyangula nkosi wa ku Misili, "Hinu uhotola kunijovela lukumbi lweugana nikuyupila kwa Chapanga, nivayupila vatangatila vaku na vandu vaku, yati nikumyupa akomakesa manyoto aga gegavili munyumba zinu, yati gisigalila ndu ku mfuleni Naili!"

10 Nkosi akayangula, "Chilau." Musa akajova, "Yati nikita ngati cheujova, muni umanya kuvya kawaka mweiwanana na Bambu, Chapanga witu. 11 Manyoto yati giwuka kwaku na kwa vatangatiala vaku na kwa vandu vaku, yati gisigalila ndu ku mfuleni Naili" 12 Ndi, Musa na Haloni vakawuka kunyumba ya nkosi, na Musa akamuyupa Bambu awusa manyoto geagaletili kwa nkosi. 13 Bambu akitili ngati Musa cheayupili. Manyoto gala gafwili mumanyumba na mumaluvanja na mumigunda. 14 Vamisili vayolili manyoto ago malundu malundu, mulima woha wanungili. 15 Nambu nkosi pealolili manyoto gafwili, akayendelela kuvya na ndindani mumtima, avayuwanili lepi Musa na Haloni, ngati Bambu cheajovili kwakona.

16 Kangi, Bambu akamjovela Musa, "Mjovela Haloni ayinula ndonga yaki kunani na kutova palububu, yati ging'anamuka kuvya ving'olong'olo mulima woha wa Misili." 17 Musa na Haloni vakakita chenicho. Haloni ayinwili ndonga yaki na kutova lububu, ndi gakang'anamuka kuvya ving'olong'olo na kuzangila vandu na hinyama. Lububu lwoha ku Misili lukang'anamuka kuvya ving'olong'olo. 18 Vahavi va ku Misili vakalinga kwa kuhengela uhavi wavi kung'anamusa lububu kuvya ving'olong'olo, nambu vahotwili lepi. Ving'olong'olo genago gayenili panani ya vandu na hinyama. 19 Vahavi vala vakamjovela nkosi, "Lenili ndi lihengu la Chapanga" Nambu mtima wa nkosi wayendalili kuvya na ndindani, avayuwanili lepi Musa na Haloni ngati chila cheajovili Bambu.

20 Kangi Bambu akamjovela Musa, "Chilau yimuka lukela pehe uhamba na ukakonganekayi na nkosi lukumbi peihamba kumfuleni umjovela, Bambu ijova, ‘valeka vandu vangu vahamba muni vakanigundamila. 21 Ngati ukabela kuvaleka vandu vangu vahamba, yati nikuletela misambi ya mavembe, veve na vatangatila vaku na vandu vaku voha. Yati giyingila munyumba zinu na nyumba zoha za vamisili yati zimema misambi ya mavembe, mewawa na kila pandu na pandima yoha ya Misili. 22 Nambu ligono lenilo pandu pa Gosheni pevitama vandu vangu yati nikita lepi chenicho, kwenuko yati givya lepi mavembe. Penapo ndi yati umanya kuvya Nene ndi Bambu nivii pamulima waku. 23 Yati nikuvalekanganisa vandu vangu na vandu vaku. Gachinamtiti genago yati gihengeka chilau.’ " 24 Bambu akitili ngati cheajovili, msambi uvaha wa mavembe wazangili nyumba ya nkosi, na nyumba ya vatangatila vaki na mulima woha wa Misili. Mlima woha wa Misili wahalabiswi na mavembe ago.

25 Ndi nkosi avakemili Musa na Haloni, akavajovela, "Hinu muhotola kuhamba kumuwusila luteta lwa kutinyisa Chapanga winu bahapa pamulima wa Misili."

26 Nambu Musa akamyangula, "Lepi, Tiganikiwa lepi kukita chenicho, muni luteta lwa kutinyisa lwetukumuwusila Bambu, Chapanga witu, yati zikuvayomesa Vamisili. Wu, Vamisili vakatiwonayi tiwusa luteta lwa kutinyiswa lwelukuvayomesa, yati vakutikoma lepi kwa maganga? 27 Tiganikiwa kuhamba lugendu lwa magono gadatu kulugangatu tikamuwusila luteta Bambu, Chapanga witu, ngati cheakutilagiza."

28 Hinu, nkosi akajova, "Yati nikuvaleka muhamba mukamkitala luteta Bambu, Chapanga winu, kulugangatu. Nambu mkoto kuhamba kutali neju. Muniyupila na nene."

29 Musa akayangula, "Lukumbi peniwuka, yati nikumyupa Bambu awusa msambi wa mavembe aga kwa veve nkosi, vatangatila vaku na vandu vaku, chilau. Nambu veve ukotoka kutikonga kangi kwa kubela kuvaleka vandu vahamba kumuwusila Bambu luteta lwa kutinyisa."

30 Hinu ndi, Musa akawuka panyumba ya nkosi, akamyupa Bambu. 31 Bambu akahenga ngati Musa cheamyupili. Mavembe gala gakawuka kwa nkosi, na vatangatila vaki na vandu vaki ndi penapo lasigalile lepi livembe hati limonga. 32 Nambu hati lukumbu lwenulo nkosi avili na ndindani avalekili lepi Vaisilaleli vahamba.