1 Bazaleli na Olihabu na vatangatila wavi vatotili nyula zeziwanana za vamteta kwa kutumila kwa chitambala chamsopi na wuzi wa langi ya buluu na zambalau na gadung'u ndava ya kuwala lukumbi lwa kuhengela pandu pamsopi. Vamtotili Haloni nyula za msopi ngati Bambu cheamulagizi Musa.

2 Vatenganizi nyula ya kugubika nganga kwa chitambala chamsopi na kwa wuzi wa langi ya buluu na zambalau na yidung'u na kwa wuzi wamsopi weubotiwi. 3 Venavo vakitili lufumba lwa zahabu na kudumula vipandi videbedebe na kukita wuzi ngalingasi neju muni kutota pamonga na wuzi wa langi ya buluu na zambalau na yidung'u na chitambala chamsopi chechibotiwi. 4 Nyula ya kugubika nganga yeniyo yawaliwayi kwa nyosi zivili mumavega zezitotiwi mumang'elu gaki gavili. 5 Mkungi webotiwi bwina watenganizwi na vindu vivyovyo vyevyatenganizil nyula ya kugubika nganga, chatenganizwi kwa zahabu na langi ya buluu na zambalau na yidung'u, muchitambala chamsopi chabotiwi, ngati Musa chealagizwi na Bambu. 6 Kangi vatendekili maganga ga sadoniki, vyevyavikiwi muluvecha lwa zahabu, vyevacholiwi ngati muhuli vyevyayandikwi mahina ga vana va Yakobo. 7 Vavikili maganga ago muvipandi vivili vya kukovekela mumavega nyula ya kugubika nganga muni kulangisa makabila kumi na gavili ga Isilaeli, ngati Bambu chamulagizi Musa.

8 Vatenganizi kahaku kapanganga ngati chevatenganizi chizibao, na kugubika kwa zahabu na kwa wuzi wa buluu na zambalau na yidung'u na kwa vyevibotiwi bwina pachitambala chamsopi. 9 Kahaku kenako kakunjiwi, utali na upana waki wawanangini pandi zoha zavii sendimita ishilini na hivili kwa sendimita ishilini na hivili. 10 Kahaku kenako vikiwi pamisitali mcheche ga maganga, msitali wa kutumbula wavi wa maganga ga akiki na topazi na alimasi yidung'u. 11 Msitali wa pili wavi wa zumalidi na johali ya langi ya samawati na alimasi, 12 na msitali wa datu wavi wa maganga ga yasito na akiki yidung'u na ametisito, 13 na msitali wa mcheche wavi wa maganga ga zabalajadi na sadoniki na yasipi, goha gavikiwi muvikovekelu lwa zahabu. 14 Ndi pavili na maganga kumi na gavili gegacholiwi mahina kumi na gavili ga vana va Yakobo. Gacholiwi ngati muhuli, muliganga limonga lacholiwi lihina la mwana mmonga wa Yakobo kulangisa makabila kumi na gavili. 15 Kangi vakatenganizili mikufu ya zahabu yabwina ngati nyosi yeyibotiwi kahaku ka paganga kala. 16 Vatenganizi vikamulilu vivili vya zahabu yabwina na pete zivili, na kuzikunga mumang'elu gavili panani ya kahaku kenako. 17 Mikufu yeniyo yivili vakungili mupete zenizo za kahaku kapanganga. 18 Pandi zivili za mikufu ya zahabu vavikili luvecha zivili vawunganisi na vipandi vivili vya mavega ga nyula ya kugubikila nganga, upandi wa kulongolo. 19 Vatenganizi pete zivili za zahabu, vakawunganisha mupandi zivili za pahi upandi wa mugati wa kahaku kenako ka panganga papipi na nyula ya kugubika nganga. 20 Vatenganizi pete zingi zivili za zahabu na kuwunganisha upandi wa pahi wa vipandi vya mavega ga nyula ya kugubika nganga pepiwungana na mkungi weubotiwi bwina 21 Akungili pete za kahaku kenako kapanganga mupete nyula ya kugubikila nganga kwa nyosi ya langi ya buluu muni chikoto kulogoloka ndi chitamila mkungi wula weubotiwi bwina ngati Musa chealagaziwi na Bambu.

22 Atenganizi ligwanda litali la kuwala mugati ya nyula ya kugubika nganga ya langi ya buluu. 23 Ligwanda litali lenilo yavili na pandu pakupitisila mutu pagati, yatindisiwi ukingu muni yikoto kupapuka. 24 Mulugunyilu lwa ligwanda litali valukili bwina muchitambala chamsopi, maluva gegiloleka ngati matunda ga makomamanga ga langi ya buluu na zambalau na yidung'u. 25 Kangi vatengenizi njuga za zahabu, na kuwunganisa kutindila lugunyilu lwenulo pagati ago makongamango. 26 Hinu njuga na makomamanga vyalandini kutindila lugunyilu lwa ligwanda litali lenilo yiwaliwa lukumbi Haloni peihenga lihengu la uteta ngati Bambu cheamlagazili Musa.

27 Mewa vavatotili Haloni na vana vaki vagosi ligwanda litali lakugubika nganga kwa chitambala chamsopi, 28 na chinyemba chamsopi cha kumutu na kofia ya chitambala chamsopi na chibudula cha mugati chechitotiwi bwina, 29 na mikungi wa chitambala chamsopi pee chechitotiwi na kwa wuzi wa langi ya buluu na kwa wuzi wa zambalau na kwa wuzi wa gadung'u na kutota bwina ngati Musa chealagizwi na Bambu. 30 Kangi vatenganizi chibati cha zahabu yabwina chechilangisa umsopi na panani yaki "Vachola ngati muhuli mweawusiwi kwa Bambu." 31 Kangi vakungili palongolo ya chinyemba kwa mkungi wa buluu ngati Musa chealagizwi na Bambu.

32 Hinu lihengu loha la kujenga Lindanda la kukonganekela na Bambu lamaliki. Vaisilaeli vakitili goha ngati Musa chealagiziwi na Bambu. 33 Vamletili Musa Lindanda la kukonganekela na Bambu na vindu vyaki yoha na vikovekelu vyaki na mbawu yaki na felemu zaki na mapanda gaki pamonga na vitamilu vyaki, 34 chigubiku cha chikumba cha limbelele igosi na mene chechisopiwi langi yidung'u na lipazia la Pandu Pamsopi na Pamsopi neju. 35 Lisanduku la Lilaganu na ndonga za kugegela na pandu pa lipyana, 36 meza na vindu vyaki vyoha, na mabumunda gegavikiwi palongolo ya Chapanga, 37 chibokoselu cha zahabu yabwina, hahi zaki na vindu vyaki yoha pamonga na mahuta ndava ya hahi zenizo, 38 mazabahu ya zahabu ya kuhukisila ubani, na mahuta ndava ya kuvagula vandu na vindu ndava ya Bambu na ubani weunungalila bwina na lipazia la pandu pakuyingilila mu Lindanda, la kukonganekela na Chapanga, 39 mazabahu ya shaba yila ya kuhukisila ubani na wavu wa shaba na mikamulilu yaki na vindu vyaki vyoha na nkeve uvaha wa kusambila na chitamilu chaki, 40 mapazia ga uwa, mapanda gaki na vitamilu vyaki pamonga na lipazia la pandu pakuyingilila muuwa na nyosi zaki na vikongwani na vindu vyoha yeyaganikiwa mukuhengela mu Lindanda lamsopi, 41 na nyula zoha zezilukiwi bwina neju ndava ya lihengu la Pandu Pamsopi, ndi nyula zamsopi za mteta Haloni na vana vaki vagosi ndava ya lihengu lavi la uteta. 42 Vaisilaeli vakitili mahengu goha ngati Musa chealagizwi na Bambu. 43 Musa alolili mahengu goha akayidikila kuvya vakitili bwina ngati chealagizi Bambu. Ndi akavamotisa.